九巴比亞迪B12A電動單層巴士投入服務

綠色運輸已經成為國際大趨勢,作為亞洲國際都會嘅香港都無可避免要接受環保嘅洪流。香港政府喺2021年10月發佈《香港氣候行動藍圖2050》,重申支持電動巴士同電動商用車喺香港試用。而香港最大專營巴士服務營辦商-九巴,為咗配合推動「綠色運輸」,較早前就向中国以及英國嘅巴士製造商分別訂購咗 16 部電動單層巴士,以及 52 部電動雙層巴士。

九巴於 2020 年 8 月以招標型式向比亞迪訂購 16 部電動單層巴士

其中 16 部由中国比亞迪設計同生產嘅 B12A 電動單層巴士,已經喺較早前經由陸路陸續運抵香港。由於巴士車長身度達 12.13 米,稍長於香港法例下有關巴士標準車身長度,所以要先得運輸署批准方投入服務,而九巴亦希望將寧靜同「零排放」嘅電動巴士投放喺較繁忙路段,因此最後得運輸署批准喺2022年4月25號開始率先喺來往尖沙咀碼頭同荔枝角嘅 6 號路線投入服務。喺首航之前,九巴中午前就喺尖沙咀碼頭舉行記者招待會,簡介新車資料同解答記者問題。

全新 B12A 電動單層巴士於 2022 年 4 月 25 日下午三點半首航 6 號線

新巴士車隊編號為 BEB,車身採用「電光綠」色塗裝,九巴稱顏色代表「邁向電動化嘅綠色新時代」。而車廂內部就以灰色及白色作主色調,配上廣為九巴採用嘅 Vogel Revo S 座椅,連同企位全車可以載客81人,比現役嘅 K9R 電動單層巴士多出 16%。除咗動態乘客資訊系統外,車內仲提供免費 5G WiFi 服務。而全新 B12A 電動巴士電池除配備水冷系統外,亦採用一套全新「電池管理系統」,可以實時監察電池狀態同效能。動力方面繼續使用比亞迪嘅輪轂摩打,直接驅動尾轆行駛,減少波箱直濕等組件,提供更大嘅車廂空間。而電池續航力有 200 公里,只需要 1 個鐘頭 40 分鐘就可以充滿,比 K9R 快達兩個鐘,車頂亦設有 2mm 厚嘅太陽能光伏板,為車內裝置提供電源。

九巴全新 B12A 電動單層巴士,充電插頭位於巴士左邊車尾
九巴助理總監(策略規劃)梁領彥先生(中)及傳訊及公共事務部主管林子豪先生(右)於記者會上解答記者提問。
新巴士車廂內以白色及灰色為主色調,低地台區設有四個「關愛座」
電池擺放位置有所更改,前軸輪拱上不再出現「大衣櫃」
九巴比亞迪 B12A 電動單層巴士駕駛室及儀錶板(相片由 Michael Ching 拍攝及授權使用)

除單層巴士外,九巴亦分別向比亞迪及 ADL 訂購共 52 部電動雙層巴士。兩款新車均充電 兩個半鐘,就可以行駛約 300 公里,其中比亞迪產品更會使用車廠引以為傲嘅「刀片電池」。兩款新狡預計下年令運到港,令九巴車隊中電動巴士數目增至超過 80 部。同時為咗配合九巴喺 2025 年引入 500 部新能源巴士嘅目標,九巴將會陸續喺五間車廠、十個衛星車廠以及部分巴士總站加建充電設施。而未來四至五年將計劃於屯門同大埔興建兩座多層電動巴士車廠,提供合共 850 個快速充電巴士泊位。

於深圳行走的比亞迪 B12D 電動雙層巴士(相片由 Fung 拍攝及授權使用)
延伸閱讀︰ADL為香港生產首批電動雙層巴士

3 Trackbacks / Pingbacks

  1. 九巴新一代比亞迪B12A型電動巴士到訪筲箕灣 - 巴士台 HK Bus Channel
  2. 九巴:比亞迪B12A會加入14B號路線 - 巴士台 HK Bus Channel
  3. 九巴電動巴士首航安泰邨 乘客獲贈證書 老嫗不適送醫 - HK Bus Channel 巴士台

Leave a Reply

Your email address will not be published.


*