城巴「歐3躉」退役 臨尾塞死獅子山隧道

當城巴喺2021年3月25號傍晚經網絡社交媒體專頁公佈「歐3躉」會喺其後1日作最後服務,去到3月26號自然難免有一眾巴士迷作「最後道別」。

最後2架服役嘅城巴「歐3躉」,車隊編號分別係2312、2314,喺2021年3月26號繼續服務沙田第一城嘅居民巴士服務,包括來往中環嘅88R號路線,以及來往藍田嘅61R路線。

位於中環政府碼頭附近嘅民光街巴士總站,就算係入夜後仍然有唔少巴士迷守候住2位「老人家」,不過相比之前送別「都普躉」,今次就嚟得比較平靜。

而2架巴士嘅車長喺巴士到站後嘅取態有異,2314到站後好快就「熄電牌」,2312就到站後仍然「著電牌」。本台問過2312嘅車長,佢回應話「大家注意安全嘅話,畀大家影得開心,有乜所謂」。

當講到車程,難免巴士上會比較多巴士迷出沒,不過夜晚算係平靜,只係有少數普通乘客上巴士時對「行車記錄員」感到訝異。

鏡頭一轉,去到沙田第一城,現場氣氛就比較熾熱,唔少巴士迷一直喺總站守候,亦有街坊到場打卡留念。

其中2312嘅「電牌」更加插播「Goodbye and thankyou Dennis Trident」以及「Goodbye and thankyou Alexander ALX500」,為2312同埋2314送別。

由於沙田第一城總站緊貼民居,有城巴職員一直舉紙牌提示一眾「送殯黨」保持安靜,成效唔錯。

返到總站大約20分鐘之後,巴士再次踏上路途…

本台收到有投稿係由映月臺附近拍攝,見到城巴「歐3躉」沿窩打老道去獅子山隧道…不過做乜深夜時間獅子山隧道咁塞車嘅?

©Benny

但無幾耐就喺智能電話通訊軟件群組收到噩耗:2312喺獅子山隧道入面壞車!

©Jason Tang

由網絡上流傳嘅照片可以見到,一眾巴士迷對可以喺獅子山隧道管道入面影巴士好似非常雀躍,有俊和隧道管理嘅工作人員到場維持秩序,確保眾人唔好被其他途經嘅車輛撞到。

©途經嘅司機

不過對於想由九龍返新界嘅道路使用者嚟講就真係惡夢,因為2312壞車造成阻礙,獅子山隧道九龍入口喺臨近午夜大塞車,車龍好快就一直伸延到龍翔道雙方向,窩打老道就過咗浸會…真係同享「歐3躉」退休嘅榮耀!

Be the first to comment

Leave a Reply

Your email address will not be published.


*