屯門公路日塞夜塞,有何解決良策

屯門公路塞車唔算係新聞,即使發生嚴重意外交通近乎癱瘓嘅即時新聞,都只會演變成苦笑地挖苦屯門人忍(尿)功了得,因為隨時嚴重到禍及九龍,「外區」市民齊齊做苦主。

屯門公路巴士專線於1995年實施,背景亦係擠塞。但1/4世紀以來,屯門公路擠塞問題不單未得到解決,當今港人奉若神明嘅鐵路(西鐵線)在2003年通車,依然繼續日塞夜塞,且越塞越惡劣。

唔少人期望將於月底通車嘅屯門赤鱲角隧道可以舒緩屯門公路嘅擠塞,或是再有「串燒」、「反貨櫃」總算有路可「逃」。

但如果告訴大家「青嶼幹線繁忙時間使用量已達75% 」,各位又會作出甚麼反應呢?

曾幾何時,屯門有一種對外公共交通服務,人頭擔保絕無擠塞問題、仲保證有位坐,但因為「限時限刻」兼價錢「貴」而被嫌棄,然後完全消失。無錯,就係渡海小輪。

Photo from web, source cannot identify

從另一個角度宏觀去探討,政府可能因為欲拆尖沙咀碼頭巴士總站陰乾天星小輪卻不成功,所以把伴隨灣仔碼頭因填海遷移而重置於新碼頭旁的巴士總站名稱刪掉「碼頭」二字,繼而在紅磡碼頭巴士總站重施故技,彷彿要洗刷掉市民對渡輪嘅記憶。

又甚至乎將整個荃灣碼頭連同巴士總站綜合運輸大樓徹底摧毀,改建成「鐵路萬能教神壇」,即係鐵路車站…… 仲有幾多住市區新界嘅香港市民會諗起渡海小輪?也許只有每年一次「污蔑神明的麥兜搶包山」嘅嗰一日囉(搭船入南丫島食海鮮?梗係揸車去鯉魚門、入西貢啦)

不論市民有幾嫌棄,政府有何陰謀陽謀,渡輪唔會塞車係不爭嘅事實,在交通規劃角度能產生分流效果,減輕鐵路、巴士客量負荷,間接舒緩道路擠塞,亦係事實。

今次 HK Bus Channel 嘗試另一種節目製作型式,「阿Lim」與 香港公共交通智庫 幹事 陳迪遙 (Ticky) 進行對談討論,從公共交通角度探討屯門公路擠塞問題,復辦渡輪可會是有效舒緩擠塞嘅方法。

節目分上、下兩集,上集已經上載至 HK Bus Channel 的 YouTube 頻道
(下集就稍後吧)


睇完記得點擊 訂閱,與及「撳鐘仔」以便可以隨時知道有新影片上架。

Be the first to comment

Leave a Reply

Your email address will not be published.


*