「成功爭取黨」嫌 宋皇臺 同 土瓜灣 鐵路教廟香火唔夠鼎盛

正所謂「拜得神多自有神庇祐」,好多香港人為咗家產升值虔誠信奉「拜鐵路教」,該當有新「鐵路教廟」開光就誠心參拜多添香油。但話說屯馬線响6月底通車之後,宋皇臺 同 土瓜灣 兩間「鐵路教廟」嘅香火好似唔夠鼎盛,「成功爭取黨」日前走出嚟指斥九龍城、土瓜灣有近四成嘅信眾唔夠誠心,投向「異端」嘅巴士、小巴云云。

報導引述 「成功爭取黨」指出,早前向九龍城、土瓜灣 嘅住民「問話」,住民表示出入「鐵路教廟」嘅「大雄寶殿」,即係車站大堂,嘅路途太遙遠,就是乘搭巴士,即使是過海往返港島,「塞埋車都快過由出口行到大堂,同埋上落月台」。

喂,人哋兩母女由新蒲崗越秀廣場去灣仔大有,要洗多十元八塊搭一程專線都堅持「拜鐵路教」,你哋班 九龍城、土瓜灣 嘅港燦點解唔好似佢哋誠心呀?!

資料圖片

知唔知幾多街坊等到頸都長就係等「鐵路教廟」開光令層殘到石屎剝落鋼筋生銹甚至可能就嚟冧嘅樓可以推高個價等俾地產佬「正宗冚家富貴」─ 收樓呀。正所謂「阻人發達猶如殺人父母」,你哋咁唔誠心即係得罪晒啲街坊,小心變過街老鼠呀。

可能你即刻想 XYZ&#@*&^ 我「把口駛唔駛咁毒」
即係咁…..
2016年10月23日,我親耳聽到黃埔花園19中產响第八期附近大大聲嗌「唔駛再受小巴佬嘅氣喇」
2021年6月30日,你估獅子石道、龍崗道、浙江街、鴻福街……無人大嗌「終於等到層樓個價坐火箭喇」

要知道普遍香港人對於「樓」嘅諗法唔係要嚟住㗎。但想層樓升但又嫌出入「鐵路教廟」參拜供奉路程遠,點得㗎。或者都係展現香港人「只圖不勞而獲」嘅精神咁啦。

「拜鐵路教」嘅教會增長不及預期,當然就會有人「傳福音」,根據返該宗報導,「成功爭取黨」 建議增設「接駁出口」同「優惠站」吸引「信眾」前往「參拜」,心諗果然係「沒有鏡頭哪會蒲頭」,矢志啲智商負三十嘅傳媒性工作者成就「全力亂噏遲早變秘笈」( 偉大的毛主席嗰句「謊話講一千遍會變成真理」新版本 ?? )

所謂「優惠站」都係平兩蚊,好話唔好聽買包 TEMPO 都唔得。乜X嘢叫「接駁出口」,駁完咪又係要行!想當年「笨人花園」開盤,啲「得閒無事做睇樓當行街節目阻住地產agent (包括我)搵食」嘅嗰啲友仔,對於長荔街行人隧道出口响隔籬「信德船廠」舊址都嫌三嫌四啦。

就算整乜自動輸送帶,尖沙咀麼地道地底嗰條慳到幾多時間同腳骨力,心照啦。

計我話,要100%絕對肯定「鐵路教廟」香火鼎盛嘅不二法門就係取消晒啲巴士、小巴路線。

唔好話「捷輝」被執笠嘅朱玉在前,真係講都講到口臭,荃灣「華都戲院」或「四海保齡」對面以前仲起碼有59A、66、68、68A出到深水埗、旺角甚至油麻地,就係「拜鐵路教總壇」,即係運輸署,狠下心腸而九巴就範取消或縮短條線,家陣就全部人都要乖乖地去「鐵路教廟」添香油囉。咁成功嘅例子响度,唔係連 Copy & paste 改幾隻字都嫌懶呀嘛?!!!!

Photo credit: K.H. Kung @NOG Publishing
Photo credit: K.H. Kung @NOG Publishing

「啲街坊反對喎,我哋仲點選呀」
喂,家陣駛L選㗎!
全無後顧之憂唔駛擔心做政棍會無飯開,唔係咁都怕呀嘛?!!

好話唔好聽,唔好話取消咗111 之前篇文可以Delete得,就是嗰接近四成「嫌塞車得嚟都快過行」嘅都會再咁講,而且肯定唔駛攞《瑪拉基書》三章10節出嚟都全部乖乖地向「拜鐵路教」教會進貢奉獻啦。

Photo by: Jacky Lim

計我話,一於取消晒行經太子道東、馬頭涌道、漆咸道北嘅所有巴士同專線小巴,包括埋101, 106, 111, 116 隧巴,行太子道西/界限街/亞皆老街嘅嗰啲1A, 2A, 6D, 13D, 16….. 嗰啲唔取消都全部上橋 bypass 九龍城迴旋處,總之令到 太子道東、馬頭涌道、漆咸道北 所有巴士同小巴通通消失,咁就可以保證「鐵路教廟」一定香火夠晒鼎盛,直到永遠。阿們。

Photo credit: Dominic K.H. [email protected] Publishing

再甚至乎一於聽我老點,40X, 43X, 48X, 61X, 263 全部取消,到時整條屯馬線一定擠到水洩不通。擔心人多得滯?挑…… 局長唔係講咗「等多兩班車」咩?又唔係你「成功爭取黨」去迫,怕條毛呀。話唔定到時一個300呎唐樓單位嘅收購價高達1000萬嘅時候,啲街坊會爭住嚟多謝你哋呢。

總之緊記「聖訓」,保證家鏟無往而不利。願鐵路萬能俠祝福你,保護你,願鐵路萬能俠賜你平安。阿們。

後記:好多唔用腦或無腦用、又或者閱讀理解能力連小學雞都不如嘅唔會知何謂曲線抽水。繼續硬膠膠地去發膠音我哋都唔會得閒理你。

1 Trackback / Pingback

  1. 巴士無尿入,要收車停駛? - 巴士台 HK Bus Channel

Leave a Reply

Your email address will not be published.


*