平治 Sprinter 516CDi EVM 車身 低地台小巴

萬眾期待 千呼萬喚 歷盡艱辛 終於登場, both the car and the flim

「低地台小巴」呢五個字,相信絕大部份香港人必定想起呢一部 Mercedes Benz (平治) Sprinter。事關早在2018年9月初運抵香港,就有傳媒率先報導,接著同年10月,平治香港代理仁孚行舉行車展亦有展出呢部車。加上平治徽章响一般港人心目中嘅尊崇地位,再仲有一直外界認為係由 (被運輸署迫害而導致倒閉嘅) 捷輝小巴引入。

2018年9月5日傍晚,平治Sprinter EVM 車身低地台小巴連同「普通地台」小巴運抵香港葵涌貨櫃碼頭
Photo by: Jacky Lim

車輛運抵香港後驗車程序一直受到阻撓乃眾所周知,當中的「黑幕」更是罄竹難書。超過兩年才通過驗車並成功登記領牌行走,「先行者」變成「包尾大幡」,但始終篡改不到這部車對於香港公共小巴推動無障礙運輸的啟動角色,也刪不掉為引入這部車奔波嘅人所付出的歷史。

香港嘅公共小巴服務一直以來除咗「慣性收視」之外,還有是唯一未有實現「無障礙運輸」嘅道路公共交通工具。除咗因為 (疑似) 勾結運輸署而能獨霸壟斷市場嘅品牌未有「低地台」型號、縱有其他車廠生產「低地台小巴」但造價高昂、業界思維故步自封之外,政策及法例未有與時並進更是主因中之主因。但「無障礙運輸」就係先進國家城市不可逆轉嘅趨勢,總要有敢於行動嘅經營者走出第一步。

2015年,立法會進行「公共交通策略研究」咨詢,在5月初舉行一場關於公共小巴服務嘅公聽會,討論重點除咗放寬小巴座位限制之外,就係要求引入「低地台小巴」,方便肢體傷健人士與及長者,實現「無障礙運輸」。隨後就有營辦商坐言起行遠赴英國及愛爾蘭洽商訂購,正是這部平治 Sprinter EVM 車身低地台小巴。

Photo by: Martin Oei

也許大家在街上經常見到平治 Sprinter 客貨車的外形相當完整,不明所以為何有「EVM 車身」這個稱呼。其實,平治 Sprinter 車系有多元化規格,長度、高度、軸距、負重、引擎、波箱….. 可謂任君配搭;除咗「原廠規格」嘅「貨VAN」,亦可以交予香港行內俗稱「斗佬」嘅改裝廠商,將之變成貨車、工程車、救護車、小巴……

Photo credit: “Car And Driver” magazine

呢部小巴係由平治廠方生產一個「鐵皮車殼」,再交俾EVM 因應訂單改造車身內外而成為一部正式嘅小巴。製造過程同巴士嘅底盤加建車身係完全唔同,所以由平治車廠生產出嚟嘅唔會叫做底盤,而係叫 base vehicle (基礎車輛),而EVM 係通稱為 body conversion factory (車身改裝工廠)。

EVM 廠房一隅
Photo by: Martin Oei

EVM 總部辦事處位於倫敦南面嘅克勞利 (Crawley),廠房設响愛爾蘭中部嘅祈碧瑾鎮 (Kilbeggan) (編按:今年4月於倫敦以南的賀斯咸(Horsham) 增設新廠房)。自2009年成立以來就是專科改裝平治 Sprinter 小巴,而且係少數獲得平治車廠核准改裝Sprinter低地台規格嘅車身改裝廠商。因為改裝工序除咗要切割原有嘅車身地台之外,仲要改裝波箱、傳動軸同排氣管,可見 EVM 嘅實力絕非泛泛之輩。

平治 Sprinter 低地台小巴在 EVM 廠房改裝進行中
Photo by: Danny McGee @ EVM UK Ltd

運抵香港後被(疑似)涉貪的運輸署嘅職員扭盡六壬拖延了超過兩年,影響的不只斥資訂購車輛的投資者、擬使用部車嘅營辦商,更根本損害到公眾利益。期間所發生的重重黑幕也許複雜難明,姑且模擬闡釋一下,一解市民好奇之心,以致代入親歷 (疑似)受盡某代理商好處之貪官污吏的手段是如何骯髒嘔心。「霸權品牌」與運輸署(個別職員)有不法勾當的指控是否無的放矢,留給看倌自辨,但相信最起碼該不否定存在的可能性。

縱然經歷萬千暗黑力量阻撓,終究都能投入服務;又縱然涉及「低地台小巴」營運嘅政策和法例仍然嚴重滯後,這部車的「先行者」身份和引入目的總算得到實踐。這部香港低地台小巴的真正始祖的特點何在,對香港公共交通服務發展有何價值,仍然是肯定,確實地存在,是無法刪去的。

全集影片節目已經上載到 HK Bus Channel 的 YouTube 頻道

睇完記得點擊 訂閱,與及「撳鐘仔」以便可以隨時知道有新影片上架。

特約商號:
華記膠輪電池公司

鳴謝:
Ooh La La Printing and Production Limited
Fleet-1 Service Centre


特別鳴謝:
EVM UK Ltd
Wai Ching Industrial Co., Ltd

資料圖片/影片:
Jacky Lim
Martin Oei
Terence Tse
Danny McGee @EVM UK Ltd
Dominic K.H. Kung @NOG Publishing

2 Trackbacks / Pingbacks

  1. 【新車速報】又有Mellor Orion低地台小巴扺港喇! - 巴士台 HK Bus Channel
  2. 平治Sprinter 一定係police car?你都 ONL799 - 汽車台 HK Car Channel

Leave a Reply

Your email address will not be published.


*