【巴壇隨手寫】三菱ROSA 無零件整無得整 ?

以為無人識穿?老作都唔該有個譜吖!

近日網上流傳一幀一部「紅頂」三菱ROSA 小巴泊於荒山野嶺。

From: Facebook 商用車輛討論區 群組

接著的,當然又係你一言我一語嗰啲人云亦云道聽途說「唔好揸」「好易壞」「無零件」「無得整」「劏咗佢好過」bilibala 嘅留言。

正所謂「唔識嘅嚇死,識嘅就笑L79H死」,留言嘅嗰啲「人」,唔好話有無捐過車底、揭過引擎冚,分分鐘司機位都未坐過上去,甚至連4,5牌都無…… 無嘢嘅,網絡世界生態就係要「刷存在感」,跟風隨勢鸚鵡學舌得到認同好過力排眾議被恥笑,更怕講事實結果被圍剿。

其實三菱ROSA 係乜料,早就寫過長篇大論由「青蛙王子」講到當代嘅 BE6 系,就是引擎、「底擔」等規格同香港市場有乜「唔合拍」都講晒出嚟。只不過香港太多盲從信眾總係選擇性失聰、失明,以至失智,都無佢哋辦法。

講返涉事嘅嗰部 CX1819,原籍確係前捷輝車隊成員,CFM 期間嘅車牌 JZ5919。打聽返嚟,確實有啲唔妥,但係咪「無得醫」或是「醫返嘥藥費」呢?只係識修理豐田 Coaster 嘅所謂師傅當然會回答「係」。但就是只係識修理豐田,其他牌子佢哋識個H咩。所謂面子攸關,加埋荷包要緊,當然老虎魚蝦蟹話「唔用豐田聽揸兜乞食」啦。

據聞架車曾經「伙記,開壺普洱過嚟」─ 水滾。鋁合金「盤頭」嘅 4P10 引擎當然出事啦。但就是「非洲式用車」永無做好日常檢查保養,連最基本嘅「開車前睇偈油水」都似乎無,想唔出事都幾難。

「豐田唔L駛吖嘛」
心諗 DIU9U 啦!
想當年,揸呢啲搵食嗰陣……

朝早攞車,如果老細咁啱响車場,又咁啱見到無打開頭冚就插匙著車,即刻問候你娘親祖宗十八代呀。一句車埋嚟「無水無油嗱咗車頭修理錢你俾呀」

嗰部 ROSA 係 Duonic 自動波箱,對於揸慣 Aisin M551 波箱嘅司機嚟講,無咗轆棍郁吓郁吓又真係好唔慣嘅。另一方面,由「方包」BB23 嘅13B 到轉款後 Euro 2 BB42 嘅14B 到 Euro 5嘅N04C,操控模式都係地板油、波波盡,「氣艇」BZB40/50/70 更加唔駛講,踩到底少少暗斜都「冧」。但沿用呢啲「腳法」响三菱ROSA 嘅 Duonic 波箱,燈位起步一定輸成個身位,所以好多友仔咪話「唔好揸」囉。

Duonic 波棍

查實因為歐盟環保法規要求,歐洲車廠對好多車款都响引擎波箱嘅電腦程式做咗一個叫 Acceleration lock 嘅設定,通常對1,2波限制油渣泵注油份量,即俗稱「鎖油」。當波箱轉上3波,就即刻「一支箭飊咗去」。記得當年捷輝批車啱啱落地,部份司機未完全熟習架車嘅特性,錶板顯示轉咗上3波嗰一吓幾乎嚇L死。唔止 ROSA 小巴 / CANTER 貨車,我哋測試過嘅 Scania K250IB 旅遊巴士都有呢個情況存在。

講解返點解「地板油」起步會「輸身位」。就係因為2波「鎖油」,自動波幾時轉波係因應司機踩油門嘅深度,踩得越深越遲轉波;仲係响 2 波,仍然鎖緊油,快你條毛就有!

好喇,當轉咗上3波,無再鎖油,車速嘭嘭聲上,轉數亦嘭嘭聲上,口水都未吞就會轉4波。但講緊「地板油」的話,波箱電腦介入轉波嘅轉數一定超過3500rpm 甚至接近紅區,短時間內2-3-4,波箱想唔散都難啦。但又無計,大家有時搭到啲 Aisin M551 波箱嘅車,聽到司機轉波時「轟轟聲」都仲行得,所以佢哋咪話「三菱唔好揸」「三菱好易壞」囉。

再仲有呢,歐五 4P10 引擎紅區 4200rpm 開始,吓吓地板油而引擎轉數一直維持响3000rpm 水平,產生嘅熱力就算有「開車前睇偈油水」,稍有常識嘅都知「水滾爭遲早」。到底係「好易壞」定只係「慣性收視式只係識揸一款車」,留白俾各位。

好話唔好聽,唔壞都壞咗,係咪真係無零件呢?或者先了解要維修更換乜嘢零件。

據打聽返嚟,只係更換正式名稱「氣缸蓋」俗稱「盤頭」,通常仲有「爭口」同一至兩條橡膠封邊,夾埋成為「一套」。代理零件部大把現貨。不過,可能有人為咗掩飾只係識修理 N04C 或 1BZ,於是乎老虎魚蝦蟹話「無貨,要訂,等最少三個月」,唔係的話乜面都無晒喎!

