Alexander Dennis新世代電動巴士嶄露頭角

喺上年年底，Alexander Dennis（下稱AD）公佈咗新世代電動城市巴士系列，包括：中小型巴士Enviro 100EV、中型巴士 Enviro 200EV、兩軸雙層巴士 Enviro 400EV，以及 Enviro 500EV。新系列發佈之後，廠方陸續都收到新車訂單。

AD 噚日就喺Facebook專頁公佈，英國本土巴士公司 Stagecoach 分別訂購 Enviro 400EV 雙層巴士同埋自動駕駛版本嘅 Enviro 100AEV 中小型巴士。Stagecoach 採購嘅 55 部 Enviro 400EV 雙層電動巴士，使用AD 自家「Future-Proof」電池系統，配合高效能電動傳動組件，單次充電可以為巴士提供 260 英里（約418公里）續航里程。而電池擺放佈局亦為下層乘客提供更平整嘅車廂地台。新巴士交付後會於牛津市（Oxford City）同牛津郡（Oxfordshire）投入服務。

Stagecoach 將引入55部Enviro 400EV 雙層電動巴士行走牛津市及牛津郡路線

另外，Stagecoach 旗下嘅 CAVforth2 項目路線亦會引入自動駕駛版本嘅 Enviro 100AEV 中小型單層巴士，行走來往愛丁堡公園（Edinburgh Park）同延長到鄧弗姆林（Dunfermline）之間，一共長 19 英里嘅自動駕駛巴士路線。其中由第四道橋（Forth Road Bridge）到鄧弗姆林延伸 5 英里嘅新路線，更會面對更複習嘅交通環境。該路線現已有 5 部 Enviro 200AV 自動駕駛柴油巴士行走。

Stagecoach亦會引入一部Enviro 100AEV自動駕駛巴士行走蘇格蘭CAVforth2項目路線

Enviro 100AEV 自動駕駛中小型單層巴士，配備 Fusion 嘅 CAVStar® 自動駕駛系統，屬於第四級（Level 4）自動駕駛標準。透過車身內藏嘅感應器同鏡頭，為巴士提供自動轉向、制動同加速。而喺 Enviro 100AEV 投入服務後，車上亦會有經過專門培訓嘅「安全駕駛員」當值，以保障乘客安全。

今日網上流出Alexander Dennis新世代電動巴士系列中第三位成員－Enviro 500EV實車相片

而今日，網上亦流出 AD 新世代電動巴士系列中第三位成員－Enviro 500EV 嘅實車相片。巴士車廂內裝配有九巴標準嘅啡白色 Vogel Revo S座椅，車身以藍色車身示人，而非九巴作為電動巴士代表嘅「電光綠」色。為配合「Future-Proof」電池系統擺放，樓梯擺放位置比上一代 Enviro 500 MMC 巴士為後。相片所見，下層擋風玻璃採用大面積弧形設計，據廠方所指弧形頭幅設計可減少對行人受撞擊時之傷害，提高主動及被動安全性。而 12 米版本上層左右兩則玻璃亦被分成十隻車窗，係 12 米版本 Enviro 500 系列中有史以來最多。其中最前及最後一隻均為較少尺寸，而第一隻車窗下，並未有跟隨設計圖片般向下傾斜，而係採用黑色處理線條延伸性。為配合本港落後交通法例需要，巴士亦未跟隨原有宣傳照設計，使用 SmartVision 電子倒後鏡，而改用九巴款式實體「豬腰鏡」。巴士睇嚟已經完成裝嵌工序，正等侯測試後付運。