【公益活動】伙退役巴士露營 促進SEN認識

巴士台之前講到,賽馬會「藝術有SENse」計劃(英文:Jockey Club Arts Make SENse Programme;下簡稱「藝術有SENse」)係由香港小童群益會主辦、香港賽馬會慈善信託基金捐助,以視覺藝術作為媒介啟發有特殊教育需要(SEN)學童嘅服務計劃。「藝術有SENse」旨在運用視覺藝術元素同埋感官關聯(sensory association),通過藝術創作歷程,為有SEN狀態嘅學童提供情緒出口,提升佢哋嘅社交溝通技巧,畀佢哋體驗由創作而嚟嘅滿足感。

「藝術有SENse」喺2021年5月期間舉行「Common SENse:藝術介入SEN的巴士展覽」(簡稱「Common SENse」),去到早已退役嘅前中巴利蘭珍寶SF15裡面,展出特邀藝術家因應關注SEN發展嘅藝術創作,並且加設現場藝術工作坊(例如:迷宮設計、電線網淺浮雕、學習Matisse繪畫等)畀參觀者即時體驗,而開幕活動喺2021年5月8號假香港青年協會領袖學院舉行。

主辦單位亦為此喺2021年5月13號搞咗1場「追踪SEN巴士遊」,喺港九幾個地區巡遊宣揚關心SEN學童。

去到2021年5月15~16號,「Common SENse」去到上水馬草壟路33號東華三院馬草壟營地搞展覽、工作坊,以及露營活動。

(special thanks:連佳麗

就算香港天文台一早已經發出酷熱天氣警告,一眾參加露營活動嘅朋友仔仍然無減興致,紛紛喺營地架設帳幕玩遊戲,感受離開市區嘅閒情。

而當臨近黃昏,一眾露營參加者已經佈滿營地,喺落日餘暉之下,倍感寫意… 如果無視建築發展嘅魔爪已經伸展到營地側邊嘅話 ( ×ω× )

(當所謂「發展」就只係不斷用建築物取代植被,究竟呢個又係咪香港人要默默接受?)

連佳麗讀過香港樹仁大學新聞與傳播學系,依家喺香港開電視擔任緊節目主持,閱讀對佢嚟講肯定無難度。不過當大家覺得要自己養成閱讀習慣好難,要「逼」屋企嘅「小魔怪」讀多兩本書仲難,又有無諗過,SEN學童面對書本會係有同我哋唔同嘅感知?而大家又有無諗過可以去學習一啲小技巧就可以改善小朋友嘅閱讀習慣?

基於有部分SEN學童特別喜愛巴士、喜愛巴士路線規劃結構嘅縝密,策展團隊於是突出呢一份獨有嘅美感同埋感官體驗,喺今次「Common SENse」嘅藝術巴士上面就有交錯嘅布條,呈現結構與線條之美。

參觀者仲可以用筆喺紙條上留言,釘喺布條上面,令藝術巴士嘅車廂成為大家嘅集體創作,嘗試大家融合,或許會發覺平時對SEN學童嘅刻板印象本身就唔係事實

(唔少留言都係表示「舊巴士嘅車廂入面好熱」)

飛天豬展出以《熱狗上的返學日記》為題嘅各式藝術作品,述說一段SEN學童搭巴士返學嘅奇妙故事,當中有一個部份係關於巴士車長個「名牌」,如果有機會上巴士參觀不妨留意吓。

坊間一直盛傳,巴士迷圈子係SEN學童集中營,多少又唔可以話超錯,只不過大家有無考慮清楚當中嘅因果?

平時亦有主持司儀班、跳舞班嘅連佳麗,面對一班參加活動嘅小朋友,唔單只打成一片,仲藉機教佢哋搭巴士要記得撳鐘先至有得落車。

每個人大腦神經結構或許好唔同,令彼此有時未能接通,但人能夠通過藝術以及想像,喺較廣闊嘅平台相遇以及互相諒解,今次露營活動就係畀機會參加者喺遠離煩囂、靜望夜空之下,可以細心思考其實人有好多唔同嘅可能。

至於講返架「藝術巴士」,嚟緊嗰個週末會去到下一個地方畀公眾參觀:

石屋家園
地址:九龍城聯合道 133 號
日期:2021年5月22~23號
時間:1200~2000

有興趣參觀就記低喇!

其實大家又知唔知:退役巴士係可以改造成露營車㗎!

1 Trackback / Pingback

  1. 【公益活動】退役巴士再現尖沙咀 推廣SEN藝術教育 - 巴士台 HK Bus Channel

Leave a Reply

Your email address will not be published.


*