港鐵公司就將軍澳綫列車「爭啲甩卡」發表報告

港鐵公司喺2023年2月3號公佈2022年12月5號將軍澳綫列車事故嘅調查報告,確認事故成因係列車第6卡車廂中嘅「半永久車鈎」裝置入面1個用嚟固定緩衝器嘅套環鬆脫,引致緩衝器移位。

除咗拆開車卡之間同類車鈎裝置入面嘅緩衝器檢查外,港鐵表示正積極落實報告入面嘅改善建議,包括喺2023年2月底前完成進一步加固全綫列車嘅同類型套環,同時亦要求供應商逐步更換做改善咗設計嘅緩衝器,以及探討使用科技以監測緩衝器嘅情況。

2022年12月5號朝早,1列去北角方向嘅將軍澳綫列車喺即將駛入將軍澳站嗰陣,因為列車第6、7卡車廂之間嘅車間通道有異常伸延,列車故障保護裝置喺偵測到有關情況嗰陣啟動,並且及時煞停列車。將軍澳綫調景嶺來往寶琳及康城站的列車服務一度暫停,去到當日大約中午回復正常。

港鐵表示好重視有關事故,成立咗由外間專家參與嘅調查委員會,搵出事故成因並且提出改善建議。

調查顯示,涉事列車第6卡車廂嘅1個屬於半永久的車鈎裝置入面,有1個用嚟固定緩衝器嘅套環鬆脫,令緩衝器喺車鈎內部結構中移位,車廂之間嘅通道出現異常伸延。事故時嗰2卡車廂之間嘅車間通道仍然連接,列車無偏離路軌。

委員會認爲,套環鬆脫最可能成因係喺原廠生產嗰陣,未有效使用螺絲固定劑(Loctite)喺螺紋上,令到套環唔能夠永久固定,而經多年使用之後令套環鬆脫。港鐵有部分列車嘅車鈎裝置亦使用同類型緩衝器,港鐵表示已經拆開車卡之間同類車鈎裝置入面嘅緩衝器做檢查,確認未有發現任何套環鬆動——2022年12月5號朝早嘅事故係港鐵列車上首次出現嘅個案。

就車鈎裝置,港鐵表示有既定維修制度做恆常預防性檢查,亦有進行定期大修。由於緩衝器係專屬設計,因此由緩衝器製造商大約每九年進行一次大修,事故緩衝器喺最近一次2018年進行大修時未有發現任何異常。委員會認爲港鐵有按車鈎裝置供應商特定要求,安排緩衝器原廠大修。

港鐵公司車務總監李家潤博士表示:「就將軍澳綫事故,我哋會按照委員會嘅建議作出改善,包括按緩衝器製造商建議,為車鈎裝置入面同類型緩衝器嘅套環加裝2個定位鎖銷,作額外加固。公司亦要求車鈎供應商逐步更換這些緩衝器,以一款唔需要用套環嘅設計替代,以及同供應商探討運用科技等工具監測緩衝器嘅運作情況,以作適當預防維護。而就事故嘅成因,公司會跟據合約向有關方面作出跟進。」

委員會認為事故嘅處理以及恢復服務嘅工作暢順以及有序,當日車上乘客喺職員帶領下,沿路軌安全步行到將軍澳站月台。

港鐵表示會按委員會建議,提升事故期間車站嘅乘客資訊發佈,以及檢討免費接駁巴士路綫安排。

李家潤博士補充:「確保鐵路安全一直係港鐵嘅首要任務,現正進行嘅資產管理全面檢討會研究港鐵可作提升嘅地方,確保港鐵可持續為乘客提供安全、可靠以及高效嘅鐵路服務。」

Be the first to comment

Leave a Reply

Your email address will not be published.


*