「教主」生日免費搭車船 再加第3架「教主巴士」登場 結果搞到警方「老鼠拉龜」!

香港男歌手、演員、舞蹈員盧瀚霆(Anson LO Hon-ting,外號「教主」),喺2018年5月參加由ViuTV主辦嘅《Good Night Show 全民造星》,成為5位「Eye catching idol」之一,晉身香港男子組合MIRROR嘅成員。佢喺2019年12月《全民造星II》中獲得「專業大賽冠軍」、2020年2月29號推出首支單曲《一所懸命》以個人身份正式出道。

之前講過,大大個「盧瀚霆國際後援會」會搞啲比較有規模嘅活動,重頭戲就喺2022年7月7號上演!

話說「盧瀚霆國際後援會」揀咗喺2022年7月7號舉辦咗免費乘搭車船嘅活動,其中包括請所有使用有效八達通卡或相關產品繳付車資嘅長者,免費乘搭九巴所有獨營路線班次。

為咗隆重其事,「後援會」本身已經喺九巴嘅1架12米版本富豪B9TL型雙層巴士(車隊編號AVBWU76,車輛登記PV4366)出咗一個喺「門位」嗰邊嘅車身廣告。

去到免費乘搭日嘅正日,九巴都喺巴士車頭放咗「Anson Lo盧瀚霆7.7.2022請65+長者搭九巴」嘅宣傳牌,而且喺巴士嘅電子路線牌上面顯示出「ANSON LO 7/7 請長者搭」嘅字眼。

不過留意返,呢一次長者免費乘車活動會以「先付款,後回贈」方式進行。長者乘客需要上車時照樣用八達通卡「拍卡」,之後喺2022年7月18號到8月14號期間再經由八達通App或者去八達通服務站領取返畀咗嘅車資。

同一時間,後援會都請所有香港人——不論男女老幼——免費乘搭天星小輪旗下,來往尖沙咀以及中環嘅渡輪航線。

其中喺尖沙咀九龍角嘅天星碼頭,前往中環嘅嗰一邊碼頭,不論係樓梯、牆壁、廣告牌,以至代幣售賣機以及入閘機,都貼有「教主」相關嘅佈置。

一眾「神徒」當然就要周圍「打卡」留念,有唔少仲選擇喺朝早6~7點,未到朝早返工繁忙時間嗰陣,就已經去到碼頭搵呢啲布置合照——可以話比平時返工搵食更有神心

大家都明白到7月頭呢種時間,正正會遇上當局所謂慶祝香港特別行政區成立嘅週年紀念,但相關嘅官方廣告,面對「教主」生日嘅慈善活動自然黯然失色!

當過到去中環嗰一邊嘅天星碼頭,當然同樣唔會少得呢一啲有關「教主」嘅佈置,不過因為碼頭建築嘅設計有所不同,睇落成個設計就係另一種風味喇!

「後援會」搞「天星小輪免費乘搭日」,當然就唔會咁簡單純粹只係喺兩邊碼頭貼一堆「教主」嘅肖像,佢哋仲準備咗一啲襟章同埋貼紙,派畀乘搭天星小輪由尖沙咀去中環嘅乘客

而上到去天星小輪嘅渡輪上面,各個廣告位都換成咗「教主」有關「天星小輪免費乘搭日」同埋歌曲《KING KONG》嘅宣傳海報——有唔少非華裔乘客對此感到驚訝,以為「教主」係政要,做緊選舉宣傳

一眾「神徒」面對「教主」生日宣傳品,個個都開心到爭住影相「打卡」,不論係自己同「教主」嘅宣傳品合照,定係攞埋「自己個仔」出嚟合照,往往都一人發起、眾人和應、齊齊參與

大家睇下:

一個、兩個…去到一堆「阿仔」一齊企晒喺度合照呀!

講返陸上嘅情況…就喺2022年7月7號嘅呢一日,第3架2022年版嘅「教主巴士」亦都喺呢一日嘅黃昏出街,令到尖沙咀天星碼頭巴士總站企滿「神徒」!

當諗到巴士總站後面嘅LED電子顯示屏,仲係播緊嗰一個「教主」嘅動畫廣告同埋MV,加埋各路人馬喺度派發應援物品,大家都會明白當時喺尖沙咀天星碼頭巴士總站係幾咁「群情洶湧」。

面對這種情況,自然會有傳媒捉住一啲「神徒」接受訪問,同一時間《信報》又推出咗海報,一直擺喺尖沙咀天星碼頭巴士總站側邊嘅報紙檔,掛出咗「神徒」必備、「教主誕」嘅推廣字眼,相信佢都難得可以賣得出咁多份《信報》㗎喇!

是咁的,喺芸芸「神徒」之中搵到佢…

你好呀!你唔好見到我戴著有「神徒」標記嘅頸巾就當我都係「神徒」啦!

其實我「媽咪」先至係「神徒」呀!

我只係受訓學習緊嘅導盲犬,不過今次有咁多姨姨嬸嬸喺度,都算係一次機會畀我學吓面對人群,對我將來畢業正式做導盲犬,帶領視障人士去搭車搭船都好有幫助㗎!

相信大家唔使講都會知道,近年每當有人群聚集,香港警察就如臨大敵咁樣,面對咁多「神徒」聚集喺尖沙咀天星碼頭當然唔會例外。

就喺臨近黃昏放工時間,香港警察就調動咗一大批警力到場,試圖利用《預防及控制疾病(禁止聚集)規例》驅散現場嘅一眾「神徒」,結果…

警察有警察嗌咪,「神徒」有「神徒」繼續佢哋嘅活動,警方反而被「神徒」嘅氣場驅趕到巴士總站嘅行車路上面!

最終警方唯有走入巴士總站嘅站長室,套取「教主巴士」嘅到站以及開出時間,安排人手喺相關時間拉起封鎖線,話要保障各位「神徒」嘅安全喎!但由生得比較高嘅警員拉起膠帶,當然結果就搞到一啲生得比較矮嘅「神徒」不滿啦!期間仲要嘈起上嚟㖭!

最後就要講下,其實除咗「後援會」安排咗長者免費搭九巴、全體市民免費搭「尖沙咀←→中環」天星小輪航線之外,呢一日其實仲另有歌迷組織都安排咗市民可以免費乘搭喺中環嘅摩天輪,唔好諗住免費就揸流灘呀!你肯排隊嘅話,除咗可以喺摩天輪轉3個圈之外,仲會得到特別設計嘅門票㗎!

臨尾講多少少:

2022年教主生日,「後援會」仲舉行咗1個慈善活動,乘客只要喺巴士上掃描1個二維碼,後援會就會捐出1蚊畀指定嘅慈善機構,合共會有10個慈善機構受惠:

  • 伸手助人協會
  • 無家者同行
  • 庭恩兒童中心
  • 拯救貓狗協會
  • 阿棍屋
  • 大樹下
  • Paws United Charity
  • 綠領行動
  • 長春社
  • 環保觸覺

咁究竟MIRROR 12子將來再生日之時,各個「後援會」仲會有咩活動搞得出嚟呢?大家就拭目以待喇!

Be the first to comment

Leave a Reply

Your email address will not be published.


*