盲信鐵路萬能俠,失去智慧的開端

前幾日,唔少香港人又以「買贖罪券」模式表示要罷搭港鐵,仲有一啲可能只係响FB出個Post 口頭表態…… 响平常嘅日子,香港人使用公共交通嘅習慣,有幾多唔係「除了鐵路外你們不可以有別的交通工具」?

或者有唔少人認為我以《聖經》「十戒」搞出嘅二次創作太過誇張,但以下兩個我親身見證嘅故事,我敢保證你哋睇晒之後一定認同香港人真係「盡心盡性盡意愛鐵路…..」

故事一
話說好耐之前,有一晚放工時間,港鐵觀塘線冧檔,九龍塘至調景嶺站之間服務暫停。咁啱嗰日我「腳痕」上咗架 Fuso Rosa BE641G 走返幾轉。轉入又一城總站,見到人山人海。開門上客嘅時候,先後有兩個人埋嚟問路……

第一個問去唔去到新蒲崗。我答佢「我呢架只係去到九龍城,你可以坐到出去再轉車,或者過返沙福道嗰邊搭25B (我都算唔話得啦,無焗佢上我車,仲教佢搭架直接車)

然後佢嘅反應係…..
「吓,仲要轉車?」
我即刻截住佢把口,再講一次「可以搭25B直到」
佢再跟住回答「咁煩,仲要行嚟行去。唔該晒先」然後轉身離開

但跟住有上車嘅乘客「八卦」的同我講:「佢話返落去車站(港鐵站) 再睇吓點」

第二個問嘅目的地係鳳德邨。我教佢去排72號專線,佢話「(候車) 人龍好長喎…..」
然後我回答佢「你唔想等嘅可以上我車,出到九龍城有大把巴士可以去到荷里活廣場」
跟住佢嘅回應係「要轉嚟轉去,咁煩㗎。我返落去地鐵站等算喇」

第一個「港燦」要去嘅地方,明明平日係咪都要轉多一程小巴或巴士,但照我估計,佢應該平時習慣咗搭港鐵到去黃大仙轉20M 專線。呢鋪早咗兩個站落車(港鐵) 佢就變咗路盲。第二隻「港豬」相信更加唔駛講,擺明習慣咗「除了鐵路以外……」嗰隻

故事二
又係Once upon a time,朋友同佢老母 and 細妹响越秀廣場同親戚飲完茶,要過去灣仔近大有商場附近。朋友話行去前面 (彩虹道) 搭111隧巴,一程車搞掂。但阿媽同佢細妹就話「去搭地鐵啦,嫌隧道有排塞車咩」

朋友「駁咀」話仲要搭多程小巴再轉,過到灣仔又要行,仲要上上落落,搭巴士塞埋車嚟都到啦。

但阿老母同細妹堅定相信「敬畏鐵路萬能俠是智慧的開端」── 唔駛塞車嘥時間,朋友就發老四「地鐵壞車嗰陣無路走添呀」
阿細妹一句「車」埋去「地鐵有幾可壞吖,真係壞都有幾十萬人一齊陪啦」

朋友決定話知佢老母同個妹又去「拜鐵路教」,自己行去搭111。

結果係…..
據朋友講我知,响彩虹道等咗大約5分鐘就上咗111新巴,去到佛光街橋底,未埋平治街站已經開始蟻躝;但漆咸道北往佐敦方向塞到近乎「拉手制」咁滯,111個卡佬只係响最左線「拉龍」……

朋友响灣仔「檀島」落車,打電話俾老母同個妹問佢哋到未,但無人接聽。佢行咗去大有商場間Pacific Coffee 坐。大約20分鐘後電話響起伯母來電,話响A3出口,問朋友响邊…….

我好夠膽講,類似嘅故事仲有大量「供應」。唔駛點吖,2016年10月23日,觀塘延線黃埔站通車,大量黃埔花園居民大叫「從此唔駛再受(捷輝)小巴佬啲氣喇」(2020年4月19日之後真係唔駛再受啦)。再早啲,2002年將軍澳線通車,運輸署「咨詢」話要取消691, 692隧巴、削減其他巴士 / 小巴線服務,當區居民嘅反應係乜,唔好要我考古,費時大家無癮啦,係咪咁話。頂多一句:當港鐵宣佈將軍澳線列車服務出現延誤嘅時候,真係幾十萬人响度齊齊互相陪伴囉。

如果你睇晒以上大約1000字仲認為「聖經二次創作」係太誇張嘅話,我都唔會再嘥口水同時間回應你。頂多加多句:仲有人認為解決塞車嘅問題嘅最佳方法就係興建鐵路

最後,點都要送呢張「鐵路萬能教」聖訓卡俾大家。背熟佢,做個真正嘅鐵路教信眾,先可能係香港人。阿門。

1 Trackback / Pingback

  1. 抄牌越趨瘋狂,政府發窮惡的尋租行為 - 汽車台 HK Car Channel

Leave a Reply

Your email address will not be published.


*