【大巴大巴車埋你】10月限定!昂坪360聯同大巴士聯合推出黃昏日落團

新型冠狀病毒肆虐全球,搞到喺疫情期間都無得飛去其他地方玩,如果想話試吓重溫「堅離地」俯瞰嘅感覺,不如「山長水遠」入去大嶼山,搵昂坪360纜車幫你喺週末遠離繁囂!

當你喺纜車嘅旅程上,飽覽過大嶼山、港珠澳大橋、赤鱲角機場,同埋海景,心入面呃吓自己「其實同搭飛機起飛個景差唔多啦!」,再參觀完昂坪市集、天壇大佛、寶蓮寺「覺得心靈平靜咗,想放棄用藤條打自己個仔」之後,搭纜車返到去東涌市中心,嗰種去旅行放鬆嘅心情仲係意猶未盡,唔想迫巴士、迫地鐵返出市區?2021年10月會有一個更好嘅選擇!

昂坪360聯同大巴士香港,將會喺10月5個星期五、六、日嘅秋日週末假期,舉辦期間限定嘅全新旅遊體驗,推出「360纜車•敞蓬觀光巴士黃昏遊」套票。

  • 10月1~3號
  • 10月8~10號
  • 10月15~17號
  • 10月22~24號
  • 10月29~31號

由大巴士香港提供嘅開篷巴士會喺10月5個星期五、六、日嘅日落時分由昂坪 360 東涌纜車站開出,先帶大家兜一兜去赤鱲角南環路欣賞落日、再行經宏偉嘅汲水門橋、青馬大橋、昂船洲大橋,沿途靜賞夕陽餘暉嘅極美景致,最後喺繁華嘅尖沙咀漢口道,作為旅程嘅終點,全程大約1個鐘頭(視乎交通情況)。

昂坪360高級銷售及拓展經理謝鈞宇先生(上圖戴眼鏡嗰位)指出,今次昂坪360同大巴士香港首度攜手合作,成功策劃呢條全新巴士路線,期望為乘客帶嚟一個空中同陸上嘅雙重體驗,仲特別揀埋日落時分,畀乘客欣賞香港嘅夕陽美景。

大巴士觀光行政副總裁(香港及中國)温洛文先生(上圖無戴眼鏡嗰位)就話,好高興可以同昂坪360合作,實屬難能可貴,期望可以擦出火花,盡顯兩個牌子嘅優勢,開拓新商機。

乘客只要喺推廣期内乘搭昂坪 360 纜車前最少一日,透過昂坪 360 官方網站,就可以預購「360纜車•敞蓬觀光巴士黃昏遊」套票。另外,乘客亦可以憑即日來回纜車標準或水晶車廂門票,去到東涌纜車站售票處,用優惠價港幣48 蚊升級做「360 纜車•敞篷觀光巴士黃昏遊」套票。

不過大家要留意,套票需要喺同一日使用,而開篷巴士只開1班,座位有限,額滿即止——詳情請參閱昂坪 360官方網站。

巴士台就身先士卒咁喺9月29號去咗試團,「判官」揸車就叻,上鏡呢啲粗重工夫就留返畀專業人士「點點」楊民翠喇!

赤鱲角南環路係一條沿機場島南邊同西邊岸邊而行嘅道路,可以遠眺夕陽,仲有一串延伸出水面嘅南跑道著陸導航燈陣,近年成為香港人熱門假日「打卡」旺位——加埋喺開篷巴士上面迎風飄逸嘅長髮,睇落幾寫意!

開篷巴士會一直去到南環路盡頭飛機維修區折返,大家有機會比較近距離咁望吓飛機添㗎!而撞啱係飛機維修區嘅員工收工時間,佢哋見到有開篷巴士出現都有啲愕然!

之後開篷巴士會一直沿北大嶼山公路出去青嶼幹綫,乘客可以喺夕陽餘暉之下,兜口兜面食住風咁同曾經令香港人引以為傲嘅汲水門橋同埋青馬大橋合照。

如果加少少語言藝術

帶你坐架雙門、開篷、340匹嘅車去兜風睇日落

相信身邊人都應該聽到會幾開心!

心動不如行動!快啲訂位啦!得嗰15個指定日子各開1班㗎咋!

不過結尾要提一提大家:

行車時喺下層請勿用閃光燈,包括及不限於拍攝或試燈,以免影響車長揸車,多謝合作。

Be the first to comment

Leave a Reply

Your email address will not be published.


*