新巴城巴邀公眾表揚港隊奧運創佳績 香港警察突然介入?

東京2020夏季奧運會因為新型冠狀病毒(武漢肺炎)而要搞到推遲1年先至可以舉行,即使加上親建制人士說三道四令到運動員飽受心理壓力,但係香港奧運代表隊一眾運動員仍然努力發揮表現。蒞到2021年8月8號閉幕嘅日子,佢哋已經合共攞到1金2銀3銅嘅成績,唔單只超過香港自從1952年參與奧運會以嚟,直至2016年上一屆奧運加埋所得嘅獎牌總數,其中女子游泳代表何詩蓓成為港隊首位喺同一屆夏季奧運會入面拎多過一面獎牌嘅運動員、女子單車代表李慧詩成為港隊首位喺多過一屆夏季奧運會入面拎過獎牌嘅運動員。ヽ(●´∀`●)ノ

之前講到…

當香港已經有公共交通機構表示可以給予一眾運動員免費乘車優惠——甚至香港電車仲放風希望政府當局批准給予全體香港人一齊免費搭車,畀公眾一同分享呢份快樂——新巴城巴喺2021年8月5號公佈,由8月5號到7號會去到以下3個巴士總站舉行「Come and Say BRAVO!齊來向香港運動員喝采!」活動:

  • 2021年8月5號1730~1830中環交易廣場巴士總站
  • 2021年8月6號1730~1830海麗邨巴士總站外
  • 2021年8月7號1230~1330新城市廣場巴士總站

今次活動出動咗城巴旗下1架比亞迪K9R單層電動巴士(車隊編號:1582,車輛登記:TV2703),之前巴士台已經出過報道講及喺活動嘅第1日傍晚,巴士去到中環交易廣場巴士總站,停喺260號路線嘅車坑。今次活動主要係想邀請公眾簽寫心意卡,鼓勵一直奮鬥嘅香港運動員,喺中環交易廣場巴士總站見到,市民就算「趕著返屋企」,但都吸引到一啲乘客停低表達心意同埋「打卡」。ヽ(✿゚▽゚)ノ

海麗邨

到咗活動第2日傍晚,巴士去到海麗邨巴士總站出面,停喺A21號路線往機場方向嘅巴士站,希望可以搵到一啲啱啱收工搭巴士返到去嘅街坊簽寫心意卡。

巴士嘅電子路線牌同埋向住行人路一邊嘅車身都有展示同今次活動相關嘅標語,以此冀望吸引到路過嘅市民參與簽寫心意卡。

即係咁講,大家應該都明白,海麗邨位處長沙灣西九龍填海區,雖然話附近係有幾條公共屋邨同埋私人屋苑,但就真係唔好當係欽州街嗰邊咁會行人如鯽,叫做都有啲人行過可以交到差咁啦!。:.゚ヽ(*´∀`)ノ゚.:。

一句鐘嘅活動真係話咁快就喺18:30完咗,一眾員工都快手收拾好啲物資,揸架巴士返廠準備之後一日中午嘅活動。

新城市廣場

活動第3日揀咗喺中午時份舉行,巴士早喺11點幾已經到場準備,起初揀咗擺喺N170號路線嘅站頭——

日光日白無通宵路線巴士埋站

聽落咁擺無影響到乘客搭巴士啦!

嗱,世事邊會咁簡單吖!(〒︿〒)

九巴有站務人員表示,呢個位置如果擺咗巴士喺度,就會阻礙九巴283號路線嘅巴士埋站,咁城巴員工就當然即刻揸走架巴士,兜吓圈睇吓有乜其他位置好啲啦!(/‵Д′)/~ ╧╧

佢哋試過擺喺以下巴士路線站頭或者附近,研究吓會唔會無咁「阻碇」:

  • N170(停得前就阻住283入站,停得後就阻住282出站)
  • 88K(駿景園方向)
  • 80K(新翠方向)

就喺呢段時間,奇怪嘅事就發生喇!(◜◔。◔◝)

有1架警方嘅豐田Corolla巡邏車「揈住燈」嚟到,巡邏車上面4名軍裝警員落車之後就直接上咗城巴呢架巴士,同城巴員工了解佢哋喺度做緊乜,再之後又同九巴嘅站務人員傾咗一陣…m(。≧エ≦。)m

現場有巴士迷就估:「係咪九巴職員報警『趕車』呀?」=_=

都係唔做無謂猜測喇!

擾攘一輪之後,城巴員工再揸住架巴士兜多幾圈,最終決定擺喺巴士總站近大埔公路 – 沙田段嗰邊入口嘅巴士總站英文標記下面…(☍﹏⁰)

安頓好架巴士之後就全力搵等緊搭巴士嘅市民簽寫心意卡啦!期間有啲帶住小朋友嘅乘客好耐心咁向小朋友講解點解要簽寫心意卡畀運動員添!

又…其實新城市廣場巴士總站都真係1個繁忙嘅「大站」,停定長擺1架巴士喺度又有啲唔係好對路咁,所以後嚟有段時間,城巴員工就揸住架巴士一路兜圈兜到活動時間完結。( º﹃º )

如果你去唔到但又想參與…

如果公眾人士夾唔啱時間親身去現場簽寫心意卡,其實新巴城巴今次有提供電子版本,大家可以下載心意卡或者直接用網上平台遞交自己嘅鼓勵同祝賀訊息。(ノ>ω<)ノ

終極未解問題

講到尾其實最關心而又有啲失望嘅係:

明明呢個活動話係喝采

嗰架「喝采」做乜唔出現㗎?

2 Trackbacks / Pingbacks

  1. 早前曾經徵集打氣心意卡 新巴城巴將放上巴士螢幕 - 巴士台 HK Bus Channel
  2. 港隊東京奧運奪佳績 九巴接連出招撐港隊 - 巴士台 HK Bus Channel

Leave a Reply

Your email address will not be published.


*