海盈邨巴士總站 車長休息室風波

巴士車長駕駛龐然大物承受住嘅精神壓力非同小可,有必要爭取抵達總站之後嘅時間稍事休息。但要「充電」,就該有合適嘅設施空間,一個備有枱櫈、冷氣空調等基本設施嘅休息室,絕對係必要的。

可是一個只會建構「拜鐵路教」嘅政府,對於遠離鐵路車站嘅公共交通車站嘅規劃,完全漠視供巴士/小巴停車和上落客嘅位置之外所有配套設施嘅設立,於是乎巴士公司唯有自我行動。不過可能漠視程序,甚至試圖繞過應有嘅程序,結果觸發本已自私心態、唔會尊重「巴士佬」嘅屋苑居民群起反對。

位於深水埗新填海區嘅海盈邨及凱樂苑,上個月就發生呢類事件。九巴擬在總站旁的行人路擺放一個面積約 8呎乘5呎嘅組合屋式車長休息室,街坊就以阻礙出入、有礙觀瞻而表示反對,當區區議員鄒穎恒 (民主黨) 亦「順應民情」表態反對。九巴唯有暫停工程,並將原已造好嘅水泥地基鏟走。

但另一邊廂,周議員在社交網站就事件嘅帖文惹起大批巴士車長「猛烈炮轟」,認為佢妄顧車長作息需要。

唔少香港人對於社區設施嘅心態就只有 Not at my backyard,總之有幾大需要都好,都唔好响自己「家產」範圍出現以免影響樓價。再者,普遍香港人只有「細時唔讀書,大咗做運輸」嘅觀念看待「巴士佬」,唔好話唔會反思所謂「無巴士佬坐响司機位,行路啦你!」呢個必然現實,欠缺對巴士車長基本尊重,更唔會考慮休息室對巴士車長而言係基本權益衍生道路安全嘅後果,因為香港地從來都係遍地「鹹魚」,只顧對「巴士佬」呼呼喝喝無理取鬧以至動輒投訴。有誰會認為2018年2月10日大埔公路大埔滘段嚴重車禍,嗰個持續問候車長娘親嘅阿伯係有問題。

相對英國有法例規定而市議會、巴士公司會作出完善規劃同安排,居民亦不可能作出反對,香港嘅問題根本沒完沒了。

可幸鄒議員原來早有替代方案,只不過礙於民情未有及早提出,是否合適還有待評估。但所謂嘅政府行政程序,街坊們還可能會為保其家產價值而反對到底。但萬一再因為「鹹魚」心態導致不幸事件,唔知班街坊、甚至全香港人,是否負擔得起呢個責任呢?!

全集影片,已經上載到 HK Bus Channel 的 YouTube 頻道

睇完記得點擊 訂閱,與及「撳鐘仔」以便可以隨時知道有新影片上架。

鳴謝:
王振霖 – 葵青傳承 副主席
黃傑朗 – 深水埗區議員 (富昌)

特別鳴謝:
華記膠輪電池公司
Ooh La La Printing and Production Limited
Fleet-1 Service Centre

Heritage Hunt

1 Trackback / Pingback

  1. 海盈邨巴士總站車長休息室 完滿解決 - 巴士台 HK Bus Channel

Leave a Reply

Your email address will not be published.


*