豐田Coaster 換細引擎

2022年嘅小巴界將會相當熱鬧,除咗有三菱Rosa BE7系將會引入香港之外,仲會有「無得頂、無嘢整、天下無敵」嘅豐田 Coaster 將會換上「新」引擎。

豐田Coaster 換偈嘅消息,其實响行內流傳咗一段日子,只不過一直未有官方公佈,因而我哋都唔會「扮爭取成功」。但網上有人發現香港海關嘅「公佈零售價系統」已有相關資料,意味都唔再係乜嘢秘密。

豐田Coaster 將換上嘅「新」引擎係來自 Hiace 客貨車嘅 1GD-FTV,排氣量2755cc,最大馬力170PS,峰值扭力450Nm。但只會响車身長度 6.99m 規格嘅 B70 仕様實施,並且配備六前速自動波。至於棍波及「超長陣」B80仍然配備原本嘅 N04C 引擎。

Photo by: Jacky Lim

呢個改動嘅原因當然無從稽考,純粹斷估同「環保」兩個字有關,除咗廢氣排放之外,耗油量應該係重點。不過奇怪在於未見日本廠方有正式公佈,亦未見日本或其他國家有類似嘅規格改動嘅消息。是否大約2000年石油氣規格「香港特供」之再現?天曉得!唔理乜嘢原因,又唔理係咪「香港特供」,純粹睇「新」規格嘅資料數據,可謂有明顯針對目標。

事實上,即使改款前嘅 XZB50,單係耗油量比三菱 ROSA BE641G 高約兩成,亦難再「非洲式用車」,若非「合謀造市行為」早已無明顯優勢。大改款後嘅 B70,因為淨重增加,不止耗油量問題加劇,連機械損耗亦趨嚴峻,根本優勢不再,只不過「慣性收視」勢頭已成才會有如師奶對CCTVB膠劇又要鬧又要睇咁嘅情況。

相對三菱Rosa 嘅 4P10 排氣量2998cc,175PS/430Nm (Euro 6) 輸出配 6前速 Duonic 波箱,「新」引擎嘅 170PS / 450Nm 動力輸出,配合6AT波箱,理論上應該足夠。但機械嘅嘢唔能夠單睇數據,仲有好多因素要考慮。

資料圖片

首先,耗油量係咪真係能夠改善,當然要實際試過車先至知。但平治响2012年進行一項實驗,比較12m Citaro 巴士配上細排氣量嘅 OM936 同 OM457 引擎嘅耗油量,結果完全一樣,且 OM936 運作損耗較高。所以真係唔能夠單憑數字而下定論。

另一方面,三菱嘅 4P10 引擎係 rebadge from Fiat/Iveco F1C,意大利廠方設定呢副引擎嘅適用車輛最高總重 (Plated GVW) 於7.5噸 (三菱更將之推高至9.0噸),但豐田嘅 1GD 引擎係沿襲自1KD引擎,1KD 一直只配上 Hiace、Hilux,即設定適用範圍 up to 3.5噸。日本本土市場嘅 Dyna (日野 Dutro) 貨車於今年7月推出 1GD 引擎規格,但只是GVW3.5噸嘅最輕型規格

日野貨車網站截圖 (經調整)

唔敢話死硬,但始終未有「application on GVW above 3.5 ton」嘅 track record,而且 Coaster 淨重比 Hiace Commuter (重量最高型號) 多近一倍 (約3800kg vs 約2100kg)。又雖然理論上可以調整波箱尾牙對應返車重變化,但就是換大比例尾牙等如耗油量增加,引擎散熱效能要求亦提高,平心而論真係要觀望。

新加坡的豐田 Hiace Commuter
車牌字頭PC + 車身寫住 EXCURSION BUS 即係以「巴士」出牌
Photo by: Jacky Lim

縱然有說法豐田此舉可能只為市場策略嘅「射盤」,維持棍波規格嘅銷售。但 B70 因車重增加衍生嘅問題,其實從歐洲市場配葡萄牙 Caetano 車身嘅 BB50 / XZB50 持續被問候娘親以至祖宗十八代,分析得出成因都係車身重量導致嘅一堆問題,就知道只有「合謀造市」先至唔會明白係乜嘢一回事。

歐洲版 豐田 Coaster,車身為葡萄牙 Caetano 出品。淨重約 4000kg
網上圖片

但又咁講,從宏觀市場學角度而言係好事,撇除「慣性收視」因素,今次變動起碼知道要面對競爭。正所謂有競爭有進步,市場先至能夠得得益。只不過香港嘅小巴佬….. 算9數吧啦,最好俾返非洲規格嘅 13B 偈或者 1HZ 偈過佢哋就最好㗎喇。

豐田 Coaster 搭載 1HZ 引擎 – 直6 NA 4164cc
「非洲式用車」之選

Be the first to comment

Leave a Reply

Your email address will not be published.


*