Fuso 4P10 / Fiat F1C cylinder head kit

好喇,後來有另一間車房問到「有貨」,跟住嘅梗係「大話冚大話」啦。根據有如賭馬刨馬經「睇往績」,跟住就係講「三菱零件好L貴」。但查實「一套齊料」兩皮唔駛,而 N04C 同樣嘅組件,亦盛惠一萬到尾,甚至有個別零件行報價兩萬幾。

嗱嗱嗱,所謂紙包唔住火,但為咗「面子」同「荷包」,嗰啲只係識整一款車嘅所謂師傅梗係死撐落去話「三菱一定整完一樣隨時壞第二樣,無底深潭嚟㗎,劏咗佢換返豐田好撚過啦」

相信大家都睇到,所謂「唔好揸」「好易壞」,根本係人嘅問題多過架車嘅問題;再又所謂「無零件」「零件貴」,都只係掩飾自己無能嘅「偽造虛假或失實聲明」所為。延伸出嚟,根本可以話「合謀造市」嘅行為。試諗吓無呢啲19車房佬亂吹一通,啲車主邊會信「用豐田天下無敵」然後話之一切都狗衝去買吖。

單係駕駛操控油門,仍記得 CFM 啲司機「受教」的話,波箱大修里數接近300,000km,亦有「唔聽話」係都要地板油嘅司機,未夠50,000km 就已經要 call 拖車返車房「抬波箱」。甚至乎遇過一位 Canter 拖車嘅車主,550,000km 波箱依然無事。要知道拖車嘅傳動系統仲會附加一個俗稱「豬仔泵」嘅東西而增加波箱嘅損耗。仲講「唔好揸」「好易壞」嘅嗰啲友仔仲想諗乜嘢台詞出嚟死撐呢喂?!

嗰啲19師傅係咪「唔識整」?我哋點知呀!只係知道 N04C 嘅結構類型係 OHV (行內俗稱「篤筷子」),而 4P10 係 DOHC (行內俗稱「孖頂CAM」)。
即係點?用電腦做比喻,一個係 Notebook 一個係 Desktop…. 咁囉
想具體啲?睇下面張圖

DOHC 多咗一組 Timing chain (右圖左側)。OHV 就咁裝好「盤頭」就搞掂收工,DOHC 「釘完蓋」仲要攝返條鐵鍊。但又公道啲講,工序耗時真係多半日。但俗謂「做慣乞兒懶做官」,你哋明啦…..

所以,講到尾好多關於 non-Toyota 嘅負評係嘅來由,撇除「合謀造市」嘅利益因素,根本只係一堆笑話。又去返文首所述,好多根本唔識車嘅跟住以訛傳訛,輿論就係咁樣被誤導囉。

大家不妨抽空收睇返之前一集節目,了解更多「人云亦云,道聽途說」以外,「親身上陣」對 三菱ROSA 小巴嘅解說

後記之公器私用:呢架 Rosa 車頂自從由綠轉紅之後,車頭路線牌未著過。原因係程式資料仲係 CFM 嗰堆未有更新。車主/司機有查詢過更新程式要收幾銀,但問完無下文。無幾耐就收到風佢搵咗本姓徐嘅鄭唯/鄭國誠「做HACKER」,而呢位唔知姓徐定姓鄭嘅友仔順便响後背後「打毒針」,四圍唱我「獅子開大口」正一騙徒。
結果佢當然 Hack 唔到啦。點解?
唔怕同大家講,用返電腦做比喻,呢套台灣製造嘅路線牌嘅程式只係 MS-DOS 3.1。仲有,車上系統嘅 Storage 對啲程式數據係「有入無出」。
當日阿唔知徐生定鄭生識得乜嘢叫做「謙虛」嚟請教我嘅,咪唔駛嘥心機捱眼瞓然後又要搵 GD5957 拆落嚟嗰套路線牌周圍同人大吹大擂「死雞撐飯蓋」囉。
CFM 收檔之後我無檢查過呢架車上面套路線牌是否操作正常。但參考返 BX987 同 BK987 嘅情況,CX1819 嘅路線牌應該駁返電就著得到。雖然台灣廠方已經 fade-out 呢個型號,但都仲有零件响香港。

Be the first to comment

Leave a Reply

Your email address will not be published.


*