樂於偷圖呃LIKE嘛?原圖擁有人終極攬炒

偷相呃LIKE 終出事 John Lidstone 移除所有古舊香港巴士相片

Photo by Donald MacRae
(打呢幾隻字好難咩??)

近日巴士迷圈子 (主要可能係較年長嘅老一輩) 熱門話題就是一位英國的資深「巴膠」John.G. Lidstone 在無預兆下一次過將佢上載响 Flickr 嘅所有1983-1985年期間香港、澳門嘅巴士相片全部刪除,並在有關嘅相簿貼上一張聲明,指因為持續的「不合法地下載然後重新上載到 Facebook 等社交網站的偷相行為嚴重侵犯版權並感到不受尊重」故此將永久刪除所有相片。聲明末句「另向懂得真正欣賞及尊重本人的努力的人士致歉」。

事件引起嘅迴響唔細,事關阿 John 曾經上載發佈嘅相片唔止年代久遠,拍攝到嘅巴士車款相當多,而且絕對唔係「標準相」,記錄巴士車款之餘仲有當時嘅地景、建築物,唔少「老鬼巴膠」為此感到可惜。

編輯部透過電郵嘗試聯絡 John Lidstone,慶幸亦收到回覆。佢表示「偷」已經好唔滿意,而且被偷嘅次數以百計,絕大部份「匪徒」repost on Facebook 加上嘅描述係中文 (雖然睇唔明寫乜,但知道係中文),佢認為香港人對知識產權毫不在意;莫講話版權費,打幾隻字 quote source 都無,甚至 blur watermark,感受到好大唔尊重。而又因為唔識中文,加上 Facebook 嘅所謂申訴機制係廢,而「偷相」嘅情況有急速惡化趨勢,唯有全部鏟走免後患。

回覆另有提到,明白好多有心人感到可惜,但既然偷相嘅人沒有羞愧之念,因此再無打算重新在網上發佈。我們有問佢會否考慮實行「會員制度」或參考 Reuters、Associated Press 等通訊社嘅做法,John 並未有直接回覆,只重申唔會再 upload 上網。

唔止巴士迷,對於阿 John 刪除相片嘅決定嘅反應走向兩極,一極係表示尊重,甚至認同 (再甚至乎有支持),另一極係「刪咪刪囉,無得睇咪算囉」,甚至「好巴閉咩,偷你啲相即係睇得你起咋」,更當然唔少得「擺得上網預咗俾人偷㗎啦」

不論是否巴士迷,不論反應係邊一極,先問一句是否懂得「逆地而處」呢四個字?
唔明就講白啲:「如果被偷相嘅係你的話,你會有乜感受?」

無錯,陳年遠古香港巴士相,响 flickr 起碼仲有一位 Mega Anorak,而且車種、拍攝地點比阿 John 更多更精彩,例如尾梯一人控制版「丹拿C型」;响「荃灣西約」拍攝到二手AEC BD5123, BG6793,二手 Daimler CVG6 rebody 單門版 AD7484 行走52號線更係我嘅童年回憶

或是 BEDFORD SB5、UD4「二衝程」旅遊巴,可謂至今在網絡所見極之罕有嘅作品。但在歷史記述以至文化研究層面,任何人任何一張相片 (或影片),都有其獨特意義同價值,唔可能做對比。

想當年,真係想當年「又真係八十年代」…
單反?我慶幸老頭有少少錢,屋企有部 Nikon FE 一枝 Tamron 35-135 f3.5-4.3,之後再多一枝 Tamron 70-210 f3.8-4.5。
當年一部傻瓜機平極都五六百蚊;一筒36張135菲林十幾廿蚊,沖晒又幾十蚊…… 老土且市儈啲講,張張都係錢。莫講今時今日伸手問老豆老母攞錢買枝長炮係咁有理無撳快門影標準相「曬命」 and 有人阻有車阻就「屌人老母」(抱歉,要直出粗口字先至夠傳神) 嘅嗰啲梗係唔會明「張張都係錢」嘅道理,就是熱衷「相機食先」、搭飛機閘口打卡嘅,即使閣下已經年近或年過半百,仲有印象想當年去外地旅行都因為「晒相錢」而就住就住咁影嗎?

我响 London Victoria Station 出面影的

再者,不論 John 定 Anorak 定邊一位「鬼佬」,都係要搭飛機嚟香港先至拍攝得到呢啲相片。想當年「又真係八十年代」,唔好話倫敦-香港 來回最便宜都要四千銀 (係當年嘅嘅四千,唔係依家嘅四千),就算香港-台北來回國泰或華航嘅票價都要 $1600 (無錯,銀碼幾乎四十年不變),日本亞細亞航空「團飛」都要 $1200。但無論响邊一個時空,你响外國影到嘅相俾人「偷」的話,你唔會想問候人哋娘親?

我响台北市府轉運站出面影的

响「巴士台」呢度,我唔想花太多篇幅去探討「呃 LIKE」風氣如何形成,但可以肯定「偷相」就係由「呃 LIKE」風氣所催生出嚟,因為「呃 Like」嘅嗰一刻嘅亢奮,就促使食髓之味。更重要嘅基礎問題根源就係不論偷相「呃LIKE」或者被「呃LIKE」嘅都係對「知識產權」無感,唔會諗別人影呢張相背後所付出嘅時間、心血、金錢。

另外,正如 John 嘅回覆提到「打幾隻字 quote source 都無」,真的想問一句相對於「網上圖片」「原圖來自_____」係咪真係咁 L79H 難打?再又相反地問,假若有日不幸地有交通意外而你湊巧路過現場影到張獨家相擺咗上 Facebook,然後「因販運海洛英被通緝而潛逃到台灣並最後客死異鄉且骨灰無法運返香港嘅馬惜珍所創辦的東方日報」唔該都無聲就偷咗去而「網上圖片」,what will your seven feelings??

John 今次「斬草除根」,個人同編輯部眾人嘅意願唔係期望 John 回心轉意 upload 返晒啲相,而係希望香港人真係會從今次事件有所反省。如果唔係,難保其他人重演同類行動。而又「政治化」的一句:香港人成日嘲諷中國只係識偷嘢、抄襲,敢問偷相「呃LIKE」除咗金錢銀碼之外又有乜嘢分別?

備註:鳴謝 Donald MacRae 及 新尚線出版 龔嘉豪先生 提供相片

Be the first to comment

Leave a Reply

Your email address will not be published.


*