2021年5月20號，香港山頂纜車有限公司宣佈第5代山頂纜車1個月後正式退役，以進行最後階段嘅升級工程，一眾香港人對呢位默默服務香港32年嘅「老朋友」表達不捨之情。
當去到2021年6月27號，縱使落住雨，但都無阻大批想喺最後1日乘搭第5代山頂纜車嘅市民（即係巴士迷術語所謂嘅「送殯黨」）冒雨排隊等候，人龍由臨時月台入口延綿落返去香港公園體育館對開，「打晒蛇餅」——隨著最後一班第5代山頂纜車喺22時由山頂凌宵閣纜車總站駛出，服務香港32年嘅第5代山頂纜車正式退役。根據山頂纜車公司資料，第5代山頂纜車最後服務日錄得超過11,000 乘客人次，山頂纜車衷心感謝乘客一直支持。
山頂纜車公司即晚就安排工程人員，喺6月28號凌晨吊走仍然有特別拉花嘅「白車」。幸好天公做美，吊運過程極為順利，到清晨4點多啲已經完成――如果大家仲有印象嘅話，2021年6月28號朝早返工繁忙時間，香港各區都落暴雨，香港天文台仲要接連發出黃色、紅色、黑色暴雨警告訊號――但當朝第一滴雨其實係喺工程完成，平板貨車撤退之後先至落，套用老人家嘅「迷信」講法，可能真係做得好事多就個天都會幫你？
時間去到2021年11月30號凌晨時份，山頂纜車公司安排工程人員將第1卡第6代山頂纜車吊上路軌，過程順利。
當初香港山頂纜車表示呢一次翻新工程，第一階段由2019年4月23號開始，一直到2019年7月22號；第2階段由2021年6月28號開始，大約維持6個月。
以依家已經吊運第6代山頂纜車上路軌，相信進度就…香港上海大酒店物業部集團總監孫漫天先生喺第5代山頂纜車最後服務嘅嗰日回應查詢「香港人會唔會有『聖誕禮物』？」嘅時候曾經話「好有可能㗎！」——香港人，大家拭目以待啦！
3 Trackbacks / Pingbacks