三菱 ROSA 真係好差??

過去十幾日,各方都好關注捷輝小巴倒閉事件,循不同方向研究「死因」。而講到捷輝,其中一樣必定會諗到嘅就係 三菱 Rosa 小巴,事關捷輝近年因為「15年車齡限制」斥資近二千萬購置新車,幾乎清一色係三菱 Rosa,因而有認為此乃捷輝特色之一。既然係咁,就同大家分享一吓呢款小巴。

一講小巴,相信就算對汽車只係略有認識嘅一般市民,都會知道「周街都係豐田 Coaster」嘅現實。又或者好些對小巴可能略有認識嘅人憑片面了解然後人云亦云、跟人口水尾狠批 三菱 Rosa 差到無倫,搭車嘅嫌「浪」到嘔、揸車嘅嫌拋、維修嘅嫌「難整」易壞無零件…… 但查實呢款車由設計、性能、操控、使用、保養維修、乘客感受等各方面到底係點樣一回事,又或者點解由「冷氣小巴先驅」變成如今的「小數族裔」「瀕危物種」,未有汽車傳媒詳細寫過 (鬼咩,森那美都無錢俾出慣「鱔稿」嘅雜誌,更加無人會寫呢類「大學畢業論文」),不如就我哋「燒時間」寫吓,反正大把資料响手。

由 1983年「三菱冷氣小巴」開始……

政府新聞署圖片

接近四十年嘅光景,Rosa 先後經歷過三代車款。第一代响香港出現嘅 三菱 Rosa,廠方代號 BH214。

好多人話 Rosa 係「貨車陣」,咁要先簡單講 Definition of “Truck Chassis” vs “Bus Chassis”。事實上,汽車工業無仔細分類或指明用途,又或者應該話只係分 Bus only purpose chassis 同 General Chassis。即係點??

响外觀上,Bus only purpose chassis 的「主車架」直陣 (Longitudinal frame) 離地較低,尾軸一段升高而呈「倒 U形」。

Hyundai County 底盤其實即係 Fuso Rosa BE4 系嘅底盤。睇住先啦
見到嘛,近尾軸嘅一段直陣呈「倒U形」㗎!

由於大部份直陣低過車輪,若要建造全平面地台 (Full flat floor platform) 車身,同車陣之間有空隙,需要加裝固定組件防止地台受震盪而倒塌。但要在「陣面」建造車身,縱使出現輪穹位,但能降低重心並較方便予乘客上落車,故此均用於建造巴士一類車款。

所謂 General chassis,就係全條「直陣」處於同一高度水平,能更容易建造更堅固嘅全平面地台車身,因此所有「貨車陣」都係咁嘅設計,但又唔代表唔可以建造巴士車身。例如可被喻為 Icon of Hong Kong 嘅 勝利二型,底盤係直線結構,但點解無人會話勝利二型係「貨車陣巴士」嘅呢???

事實上,三菱 Rosa由 BH214 到近代的 BE639/BE649 以至現今的 BE641 嘅底盤都係尾軸一段升高而呈「倒 U形」 嘅結構,亦所以「貨車陣」嘅指稱可以話係誤解,甚至係誤導。真係衰啲講,車底都未捐過就說三道四,就如太監講扑嘢,咁你都信然後跟風??!!!!

2 Comments

2 Trackbacks / Pingbacks

  1. 【巴壇隨手寫】三菱ROSA 無零件整無得整 ? - 巴士台 HK Bus Channel
  2. 巴士定貨車?貨車定巴士? - 巴士台 HK Bus Channel

Leave a Reply

Your email address will not be published.


*