【公益活動】癲噹、叮叮貓齊上電車 宣傳愛協籌款

香港過去多次喺華人世界作為文明先驅,其中喺1903年8月29號,香港成立「防止虐待禽畜會」(防止虐畜會),初期只係一個由義工組成嘅非正式動物福利團體,但已經係華人世界第一個宣揚動物保護嘅民間組織,而當年佢哋係涵蓋埋食用嘅動物。

然而因為第一次世界大戰,防止虐畜會被逼中止運作。其後去到1921年6月23號,香港總督司徒拔爵士協助重組防止虐畜會並擔任會長以及贊助人。

當香港幾十年前畜牧業仍然興盛嗰陣,防止虐畜會推廣過豬隻權益,例如將容易令動物受傷嘅竹籠改用木籠,後嚟甚至為豬隻權益問題同五豐行衝突。另一方面,防止虐畜會亦曾經抗議香港警察亂咁槍殺流浪狗;會方亦為蟋蟀權益而反對廣東人傳統鬥蟀,促成香港立法禁止鬥蟀。

防止虐畜會當然反對廣東人食野味,不過食狗肉就曾經意見分歧――1970年代末防止虐畜會副主席韋伯斯特發表過一篇文章,聲稱「食狗肉無問題」引起內部分裂,有成員因此憤然退會――但係呢次事件無阻1978年防止虐畜會獲得「皇家」銜頭。

1980年代會方推廣一種綠色木製「棄貓收集箱」,箱外寫上「遺棄的動物」, 分為「大貓」、「小貓」兩格,當初喺全香港設立八個,每日有專員專車收集中。當九龍寨城清拆之時,防止虐畜會亦有大規模接收當中被遺棄嘅動物。

去到1980年代末期,防止虐畜會易名為「皇家香港愛護動物協會」,直到1997年因政治原因撤走「皇家」銜頭,成為現時嘅「香港愛護動物協會」(愛協)。

2021年適逢現存嘅愛協成立100週年,喺6月1號到7月21號舉辦「Better meow慈善獎券RAFFLE」活動,為支援推展保護動物權益籌集經費。

呢一次活動有香港本土插畫師「貓室」嘅「癲噹」系列角色、香港電車嘅吉祥物「叮叮貓」做代言,仲得到植根香港超過一個世紀嘅香港電車支持,撥出旗下 #30 電車披上全車身廣告,遊走喺港島區鬧市宣傳。

今次有得喺電車車身上面做廣告主角,「癲噹」梗係要親身出街睇吓自己喺電車上面個「貓樣」啦!(佢好似話:「做乜畫到我咁肥?!」)

意想唔到嘅係,電車車長哥哥見到「癲噹」駕臨,除咗邀請「癲噹」去遊電車河之外,仲介紹畀「癲噹」聽電車車長係點樣揸電車添!

如果大家無被愛協一啲坊間嘅負面消息動搖,繼續想捐款支持吓愛協嘅話,可以去呢個網址揀吓有咩慈善商品啱買。

香港電車除咗支持愛協籌款用嘅商品之外,近日都會出另一件商品,下回詳談。

2 Trackbacks / Pingbacks

  1. 【電車】大富翁開拓財源 發展電車站上蓋物業! - 巴士台 HK Bus Channel
  2. 【香港電車】法國企業入主後多項革新 母公司委任新董事總經理 2022年10月履新 將寫下新一頁 - HK Bus Channel 巴士台

Leave a Reply

Your email address will not be published.


*