【電車】大富翁開拓財源 發展電車站上蓋物業!

話說上回介紹香港電車出動吉祥物「叮叮貓」,連同香港本土插畫師「貓室」嘅「癲噹」系列角色,一齊支持香港愛護動物協會(愛協)籌款,臨尾講到香港電車近日都會出另一件商品…m(。≧エ≦。)m

今次香港電車就同國際知名玩具牌子「孩之寶」合作,推出「香港電車限量版《大富翁》」。遊戲規則同一般嘅《大富翁》玩法無分別,玩家都係鬥買地、起樓、收租…然後搞到對手「破產」――不過重點係「香港電車限量版《大富翁》」嘅「地皮」係香港電車旗下路線嘅電車站…(°ロ°٥)

嘩!香港電車都有「車站上蓋物業」?

真正「納米樓」?!\(●o○;)ノ

(係咪應該搵啲乜乜組織關注吓?)
(©Hong Kong Tramways)

返回正題,「香港電車限量版《大富翁》」另一個特點就當然係有啲香港電車特色嘅棋子,而啲玩具銀紙都印有香港電車嘅公司標誌㗎!

即係咁講,之前香港有另一間集體公共交通工具營運商都出過佢哋公司版本嘅《大富翁》,當時推出嘅係所謂「旅行裝」,曾經被一眾愛好者揶揄係「唔抵、唔夠誠意」…(╯ŏ益ŏ)╯︵(ヽo□o)ヽ

至於「香港電車限量版《大富翁》」喇喎,不如睇吓李文意(My叔)嘅「開箱短片」… ヽ(✿゚▽゚)ノ

相信拎My叔隻手同隻貓做比較之後,大家都知道呢一副賣港幣380蚊嘅「香港電車限量版《大富翁》」有幾大份㗎啦?

至於今次推出「香港電車限量版《大富翁》」,香港電車自己梗係又會有全車身廣告,被揀中嘅就係 #169 電車,以金色車身扮棋子示人(喂~咁似對面海啲ALX車身雙層巴士嘅?)

不過身邊謎之音話:「純粹一撻金色…又真係睇落幾俗氣」 ლ(・´ェ`・ლ)

愛上了 看見你 如何不懂謙卑
去講心中理想 不會俗氣
猶如看得見晨曦 才能歡天喜地…

《歲月如歌》(´>∀)人(´・ω・)ノヽ(・ε・*)人(-д-`)

謎之音繼續話:「如果有人肯買返一副同我玩就好喇!」(´艸`)

仲唔快啲上香港電車個官方網站訂購「香港電車限量版《大富翁》」?(ノ>ω<)ノ

2 Trackbacks / Pingbacks

  1. 【公益活動】癲噹、叮叮貓齊上電車 宣傳愛協籌款 - 巴士台 HK Bus Channel
  2. 【香港電車】法國企業入主後多項革新 母公司委任新董事總經理 2022年10月履新 將寫下新一頁 - HK Bus Channel 巴士台

Leave a Reply

Your email address will not be published.


*