「教主」盧瀚霆生日 支持者狂追巴士

香港男歌手、演員、舞蹈員盧瀚霆(Anson LO Hon-ting,外號「教主」),喺2018年5月參加由ViuTV主辦嘅《Good Night Show 全民造星》,成為5位「Eye catching idol」之一,晉身香港男子組合MIRROR嘅成員。佢喺2019年12月《全民造星II》中獲得「專業大賽冠軍」、2020年2月29號推出首支單曲《一所懸命》以個人身份正式出道。

MIRROR成員近月廣受唔少香港妹妹、姐姐、姨姨支持,其中1位成員姜濤喺2021年就曾經有支持者包起香港電車嘅車身同車站廣告位祝賀生日, 到4月30號生日正日仲一齊搭嗰架電車慶祝。

盧瀚霆嘅支持者(外號「神徒」)當然不甘示弱,決定喺2021年6月底開始包起九巴1架雙層巴士嘅車身同埋一啲巴士站、尖沙咀天星碼頭巴士總站側邊(6月25號到7月8號)嘅廣告位祝賀7月7號生日嘅盧瀚霆。

去到6月29號有消息指披上全車身盧瀚霆生日「拉花」嘅九巴雙層巴士(「教主巴士」,車隊編號:ATENU1401,車輛登記:VK8296)會喺下一日出得街,有唔少「神徒」即時計劃點樣可以第一時間去「聞車」。

根據網傳嘅資料,6月30號第一站嘅佐敦(西九龍站)巴士總站一早就已經有一班「神徒」在場恭候「教主巴士」。不過當日雖然跟返原本嘅「字軌表」行車,但最終271號路線去大埔就唔係16:10開車,而係推遲到16:38先至由西九龍站出發。

(©Dennis @ News Insight Hong Kong)

到咗6月30號黃昏放工時間,又有一批「神徒」集結喺中環渡輪碼頭巴士總站,等待「教主巴士」到臨。不過因為「教主巴士」之前嘅班次已經遲咗開車,令到之後行走307號路線嘅時間順延,有部份收工趕到巴士總站嘅「神徒」以為「教主巴士」早咗開車而自己趕唔切,一度焦急咁圍住本台人員查詢。

時間去到19:45,行緊307號路線嘅「教主巴士」終於由民耀街扭入中環渡輪碼頭巴士總站,結束咗一眾「神徒」嘅「漫長」等待。

以下片段係「教主巴士」當晚喺中環渡輪碼頭巴士總站落客時現場一班「神徒」急不及待「打卡」嘅情況:

當然唔少得同「教主」合照嘅時間(^+++^)y

至於呢一位年紀輕輕嘅「神徒」就更加興奮到錄咗一段對「教主」嘅「愛的宣言」(@[email protected]

呢啲場合,又點少得「教主」公仔,同埋一班「神徒」合照呢?

一眾「神徒」仲一齊企喺「教主巴士」側邊,祝「教主」生日快樂!

擾攘咗一輪之後,「教主巴士」就跳咗去行603號路線,喺20:10由中環渡輪碼頭巴士總站開車去平田,有一啲「神徒」仲專誠上一上呢班「教主巴士」,搭3~4個站,感受吓與「教主」同在嘅一程。

以為「神徒」只有第一晚先至咁神心呀?少年…

時間去到7月1號、3號、4號,話說「教主巴士」接連會行途經尖沙咀嘅路線,又遇上係假日,一眾「神徒」當然又空群出動!首先係同喺尖沙咀天星碼頭喺「教主」生日廣告合照先啦!

每當有自發嘅「神徒」活動,又自自然然召集到一大班「神徒」到場,據聞之前令人聞風喪膽嘅「軍政府衛隊」面對「神徒」都即時變到「老鼠拉龜」咁!

朋友叫我筆錄。 今天有fans自發於 3pm派小禮物。但早上11am開始已經有人聚集。1pm有過千人,大部分女孩也穿fan club…

Billie Ng 發佈於 2021年7月3日星期六

嗱,本身九巴1A號路線喺尖沙咀碼頭嘅「車坑」就係車輛通道嚟嘅,但「神徒」表示:「唔會阻到我哋同『教主』合照嘅!」

每次「教主巴士」開車出站,都會有一班「神徒」列隊歡送,引嚟一啲其他族裔嘅香港人喺度猛咁問:「what’s going on?」

是咁的,嚟緊「教主巴士」應該都仲會起碼行到8月24號,呢種追逐「星巴」嘅情景,或許就係一個契機,畀巴士迷圈子以外嘅香港人見到——「追巴士影同追星影咪一樣!」

又或者有啲屋企可以因為「阿媽你做乜學我咁周街跑追巴士影?」而消除咗一啲對「巴膠」嘅隔閡。

伸延閱讀:

3 Trackbacks / Pingbacks

  1. 「教主」生日正日 郵輪巴士齊賀 - 巴士台 HK Bus Channel
  2. 【模型玩具】很想要吧 - Mirror 「教主」Anson Lo 廣告貨車巴士模型 - 汽車台 HK Car Channel
  3. 家有幼女為「神徒」 「教主巴士」追長途 - 巴士台 HK Bus Channel

Leave a Reply

Your email address will not be published.


*