踏入2022壬寅虎年 短述交通機構賀歲品設計

2022年2月1號正值陰曆正月初一,坊間一般而言都代表著新年伊始(黃道就應該計立春),巴士台仝人謹此祝願大家壬寅虎年生活美滿,好運齊來。

每逢到到農曆新年,香港幾間大型公共交通運輸機構都會推出一啲相關嘅廣告同產品,巴士台就趁住今日呢一個日子同大家搵咗其中幾款出嚟比較下。

匯達交通服務(新巴 / 城巴)

持有新世界第一巴士同埋城巴兩間專營巴士公司全部權益嘅匯達交通服務,以「虎虎生豐 路路亨通」為題,喺旗下2間巴士公司各搵咗1架12米版本嘅富豪B8L型雙層巴士做2022壬寅虎年嘅生肖巴士:

  • 新巴(5230 / WN2615)
  • 城巴(8807 / WP1057)

今次嘅巴士車身生肖「拉花」同往年比較,可以話係「令人震驚」,業內以至巴士迷界都認為呢一個設計「非常醜樣」。

首先要講巴士車身上面嗰隻老虎,圖案選用嘅係黃膚色配上多元顏色嘅斑紋,某程度上都反映咗西方世界對香港人文化嘅「刻板印象」。如果細心留意老虎圖案上面嘅兩隻前腳,睇落並唔協調——有巴士迷笑言:「如果真係有隻咁嘅老虎,一係佢就四肢畸形,一係就步姿有問題,日日行路都會仆親。

(©TK、H.K.)

至於呢個虎年生肖拉花另一個令人「哭笑不得」嘅設計,就係將個拉花覆蓋埋原本嘅黑色窗框位置,表面上應該就係為咗增加全車紅色主調嘅喜慶色調,但走出嚟嘅效果就變到「成架巴士好似某啲國家生產嘅廉價玩具一樣」

至於匯達交通生肖巴士嘅周邊產品,就包括有利是封同埋揮春,話就話當乘客搭中咗佢哋旗下嘅生肖巴士就可以免費自取…

(撮自巴士車長通訊群組)

但係巴士台收到唔少乘客反映:

「相就有見過喇~實物就真係搭咗咁多日巴士都未見有出現過!」

可能大家唔好彩啦!

嶼巴

簡稱「嶼巴」嘅新大嶼山巴士,以「瑞虎豐年 龍精虎猛」為題,搵咗1架亞歷山大丹尼士Enviro400 歐5 Facelift型雙層巴士(AD04 / VR286)做2022壬寅虎年嘅生肖巴士。

嶼巴今次嘅生肖巴士設計上以「像素藝術」為本,喺巴士車身上畫出多個老虎、腳印、吊錢、元寶等圖案,旁邊祝福語句亦係用上相同風格,加上粉紅底色同埋代表山嶺嘅綠色背景襯托。

(撮自巴士車長通訊群組)

只不過呢多年嚟嶼巴嘅生肖巴士往往又唔會日日出動,如果你要山長水遠去捕捉佢,或許都要一啲運氣!

除咗呢個咁有藝術特色嘅生肖巴士車身「拉花」之外,仲推出埋「嶼巴 x Network Shuttle 限定揮春」,只要去到Network Shuttle門市作任何消費,就可以換領2張,數量有限,先到先得。

九巴

九巴就揀咗以「虎星高照」為題,搵咗1架11.3米版本亞歷山大丹尼士Enviro500 MMC型雙層巴士(E6M71 / WW3308)做2022壬寅虎年嘅生肖巴士。

九巴號稱以老虎「橙」色為主調,配以「活潑生動」嘅老虎頭像,寓意香港人可以喺新一年福星高照,猶如老虎般精力旺盛,鬥志昂揚。

(©TK)

九巴同時推出咗寫有「虎星高照」、「龍精虎猛」字句嘅揮春喺各區巴士總站同埋客務站派發,另外仲有以生肖巴士車身「拉花」為本嘅利是封,乘客可以用「club1933會員積分」去相應客務站換領。

(©巴士台編輯部)

只不過是咁的…先唔講用「福星高照」嘅普通話讀音玩「食近音字」係咪又一種「消滅本土」嘅惡行,單係用香港本地話讀「虎星高照」會得出「苦聲…」,而利是封兩邊巴士車身圖案貼實條邊,令到打開利是封時出現「兩架巴士兜頭相撞」,都不禁令香港人覺得:

新年喎…咁「唔老利」(音:唔老黎)?

香港電車

紮根香港超過1個世紀嘅香港電車,一直係香港嘅重要特色,佢哋就揀咗同「以美學交流為中心」嘅平台自媒體《Now Loading 載物》合作,以「叮叮發財 虎虎生威」為題,搵咗#165電車做2022壬寅虎年嘅生肖電車。

(©TK)

今次嘅生肖電車色彩繽紛醒目,車身上有「戴咗老虎仔頭套嘅『叮叮貓』」同埋「戴咗『叮叮貓』頭套嘅老虎仔」,配以元寶、吊錢、燈籠、大桔等農曆新年圖案,行走喺港島北岸鬧市令人倍感氣氛。

香港電車今次搵到重視美學之人合作,當然唔只得電車車身「拉花」,佢哋仲推出咗一系列新年商品,包括揮春、利是封等,早前已經喺多區嘅pop-up市集發售,反應理想。

(©巴士台編輯部、TK)

即係咁講:

好似配搭得最靚係電車喎!

港鐵

呢個純粹「搭單」講嘅,港鐵除咗隨新年賀卡寄畀特定組織嘅「暢旺PROSPERITY」利是封之外,另外係有1款福字利是封派發畀參觀「東涌綫延綫」介紹嘅參觀者,設計就…

(由「住喺東涌嘅日本消防員」提供)

除咗個「福」字就有埋「東涌綫延綫」幾隻字咁囉!算係緊跟傳統啦!

睇完今篇簡單介紹過嘅幾個設計,唔知大家係覺得「幾好吖」定係「咁都得」呢?

Be the first to comment

Leave a Reply

Your email address will not be published.


*