【香港電車】小薯茄5週年 包架電車慶祝

近年隨著網絡文化興起,香港人逐漸脫離淨係收睇電視上面「大台」嘅節目,而呢一種新嘅娛樂文化亦都終於為香港帶嚟咗另一種新嘅偶像文化,例如係喺公共交通工具上面刊登偶像嘅生日廣告。

其中行走喺香港島北岸嘅香港電車,早前就有一班偶像支持者為近年新晉嘅年輕偶像姜濤刊登全車身生日廣告,並且喺姜濤生日正日搵返嗰架電車集體慶祝。

除咗個人偶像之外,近年興起嘅一啲網絡短片創作團隊都不乏支持者——其中由2016年9月正式開始營運嘅小薯茄,成員大部分出身於香港浸會大學電影系,現時有7位幕前演出嘅成員,小薯茄所拍攝嘅短片主要以幽默引起共鳴為主,截至2021年6月26號,訂閱人數已經超過36萬。

蒞到2021年9月,小薯茄為咗慶祝開檔5週年,決定搵香港電車整返架全車身廣告電車同一眾支持者開心吓,仲喺2021年9月4號下晝拉大隊出巡!

早喺小薯茄呢一架 #92 電車出發巡遊之前一個鐘頭,喺屈地街電車廠外面就已經有唔少小薯茄支持者到場守候——臨近預定出發時間,佢哋除咗企喺屈地街電車廠電車出口之外,唔少人仲企喺城西道同埋干諾道西之間嘅行人過路處兩邊——期間雖然巡邏經過嘅警員為之側目,但係都並無阻止。

由於喺電車廠入面嘅一啲活動所消耗嘅時間比預計為長,原定下晝3點鐘出發嘅電車輾轉搞到遲咗大約25分鐘先至可以由屈地街電車廠開出,一眾小薯茄嘅成員喺電車廠門口見到咁多支持者在場,興奮到拎起攝錄機影低呢個情景。

今次嘅巡遊活動會由屈地街電車廠開去銅鑼灣總站,然後返回西港城總站,再返去銅鑼灣總站,最終以屈地街電車廠結束。

#92 電車經過大約一個鐘頭嘅車程就去到銅鑼灣,其中喺銅鑼灣糖街行人天橋上面,早就已經有唔少小薯茄嘅支持者蜂擁而至,佢哋企喺天橋上面舉牌同拎出手提電話拍攝。

當 #92 電車轉入銅鑼灣總站嘅時候,總站嘅行人路都已經企滿咗一班小薯茄嘅支持者,佢哋唔少人都高呼小薯茄成員嘅名,仲舉起手勢表示對呢班小薯茄成員嘅支持。

而一眾小薯茄嘅成員喺 #92 電車到達銅鑼灣總站之後都一齊落車,近距離接觸佢哋嘅支持者,以及拍攝大合照,一眾支持者面對呢個場面都異常興奮,有人更加對小薯茄幕前成員大叫「我愛你」。

短暫停留銅鑼灣總站之後,#92 電車就向西返去西港城總站,車程大約40分鐘,沿途喺銅鑼灣、灣仔、金鐘、中環、上環一帶都有支持者企喺馬路邊等候拍攝,小薯茄嘅一眾成員都喺電車上面不時向街外嘅支持者提示要「小心睇車」。

當 #92 電車到達西港城總站嘅時候,現場同樣有唔少小薯茄嘅支持者已經到場守候,期間幾位小薯茄嘅幕前人員,面對一眾支持者要求「齊齊影合照」都有求必應。

#92 電車喺西港城總站停留咗大約十幾分鐘之後,就再次向東行去銅鑼灣總站,期間沿途一樣有唔少小薯茄嘅支持者喺街上面「追捕」呢一架電車,小薯茄嘅成員有時都會向呢班支持者講:「唔好嚇親電車司機呀!」

今次嘅電車巡遊活動大約就喺黃昏7點結束,#92 電車會返去屈地街電車廠,其實一眾小薯茄嘅支持者錯過咗今次嘅活動都唔使擔心,因為 #92 電車車身呢一個關於小薯茄5週年嘅全車身廣告係起碼會「捱過」整個9月,有心嘅可以喺成個9月入面去到港島電車軌嘗試睇下遇唔遇到佢啦!

大💥震💥撼💥 薯茄號電車出發luuu ٩(˃‌௰˂‌)و 由9月1至30號大家可以喺港島區見到巨型蕃茄同薯仔周圍走 🍅🥔 要見真身就把握機會! 9月4號嘅3-7pm仲有快閃拍攝行動 (・´ω・) 到時小薯茄成員會坐住呢架電車遊港島…

Posted by Pomato 小薯茄 on Saturday, 28 August 2021

1 Trackback / Pingback

  1. 【香港電車】小薯茄6週年 又包架電車慶祝 - HK Bus Channel 巴士台

Leave a Reply

Your email address will not be published.


*