【臺灣】臺鐵E1000型電力機車開始退役

引入

1990年代中期,臺灣鐵路管理局(臺鐵)為解決假日車輛嚴重不足,加上淘汰大部分無冷氣客車等目標,訂定咗「810購車計劃」,其中一項就係買合共400架「推拉式自強號」列車嘅動力機車加上專用客車卡,屬於臺鐵當時最大宗嘅一批列車購入計劃,直到2019年採購臺鐵EMU3000型先至打破呢個紀錄。

臺鐵旗下「推拉式自強號」,使用臺鐵E1000型電力機車作為專用牽引機車;呢款電力機車係特別設計畀臺鐵「推拉式自強號」列車所用,外型上係臺鐵第一次採用流線形設計,刻意模仿當時歐洲用緊嘅高速鐵路列車,當年為咗同用開嘅方形機車頭分辨,好多臺灣人因而都叫佢哋做「子彈列車」。

雖然當年「推拉式自強號」係由南韓現代精工中標,但臺鐵E1000型電力機車其實係由南韓現代精工再招標轉交(「外判」)南非聯邦鐵路客貨車公司(Union Carriage & Wagon,UCW)生產,1996~1997年合共引入64架。「推拉式自強號」係臺灣第一款採用雙機車頭前後一拉一推,中間全數為無動力車卡廂配置嘅「推拉」式列車,編組方式係「E1000 + 車卡 + E1000」。「推拉式自強號」首抽列車喺1996年4月運到臺灣,經過幾個月密集試車後,終於喺1996年中秋節假期入營運。

問題

到咗2005年中,由於臺鐵E1000型動力機車設計同生產上嘅問題,喺合約廠商「走佬」之後越見嚴重,導致經常故障與誤點,臺鐵因此遭受責難。及後中華民國審計部調查發現,臺鐵合約管理方面有諸多問題,尤其南韓現代精工併入Rotem後,臺鐵並未對呢個變化準備應變措施,並且任由合約廠商繳交嘅履約保證金(新臺幣5億2千萬元)過期,因而對廠商失去制衡,導致日後臺鐵權益受損。而2003年底南韓廠商「靜雞雞」撤離臺灣,相關負責部門都未有積極尋求賠償,直到列車接連故障先至發覺事態嚴重——故障原因多數係牽引電動機有重大瑕疵,行駛途中「死機」而造成唔夠動力,而且備用零件好難入貨引致無法維修。

臺鐵發現事態嚴重後,向臺灣國內外各管道尋求協助——2005年8~9月左右透過中介向臺灣大同公司委託研發生產牽引電動機,但最終研發失敗;臺鐵亦搵法國國鐵(SNCF)擔任技術顧問並協助改善缺點,並向阿爾斯通(ALSTOM)採購牽引電動機維修替換。

臺鐵因為有幾款主力車種都係由南韓廠商中標,但呢啲南韓廠商無預警就「靜雞雞」撤走駐臺灣維修人員,主力車種嘅可靠度令人擔憂。因此,前中華民國交通部部長林陵三任內下令,臺灣嘅列車採購案禁止南韓廠商再度投標,以逼使大韓民國政府出面協調,願意針對動力集中式列車嘅設計瑕疵進行改造——經改造後車況已經趨於穩定。

替代

2014年開始,臺鐵曾規劃針對「推拉式自強號」服務設備以及臺鐵E1000型動力機車進行期中更新升級——不過當服務設備已陸續更新,動力機車就因為招標過程唔順利而停止計劃。目前規劃係當68輛臺鐵E500型電力機車交貨之後,陸續汰換目前已屆最低使用年限嘅臺鐵E1000型動力機車。

2015年度,臺鐵《整體購置及汰換車輛計劃(2015-2024年)》提出採購102架機車頭,其中68架係電力機車,用以取代臺鐵E1000型電力機車。

呢68架電力機車喺2018年11月30號第一次開標,但因為唔夠3間投標廠商標準而宣佈流標;其後經再次招標,臺鐵喺2019年10月8號宣佈由日本東芝得標,2019年11月1號簽約,並且預計2022年開始交車。

後嚟呢一款新嘅電力機車被編為臺鐵E500型電力機車,最大突破係搭載4G網絡訊號機,當車輛故障時,能夠將故障訊息傳返去臺鐵機務段,方便維修人員維修,係臺鐵車輛中第一次引入呢種技術。

退役

前文講到南韓廠商既「外判」又「走佬」,咁結果搞到唔止欠缺技術人手,搵零件都有困難,令到有啲故障嘅臺鐵E1000型電力機車維修唔到而停用:

  • E1054:高壓穿套缺料,2019年停用
  • E1026:主變壓器缺料,2021年停用

因為需要維修嘅零件喺幾經輾轉搜尋後報稱已經停產,致使相關機車欠缺修復價值,臺鐵決定安排相關故障嘅臺鐵E1000型電力機車正式退役報廢。

其中E1054號電力機車喺2021年7月12號正式報廢,成為1996年引入以來第一架報廢嘅臺鐵E1000型電力機車;至於E1026號電力機車亦入列等待正式退役報廢。

Be the first to comment

Leave a Reply

Your email address will not be published.


*