【屯門APM?】新鴻基向城規會申請拆卸九巴屯門車廠改建商廈

城規會日前發出公告,指屯門市地段第79, 80, 81號和毗連政府土地申請改劃,由「綜合發展區」改為「商業」用地,打算興建三座商業大廈及商場。而呢三個地段嘅業權持有人為新鴻基地產集團及其關連機構,其中第80及81地段為九巴車廠。

根據城規會發出嘅申請摘要,申請範圍嘅土地面積 (連同涵蓋嘅政府土地)共37230平方米,申請地積比9.5倍,可興建總樓面面積約193,306平方米。當中包括响「80廠」及「81廠」基座為3至4層嘅商場,其上興建寫字樓而總樓高分別為31層及26層嘅商業大廈;至於「79地段」現址嘉柏中心,則改建為總高31層嘅商業大廈。

左上 SECTION A-A TMTL 82 即九巴總修廠,TMTL 81 及 TMTL 80 所示即為申請拆卸現九巴車廠興建的商場及寫字樓
上右 SECTION B-B TMTL 79 所示即申請拆卸嘉柏中心興建的寫字樓
下方 SECTION C-C 所示為申請擬興建的商場的行人天橋系統,包括一條連接西鐵屯門站

三個「商場」之間都會興建行人天橋,其中「80廠」及「81廠」之間嘅天橋,從城規會區公佈嘅圖則所見,其設計概念建類似將軍澳站唐德街連接商場Popcorn與唐明街公園的天橋。

城規會公佈的「申請人」提交商場3樓行人天橋系統圖則
將軍澳唐德街 Popcorn 商場天橋
擷取自 Google 街景

城規會公佈「申請人」(即以業權理解為新鴻基地產集團及其關連機構) 提出的申請理據為配合「大灣區發展綱領」,並希望藉提供就業職位調節就業人口流動。「大灣區」呢樣嘢就唔在此評論,至於「調節就業人口流動」好似好堂而皇之,不過….

好多人對於呢項申請嘅第一個反應就係「新鴻基拆巴士廠起樓正PKHKC」,又或者從巴士迷角度,昔日「朝聖好去處」終於可能要消失,或者放低晒呢啲前設諗法,純粹以城規會嘅資料做吓研究分析。但當然太技術性嘅就唔响度講啦。

點解會對「調節就業人口流動」仲有「不過」?因為當年港府嘅「新市鎮發展計劃」唔止只係起樓俾人住,係有完整嘅規劃冀達到區內有充足嘅就業職位。現由 HKTV Mall 租用作物流中心嘅第80地段,原為九巴車身裝嵌廠,由1980年代開始,由「勝利二型」到 11米三軸Olympian,再到冷氣巨龍、城巴Olympian、都普躉….. 都係响呢度裝嵌車身,除咗成為巴士迷「朝聖之地」,亦提供咗相當嘅就業機會。

至於「79地段」嘅嘉柏中心,以前係香港其中一家最大規模玩具廠商「彩星集團」嘅第二座廠房大樓 (第一座就是位於杯渡路現仍稱為彩星工業大廈)。彩星係外國名牌玩具做OEM,最出名嘅系列係忍者龜。

對應返呢啲歷史去理解「提供原區就業機會」可能係一個笑話,又或者睇見依家 武漢肺炎之前嘅時空,屯門公路日日塞到阿媽都唔認得,其中一個原因就係政府吹雞商界做嘢「推動金融服務業發展」推冧晒香港嘅工業令到大部份勞動人口每日「大遷徙」,以「貓哭老鼠」形容新鴻基嘅申請理據應該不算過份。

廣告時間:之前有一集 (分上下集,即係兩集) 探討屯門公路擠塞問題嘅節目


可點擊圖片前往巴士台YouTube頻道收睇

或者响另一個角度,撇除「祖国」經濟走向,假設真係起好咗呢三楝商業大廈,又會有幾多人响呢度返工,平心而論真係一個問號。就是如果你問朋友「响邊度返工」而答案係「屯門」,可能好多人嘅反應係打個凸。

至於响巴士角度,除咗「左膠模式」嘅「起樓賺嘅錢歸新鴻基,巴士公司年年話蝕錢」之外,先講「81廠」,衍生出嘅問題就係九巴又要另外同政府申請租地泊車。至於「80廠」最原本嘅用途係「砌巴士」而啲工序早在2000年開始逐步轉移到中国,直到大約2008年就全面「收檔」。有講法指因為要減低成本,並缺乏人手,但講到錢永遠都係雞與雞蛋嘅問題,正如捷輝小巴2016年申請加價話要提高薪酬請司機而黃埔花園鹹魚表示「要請司機係你嘅事,唔好要我俾多一個仙」

延伸到「掹車邊」同巴士有關嘅問題,假設重建成事,又真係有返咁上下多人响嗰度返工,交通配套又能否應付?無錯,西鐵站就在側邊,而且香港人普遍係非常虔誠嘅「拜鐵路教」信徒,但撇除好多「信眾」都會聽從局長話迫爆就等多幾班車,有無足夠巴士等公共交通服務呢?假設政府「轉死性」容許開足夠嘅巴士路線途經該處,震寰路又係咪應付得嚟呢?

假設申請被否決 (雖然係人都知城規會於地產商而言只係橡皮圖章),「81廠」繼續擺車,「80廠」可能只繼續用作物流倉庫係咪「嘥料」?在新鴻基嘅角度「蜑家雞見水」就梗㗎啦,但對於屯門人以至全港市民而言根本無損失,甚至掉返轉講,申請通過然後起好晒,又對於屯門人以至全港市民有乜好處?頂多咪多一個類似APM嘅物體响屯門可以行街囉。

還原基本步去睇呢件事,要不是近十幾廿年嚟香港人一味「炒」字當頭而工字不出頭,「80廠」又點會有機會成為「屯門創紀之城」吖。

咨詢期到3月25日結束,有乜意見就寫過去。唔駛大學畢業論文咁長篇大論,但亦唔好只係寫「反對」兩個字。

Be the first to comment

Leave a Reply

Your email address will not be published.


*