話說當香港山頂纜車公司喺2021年5月20號宣佈第5代山頂纜車將於2021年6月28號正式退役 （正宗5.20公佈「唔要你」）之後，汽車台嗰邊就已經出咗一篇香港山頂纜車嘅回顧報道，簡單道出咗香港山頂纜車嘅發展歷史。
然後去到第5代山頂纜車最後服務大家嗰一日，連香港山頂纜車公司自己都未必估計到，香港人對山頂纜車呢個被人以為係旅遊景點多過公共交通工具嘅嘢係咁熱情，全日有11,000人次乘搭！
當初香港山頂纜車表示呢一次翻新工程，第一階段由2019年4月23號開始，一直到2019年7月22號；第2階段由2021年6月28號開始，大約維持6個月。所以香港上海大酒店物業部集團總監孫漫天先生喺第5代山頂纜車最後服務嘅嗰日回應查詢「香港人會唔會有『聖誕禮物』？」嘅時候曾經話「好有可能㗎！」
不過大家都應該記得，2021年香港以至全世界面對新型冠狀病毒（武漢肺炎），搞到國際間嘅貿易航運都亂晒，香港政府嘅「防疫」措施又搞到香港社會運作一塌糊塗，一大堆「不可抗拒」嘅事件令到香港山頂纜車嘅更新工程同埋第6代車廂無辦法喺預期嘅時間完工投入服務。
但無可否認嘅係：作為香港嘅一個重要地標以至歷史見證，山頂纜車多年嚟都係香港舉足輕重嘅一員，而山頂纜車呢133年一向嘅營運亦以可靠、安全見稱，深信香港人都會接納山頂纜車寧可謹慎行事而唔係一味求搶功。
當臨近2022年春天，天氣開始回暖，萬物重見生機（香港社會被政府「防疫」政策人為害死就另計），其實香港山頂纜車更換全新動力及拖曳系統、控制及訊號系統、更換纜索、鋪設新路軌呢啲工程幾近完全做晒㗎喇！
而且…
第6代山頂纜車已經靜靜雞開始試緊車㗎喇！
麥當奴道站
麥當奴道站（近「前・寶雲道站」）
馬己仙峽道
梅道
梅道站
兩組車廂上落山相匯
由相片入面可以見到，起初試車嗰時，第6代山頂纜車仍然係包著吊上路軌嗰時嗰啲保護布，只係兩頭跟返擋風玻璃鎅返開3個大窿畀司機用…
成個樣睇落就似👻咁囉！
去到2022年3月5號，撞啱係二十四節氣中嘅「驚蟄」，傳統民間智慧話「動物昆蟲喺入冬後就會蟄伏冬眠，直到驚蟄大地轉暖、春雷乍響，萬物方才甦醒」…
等…等…等…等陣…
同香港山頂纜車又有乜關係？
萬眾期待第六代山頂纜車預計今年夏季正式投入服務 全新第六代山頂纜車於今天(2022年3月5日)正式開始來往穿梭太平山頂以進行測試工程。 第六代山頂纜車的車身特別塗上具標誌性獨特「山頂纜車綠色」，分別向第三代(1948-1959)及第四代…
Posted by The Peak Tram 山頂纜車 on Saturday, 5 March 2022
原來香港山頂纜車揀咗呢一日，將第6代山頂纜車當成蟄伏冬眠嘅動物，揭起嗰啲保護布叫醒佢，正式安排第6代山頂纜車行晒全段山頂纜車路軌進行試車！
呢個設計嘅第6代山頂纜車，其實揉合咗香港山頂纜車以往唔同時期嘅設計風格，同時又切合返現代「無障礙運輸」嘅世界標準，象徵香港山頂纜車既重視賴以成功嘅傳統亦重視同國際接軌與時並進。
車廂外形結合香港山頂纜車早期接載達官貴人時期嘅樣貌，加上經典嘅「山頂纜車綠色」帶出返香港山頂纜車母公司「香港上海大酒店」旗下半島酒店嗰啲貴賓車嘅高貴格調，正好融合晒香港美好嘅歷史象徵！
瑞士Doppelmayr控股集團旗下Garaventa、CWA、Frey等專業纜車生產商生產嘅第6代山頂纜車除咗每程單向載客量可以由上一代嘅120人加到210人、改善傷健乘客上落車安排之外——第6代山頂纜車唔似第5代山頂纜車咁全部座位都面向山頂，每抽第6代山頂纜車靠山下嘅車廂入面會有22個座位係面向山下嘅，而且相關斜度係有稍為調整，並且加裝放腳踏板，對於一啲唔習慣搭車要坐「倒頭位」嘅乘客，將來落山就可能會感覺舒服啲喇！
根據香港山頂纜車公司嘅講法，第6代山頂纜車會喺2022年夏季投入服務，唔知啟用嗰日乘客量又會唔會過萬人次呢？
最後都係再次提醒返大家，就算香港山頂纜車仲未重新投入服務，但都係千祈唔好亂咁走入山頂纜車嘅運作範圍呀！
3 Trackbacks / Pingbacks