【九巴202】早前公佈話取消 依家又話暫緩了

隨著蘇屋邨完成重建,加上東京街同荔枝角道交界嘅麗翠苑落成入伙,運輸署喺《2019-2020年度巴士路線計劃》建議九巴由2號路線抽調用車,開辦由蘇屋邨開出,經李鄭屋邨、麗翠苑,往返旺角嘅特快巴士路線,路線編號定為202,以循環線形式,去程去到東京街就轉上西九龍走廊直出旺角維景酒店,然後經西洋菜南街(旺角站)、亞皆老街(前旺角街市)、深旺道(奧運站)一帶,再經連翔道去東京街,然後用2號路線嘅走線返回蘇屋邨。

當九巴202號號路線終於喺2019年12月16號開得成,當時就話條巴士路線會以聯合派車嘅方式,合共有11架巴士運作,實際運作而言,某程度上就即係202號路線會由2號路線抽調2架巴士行走。

然而因為由蘇屋一帶來往旺角一帶一向有另外一啲常規巴士路線可供選擇,以九巴呢一條202號路線嘅班次密度嚟講,每日絕大部分嘅運作時間都只係維持30分鐘一班,刻意等佢就真係好嘥時間,結果一直以嚟乘客量都非常低。

根據運輸署喺2022年2月提交嘅《2022-2023年度深水埗區巴士路線計劃》以及《2022-2023年度油尖旺區巴士路線計劃》,九巴202號路線乘客量持續偏低,運輸署所引述嘅資料顯示,九巴202號路線喺最繁忙1小時嘅載客率只有8%,每日乘客量平均只有大約380人次——根據運輸署所謂嘅指引,九巴202號路線呢啲繁忙時間維持超過15分鐘先至有一班車、非繁忙時間維持30分鐘一班嘅巴士路線,如果最繁忙1小時嘅載客率少過50%,基於有替代路線,運輸署會建議取消。

如是者,九巴原本安排202號路線由2022年7月18號開始取消服務,相應地九巴2號路線會因為咁而削減2架用車。為咗配合202號路線被取消,當局建議乘客可以轉乘替代路線,例如九巴2號路線,而九巴31B號路線增設發祥街到奧運站之間嘅分段收費,務求令到乘客乘搭相關路線會同原本202號路線嘅車費相同。

暫緩【九巴202停運】 事宜 睇圖啦,唔想打字。 #暫緩 #另行通知 #KMB #九巴 #蘇屋 #旺角 #蘇屋邨唔係IvySo條邨 。。。。。。。。。。。。。。。 #snapshot #hongkong #慢活細看 #呆看一分鐘…

Posted by 李偉峰 Leewaifung on Friday, 15 July 2022

事情去到2022年7月15號,身為交通運輸及房屋事務委員會主席嘅油尖旺區議員李偉峰表示,運輸署致函油尖旺區議會,表示運輸署考慮到地區人士提出嘅意見之後,決定暫緩落實取消九巴202號路線,直至另行通告。

2022-07-12 星街彗星四周年!主題巴士しゅしゅしゅ~ by 星街彗星四週年生日應援企劃 of 香港虛擬偶像應援企劃組 #hkvidolfans 終於影到「出走」,仲要係幾日後就會取消嘅 KMB 202號路線 😉 #すいせいバス #星街すいせい #星街すいせい4周年 #星街すいせい生誕祭 #hkvtuberbus (按:九巴喺2022年7月15號又致函區議會話暫緩取消202號路線喎)

Posted by 與鈞同行 / Walking with TK on Tuesday, 12 July 2022

究竟今次九巴202號路線會唔會長時間都死唔去呢?

大家真係要拭目以待喇!

1 Trackback / Pingback

  1. 【九巴202】彈出又彈入 運輸署究竟係唔係真係決定要取消佢㗎? - HK Bus Channel 巴士台

Leave a Reply

Your email address will not be published.


*