【臺灣】運安會:4月太魯閣列車出軌「運氣唔好」、「無延誤就無事」

2021年4月2號,臺灣正值清明節連假首日,臺鐵北迴線不幸發生嚴重意外,一列一抽8卡、大約350名乘客、由樹林開去臺東嘅408車次「太魯閣號」列車,0928時行經花蓮縣秀林鄉和仁段清水隧道入口時突然被一架無人嘅工程貨車撞到,之後出軌,接連撞上隧道壁,列車多節傾斜嚴重損毀,多人受困。

呢次事故最終釀成49人死亡、超過200人輕重傷,震驚臺灣全國,臺灣國家運輸安全調查委員會(運安會)會喺2021年8月23號公布事實資料報告。

運安會主委楊宏智喺8月20號嘅記者會透露,事發時列車由上一個隧道出口出嚟直到撞上跌入路軌嘅工程車,呢段期間列車司機只有17秒時間作出反應,楊宏智表示「若列車沒有誤點六分鐘就不會出事」、「算是運氣很不好」。

不過楊宏智亦強調,運安會檢視過臺鐵管理運作之後,只能用「千瘡百孔」形容,檢調睇過資料後,「恐怕會額外起訴更多人」。對於楊宏智呢番評論,臺鐵回應表示「尊重調查結果」。

運安會喺「太魯閣號」列車出事後曾揭露事故現場「不只一輛車、不只一個人作業」,而且當時工程車係「啟動中」,明顯當時係開緊工。內部調查亦發現,4月2號朝早,涉事嘅工地主任李義祥當時疑似正喺地盤嘅「髮夾彎」由工程車卸低輪胎,不過就喺掉頭走嗰陣,工程車卡咗喺樹叢,李義祥隨後就揸咗架挖泥機協助工程車脫困,但過程中工程車鬆脫,繼而滑落斜坡,翻滾落咗去路軌,導致悲劇發生。

不過楊宏智8月20號被記者追問時指出,後來發現工程車其實根本無卡喺邊坡,只係咁啱一連串操作導致滑落路軌,但詳細狀況會留待8月23號先至對外說明——楊宏智表明運安會已經做咗完整事故重組,會畀外界可以用360度翻睇事故,仲會睇到模擬影像,兼可以倒帶重播。

楊宏智表示,先前曾經提及列車司機有1分30秒左右處理即將撞上工程車嘅情況,不過經認真調查後確認,實際上列車由出咗和仁隧道直到撞上工程車只係得17秒,當時事故列車時速126公里,撞擊時嘅時速123公里,顯示列車司機確實已儘力踩煞車,時間上係嚟唔切煞車。

另一方面,楊宏智提及當日408車次延誤6分鐘,若果當日準時發車可能就無今次事故,運氣唔好。

楊宏智亦提到,調查後發現李義祥有努力想通報工程車滑落路軌,可惜時間唔夠

至於被問到花蓮地檢署喺8月19號追加起訴臺鐵花蓮工務段、專案管理公司人員,係咪顯示臺鐵有更多責任時,楊宏智回應指「檢調看到事實資料後,恐怕會額外起訴更多人」,至於記者追問可能追加起訴嘅對象,楊宏智就無透露。

臺鐵表示,事故發生後已逐一針對運安會公布嘅事實資料報告,進行工地安全管理改善,後續將遵照運安會公布相關建議持續進行改善

每逢發生重大意外,傳媒以至公眾都往往過份集中去「懲處」當事人,然而真正最重要嘅係:

汲取教訓,改革流弊,避免重現

Be the first to comment

Leave a Reply

Your email address will not be published.


*