巴士定貨車?貨車定巴士?

呢幾日網上其中一個討論焦點,就係一部所謂嘅「戰術小巴」嘅物體。

有一啲對汽車略有認識嘅人見到個車頭就大叫「XY@@Z#* 貨車嚟嘅」,或者話「貨車陣巴士」云云。然後又你一言我一語品評而通常「負皮」。另外有一些疑似記者嘅人士見到呢類留言討論就搲爆頭「乜嘢貨車呀?」「點樣貨車陣巴士呀??」

網上流傳圖片

呢架車乜嘢來歷就唔討論 (亦唔方便討論,原因大家都明㗎喇),不過「貨車陣巴士」呢個問題,就幾值得、亦有需要攞出嚟講吓。

首先,中重型車底盤何謂「巴士陣」、「貨車陣」,好耐之前已經解釋過,响汽車工業並沒有咁嘅分類

唔再花時間、篇幅糾纏於呢啲無謂嘅拗撬。

第二,「貨車陣」都要裝上「貨斗」先至係一架完整嘅貨車

未裝「貨斗」嘅 Mercedes Benz Actros Edition 2 底盤
From HK Car Channel

而「貨斗」因應功能可以變化萬千,例如香港慣稱「街斗」嘅平板斗、密斗、水缸/油缸、混凝土攪拌 (俗稱田螺)等等。甚至乎「密斗」單純廂體結構,可以只有尾門,或加裝側門;側門可以揭門或者趟門….

Hyundai Mighty MX6 「雪霸」冷藏斗貨車
From HK Car Channel

相對「巴士陣」(不論後置引擎還是前置引擎),亦都要裝上車身先至係一架完整嘅巴士,而車身因應買家喜好需要、車身廠設計而變化萬千。例如長度、載客量 (2+2 或 3+2座椅佈局)、乘客車門尺寸/開啟方式、行李倉門電動或手動操作….

Scania K250IB with Asia Autobody work “Asia Vero” body

相信好多人,尤其是對汽車認識唔多嘅即刻頭都大埋,事關好大可能佢哋對汽車製造嘅概念係以為所有車種都好似私家車咁「車廠造好晒 ready for use」。响香港甚至仲要加上「非法改裝」可能深入人心,以為「改裝」必定係非法而意識上排除「後期製作」嘅可能性,因而無諗到商用車另一個世界。

或者以電腦比喻大家會容易明白。私家車就是「套裝機」、Notebook,真係 ready for use,設備規格唔會有大變化,例如 iMac / MacBook 頂盡可以選擇RAM 數、HDD 容量。

商用車 (不論巴士或貨車) 就是「砌機」。底板、CPU、RAM、HDD、Display Card… 任君選擇。而且,就以 RAM 為例,容量唔止可以選擇大細,仲可以選擇配搭 (e.g. 32GB x1 vs 16GB x2),條RAM嘅運算速度都可以揀;或是 Mon 連 display Card 配搭,打機 vs 做 graphic design 已經有唔同需要。

或者你會質疑「安全」問題。無錯,「砌機」就算出事頂多 touch wood 燒咗間屋,而一架車有乜「大吉利是」隨時死傷無數,但車廠設計生產底盤早已為「後期製作」嘅技術及安全做好準備,並會要求車身廠遵守各種規定。詳細就唔响度講,始終又係要長篇大論。

貨車「變」巴士?

首先,以「貨車底盤」裝上車身成為巴士並唔係新鮮事,一百多年前已經存在,呢個亦係 “General Chassis” 呢個 terms 嘅原由。亦有車廠意識到乘客上落便利及安全問題,設計出降低直陣高度嘅底盤主要用作建造巴士。

到二戰後,特別係1960年代中後期,德、英、日本等國意識到需要改變巴士服務模式,陸續推出後置引擎巴士(底盤)。但發展過程發現唔少技術問題同限制,例如香港巴士迷圈子人所共知嘅引擎散熱效能;另外,引擎+波箱+後軸形成嘅後懸 (Rear overhang) 長度,即使如 Daimler Fleetline、Leyland Atlanean 等嘅橫向佈局,無可能無限縮短,衍生到整車長度受到限制。因為太短會影響車軸負重平衡 (Axle weight balance) ─ 前軸負磅過輕會容易轉彎失控 & 迫力效能不足,後軸就因為負磅過多而組件加劇損耗,例如「珍寶」容易斷「直濕」其中一個可能成因。

“Axle weight balance” 好似好複雜,但只要玩過「搖搖板」就會有大約概念
Source: 網上圖片

既然前置 (或中置) 引擎佈局無以上嘅問題,並因此可以製造體積較細嘅巴士,所以前置引擎佈局仍然有存在價值。

大家可能認為「巴士唔係越大架越好咩」,如果客量需求一如九巴2D、78K、79K,用 12.8m 的話「啲油唔駛錢咩!」

撇除三菱ROSA豐田Coaster 係另一個範疇,後置引擎巴士已成世界主流,車廠唔可能投放資源設計生產前置引擎巴士底盤,於是乎就出現以「貨車陣」裝上車身變成巴士。

响歐洲「貨車陣巴士」相當普遍,亦有多間車身廠設計同建造呢種車。

Autocuby body on Mercedes Benz Atego 1228L chassis
Source: truck1.eu
Plaxton Cheetah XL body on Mercedes Benz Atego chassis
Source: John Hill Coach Sales & Services Ltd.
Autocuby body on Mercedes Benz Atego 1524L chassis
Source: coachandbusmarket.com

事關歐洲嘅旅遊業老早唔係「豬仔團」為主,而係所謂「精品化」,每次要接待人數唔多,開架12米大車真係「啲油唔駛錢呀!」。而且唔少旅遊區,尤其是响南歐如意大利、西班牙,往返鄰近嘅機場、遊輪碼頭要翻山越嶺,如果你係旅遊巴司機會想揸架乜嘢車?

最後,你可能想問,貨車底盤通常在出廠時有「屋仔」駕駛室,點解可以成個車頭唔同晒?答案好簡單:「屋仔」拆得㗎嘛!

Mercedes Benz Atego 818 chassis
Source: Degroote Trucks & Trailers

係咪又想講「嘩… 好危險呀」咁… 解款車危唔危險吖?!

Source from Wikipedia user Ralf Roletschek
Under CC-BY-3.0

根本係同一種模式,只不過裝上嘅車身結構、外形款式、用途、唔同而已。都係嗰句,香港真係可能只係一個井。

2 Trackbacks / Pingbacks

  1. MAN TGL 8.190 Marcopolo BRAVIS 車身中型旅遊巴士 - 巴士台 HK Bus Channel
  2. 封殺古董車為環保?欲加之罪何患無詞! - 汽車台 HK Car Channel

Leave a Reply

Your email address will not be published.


*