話說之前講到香港男歌手、演員、舞蹈員盧瀚霆（Anson LO Hon-ting，外號「教主」）近月廣受唔少香港妹妹、姐姐、姨姨支持，盧瀚霆嘅支持者（外號「神徒」）決定喺2021年6月底開始包起九巴1架雙層巴士嘅車身同埋一啲巴士站、尖沙咀天星碼頭巴士總站側邊（6月25號到7月8號）嘅廣告位祝賀7月7號生日嘅盧瀚霆。
對於因為新型冠狀病毒（武漢肺炎）搞到無生意好做嘅雲頂香港有限公司，見到「神徒」洶湧追逐同「教主」有關嘅宣傳，旗下星夢郵輪亦加入「戰團」，2021年7月7號出動15萬噸級嘅「雲頂夢號」，喺夜晚20:00到20:30去到杏花邨同小西灣對開海域，利用郵輪船身嘅光影系統，打出一啲祝賀盧瀚霆嘅字句。
今次行動吸引一眾「神徒」去到小西灣藍灣半島海濱，一齊「打卡」，甚至集體唱生日歌祝「教主」生日快樂。
雖然郵輪本身日頭已經提早去到相關海域準備，而半個鐘嘅展示時間聽落又唔短，但15萬噸級嘅郵輪，實際表演時間亦只夠佢喺現場逆時針咁兜個圈，但沿岸嘅「神徒」望見一連串「ANSON LO HAPPY BIRTHDAY」都興奮莫名，一直追影。
至於之前講過嘅尖沙咀天星碼頭巴士總站嘅「教主」生日快樂廣告板，「神徒」一直圍住個廣告板不斷「打卡」。
而云云「神徒」之中，包括有呢位「Mochi」小姐／/( ◕‿‿◕ )＼ （佢恨上鏡到有時會追住啲鏡頭，塞個頭埋去「影我啦！」咁，同工個相機鏡頭被佢個鼻揩到濕晒）
講返架披上全車身盧瀚霆生日「拉花」嘅九巴雙層巴士（「教主巴士」，車隊編號：ATENU1401，車輛登記：VK8296），7月7號全日行1A號路線，每次返到尖沙咀天星碼頭都吸引到「神徒」不斷「打卡」同埋「聞車」——直到23:50開出嘅最後一個「單」，都仍然「未夠皮」。
以為影咗天星碼頭個廣告牌同埋「教主巴士」就走得？少年…「神徒」當然唔會放過附近嘅大廈外牆顯示屏幕，仲有巴士站廣告燈箱啦！佢哋係去到子夜時間，熄燈嗰吓先至捨得走。
話時話，嗰個早幾日想叫人祝佢生日快樂嘅「判官」…
幾時先至有支持者會出巴士廣告賀佢生日吖？
1 Trackback / Pingback