香港、中國恢復通關 跨境巴士重投服務

因為新型冠狀病毒(武漢肺炎)嘅「疫情」,嚴苛嘅檢疫政策令香港同外地「封關」多時。然而隨著各地官方都放鬆旅客入境檢疫規限,香港亦陸續開始同其他地方多返旅客交流。

澳門聖誕節前已經恢復通關

其中喺2022年聖誕節前,澳門政府已經宣佈調整由香港、台灣同埋外國入境澳門人士嘅防疫措施,入境毋須進行落地核酸檢測,港澳快線隨即宣佈由2022年12月24號起恢復香港←→澳門(經:港珠澳大橋)嘅班車服務。

香港政府突然宣布同中國恢復通關

香港政府2023年1月5號宣布,經過同中國中央以及廣東省、深圳市政府溝通協調並達成共識,並獲得中國中央批准後,香港同中國由2023年1月8號開始分階段有序恢復兩地人員正常往來,以逐步、有序、全面實施通關。

通關第1階段由2023年1月8號實施,涵蓋已經運作嘅香港國際機場(香港往返中國航班)、港珠澳大橋、深圳灣口岸,以及重開嘅港澳客輪碼頭、中國客運碼頭、文錦渡口岸同埋落馬洲支線/福田口岸。

港鐵恢復有限度跨境列車服務

港鐵表示,落馬洲站喺2023年1月8號重開,東鐵綫提供來往金鐘以及落馬洲站嘅列車服務,0930 ~ 2000 維持4 ~ 8分鐘一班;其他時段維持5 ~ 14分鐘一班,但羅湖站繼續關閉。

跨境巴士恢復服務

香港各間提供由香港到中國多個口岸以及城市嘅跨境巴士服務供應商,都齊齊喺2023年1月8號朝早開始恢復提供由香港出發往中國或者由中國返回香港嘅跨境巴士服務。

其中「中旅巴士」2023年1月8號朝早喺位於九龍太子砵蘭街363號中旅閣C、D舖嘅香港中旅社太子分社舉行「中旅巴士復班首發之旅」活動。

朝早7點幾,太子砵蘭街363號中旅閣對開早就已經有一大班網上訂咗跨境巴士車票嘅乘客排隊等候,「中旅巴士」派出多名職員協助乘客兌換實體車票,旺角警署亦都一度派出2架警車載住幾名警員到場視察以及維持秩序。

如果係購買咗2023年1月8號由太子開出嘅「中旅巴士」跨境巴士「頭班車」車票嘅乘客仲會獲得「紀念車票」以及「禮賓券」,乘客憑券可以喺2023年12月31號或之前去到「中旅巴士」相關嘅票務處問兌換1張免費乘車票。

同一時間,乘客喺換領咗實體車票之後,職員會邀請乘客去「題字板」上面簽名以及拍攝「即影即有」照片留念,而且仲可以去到「頭班車」嘅車頭同道具板合照。

除咗以上講過嘅優惠之外,購買咗2023年1月8號由太子開出嘅「中旅巴士」跨境巴士「頭班車」車票嘅乘客,可以搣咗個票尾擺入去抽獎箱參加「中旅巴士幸運星」大抽獎…

中獎者可以由2023年1月去到12月31號,全年免費任搭「中旅巴士」旗下所有路線,據「中旅巴士」所講,呢個獎品總值大約係10萬蚊港紙。

不過係抽獎嘅過程之中就發生咗一啲小插曲…

雖然嗰位姓李嘅中獎者一直都坐喺抽獎枱前面,大抽獎之後要輾轉一番,先至發現原來佢自己係中咗獎㗎!

講返「中旅巴士復班首發之旅」,「中旅巴士」一早就已經準備好2架MAN RR2型旅遊巴士:

  • 1號車:998 / UY9808 / 粵Z CB60港
  • 2號車:977 / UG3023 / 粵Z CB46港

負責揸1號車嘅車長司機仲非常開心,表示希望咗好耐可以有正常嘅工作,好開心能夠做返本行,喺乘客排隊上車嘅時候佢仲主動幫手安放好行李。

隨著一眾嘉賓喺「復班首發班車」前面拉起綵帶合照,「復班首發班車」嘅1號車喺0806時衝過綵帶,象徵「中旅巴士」重新提供跨境巴士服務。

隨著「中旅巴士復班首發之旅」起步儀式完結,2架MAN RR2型旅遊巴士就喺0812時、0816時分別由太子站頭開出,代表著「中旅巴士」正式恢復香港跨境巴士服務。

另一邊廂,「中旅巴士」亦都將流動票務櫃檯推返去毗鄰嘅旺角維景酒店側邊,自此「中旅巴士」正式全面恢復喺太子站跨境巴士嘅配套服務。

而同樣喺砵蘭街作為太子站頭嘅「環島大陸通」,亦都喺2023年1月8號朝早重新投入服務。雖然佢哋公司都有安排拍攝人員記錄「頭班車」,但係據佢哋嘅職員所講,佢哋揀咗喺深圳灣口岸舉行儀式,太子站頭就一切從簡喇!

至於喺呢一小段砵蘭街街尾嘅「深華粵海」,佢哋就更加低調,默默開出咗「頭班車」,可能咁啱佢哋嘅開車時間比較早,相對乘客量就比前兩者少咗啲。

喧鬧背後

臨埋尾可以講返喺太子呢一個跨境巴士站恢復服務朝早,發生咗一啲小插曲:

首先頭班車時間定係朝早7點、8點嘅時間,而唔少傳媒朋友要等到過咗9點先至到場,所以佢哋係錯過晒成個「中旅巴士」嘅正式「中旅巴士復班首發之旅」活動儀式。如果大家喺其他傳媒報道入面見到「榮利」嘅旅遊巴士以及相關職員出現喺「中旅巴士復班首發之旅」嘅道具板合照——其實嗰班車唔係「中旅巴士」嘅首航嚟㗎!

(呢個情景係喺真正首班車走咗之後一輪先至出現㗎!)

另一方面,「中旅巴士」喺面對「封關」,無辦法提供跨境巴士服務嘅時候,佢哋就聯同母公司集團旗下嘅旅行社舉辦咗一啲香港本地遊,使用返原本用喺跨境服務嘅旅遊巴士…

結果…嚟到恢復跨境巴士服務嘅時候就出事喇!

就係呢個啱啱恢復跨境巴士服務嘅朝早,有買咗跨境巴士車票嘅乘客,咁啱遇上2班本地遊嘅「中旅巴士」旅遊巴士停喺太子站頭,佢好順理成章咁跟住一班人一齊上咗旅遊巴士,當然結果就既自己上錯車,又被職員話佢做乜唔自己睇清楚啲先(按:咁對一般人嚟講,旅遊巴士車頭嗰張分辨路線嘅通告紙又無貼好,呢啲旅遊巴士車身色彩又一式一樣,對個乘客嚟講真係好難靠自己一立眼就分得到。)

但重點係…嗰位乘客喺落車之後一開口就對住職員話「hi auntie」,咁就真係過份咗啲嘅,好彩好快有其他乘客上嚟勸交,「第一回合」未開始就已經完結咗。

至於同一日發生嘅另一件驚人事件,大家可以留意汽車台之後嘅報道。

1 Trackback / Pingback

  1. 同中國通關:跨境巴士九龍鬧市逆線大暴走 - HK Car Channel 汽車台

Leave a Reply

Your email address will not be published.


*