香港專營巴士一般車齡屆滿18年之前就要退役，然後巴士公司會透過招標形式出售，多數會被賣去劏車場拆毀，只有少數巴士由巴士迷保留或者改做其他用途。
根據2017年7月12號運輸及房屋局局長陳帆書面回覆立法會時所提供嘅資料，九巴喺2017~2022年期間會有多達1,225架巴士退役――面對巴士退役潮造成大量惰性固體垃圾，九巴喺2016年12月15號推出「舊巴士及退役巴士捐贈計劃」，捐贈退役巴士畀非牟利機構循環再用，鼓勵唔同團體提出既可持續又有益社會嘅用途，令退役巴士可以重投社區，以另一種有益社會嘅形式服務公眾。
九巴收到申請後會進行審批與及實地視察，了解可以捐贈嘅巴士型號以及擺放巴士嘅位置，到咗巴士退役之後工程部就會拆除原有引擎、座椅等，並且協助改裝車內設施，確保巴士唔會移動或翻側。
九巴喺2019年8月20號透過「舊巴士及退役巴士捐贈計劃」將旗下1架2019年7月25號退役嘅丹尼士三叉戟型10.6米版本雙層巴士（配ALX500型車身，原有車隊編號：ATS85，原有車輛登記：KD2907）捐贈畀位於九龍鑽石山鳳德邨硃鳳樓側嘅中華基督教禮賢會香港區會禮賢會恩慈學校。
禮賢會恩慈學校其後獲得「社區投資共享基金」撥款855,000港元，利用呢架九巴捐出嘅雙層巴士，針對智障學生以及地區居民展開名為《恩慈巴士．夢》嘅公益計劃，由2020年11月1號至2022年10月31號以「社、校、福、商」協作模式，喺黃大仙區鳳德邨透過開放「恩慈巴士」，促進社區人士同校內智障學生嘅接觸同埋聯繫，建立包容、互惠嘅關係；同時推動智障學生發揮所長參與社區，藉著成立「恩慈校友會」、「恩慈社會服務隊」，令智障學生轉化成為「社區大使」，走入社區，回饋社會，促進社區共融：-
- 恩慈巴士：建立社區士多、舉辦共融手工藝活動與及「共融角」，吸引社區人士走入校園同智障學生互相認識與及接觸，令智障學生同社區建立和諧共融嘅關係
- 社區義工培訓：招募社區人士、家長義工、校友家長，參加社區義工培訓課程，增強佢哋同智障學生溝通、相處嘅知識、技巧，裝備佢哋成為計劃入面嘅義工服務社區，促進佢哋同智障學生建立和諧共融嘅關係
- 「社區大使」：參與計劃嘅智障學生同埋社區義工接受培訓後，將會成為計劃入面嘅「社區大使」，協助喺恩慈巴士上舉辦手工藝共融活動、開放社區士多、共融角等社區共融活動
- 探訪區內長者同埋幼兒：智障學生喺社區義工輔助下探訪長者鄰舍中心同埋幼兒中心，並且送贈親手製作嘅手工藝創作品、手繪雨傘畀長者同埋幼兒，令智障學生關心、服務社區，肯定佢哋嘅能力同埋對社區嘅貢獻
- 恩慈社會服務隊：計劃會挑選當中能力較高嘅「社區大使」（智障學生）作為統籌，成立「恩慈社會服務隊」，推行恩慈巴士共融活動、社區探訪，並且會定期舉行會議分享經驗、作出檢討
- 恩慈校友會：由參與計劃嘅學生家長、校友家長、校友義工等組成恩慈校友會，以提倡社區共融為宗旨，引領智障學生透過恩慈巴士服務增加接觸社區人士，並為恩慈巴士服務提供意見及支援，以促進社區共融。
除咗有一班義工改裝巴士之外，禮賢會恩慈學校得到胡浩文先生為「恩慈巴士」嘅「門位」一邊以仿照舊式樓宇立面設計新「拉花」，尤其將巴士原有上、落車門位置配上「鐵閘」圖案，切合返用途。
校方將巴士下層設計成仿．懷舊士多，由學生以「街坊價」出售基本用品畀區內人士，服務街坊。
校方表示，學生可藉著體驗一系列銷售工作，包括整理貨品、收銀找續等，為佢哋提供一個對外交流嘅機會，尤其當面對接待客人、解答客人查詢等情況更加可以提升佢哋嘅溝通技巧。
至於巴士上層，校方將呢一部份規劃成工作訓練空間，學生除咗可以進行「同工作有關」嘅訓練外，亦可以用呢個空間進行創作，製成嘅手工藝品（例如手繪雨傘）仲可以擺去下層銷售，體現「上製作、下銷售」嘅一條龍運作。
巴士下層近車尾位置有4排乘客座椅獲得保留，加上咗摺枱，可以作為小餐室；而且據介紹，原來校方仲想利用呢啲座椅教導學生搭巴士時應該點做――尤其係點樣佩戴安全帶。
巴士下層車頭駕駛室亦有被保留，除咗喺開放畀社區公眾人士參觀時可以接觸吓之外，校方亦都想藉一個真實場景教導學生出街搭巴士上車嗰陣嘅應對技巧。
禮賢會恩慈學校獲九巴捐贈退役巴士，並且得到「社區投資共享基金」贊助透過巴士推動社區共融活動，校方為此喺2021年4月30號下晝舉辦社區共融同樂日暨恩慈巴士開幕禮活動。
如果讀者睇到呢度，雖然講完架恩慈巴士，但巴士台好希望大家可以睇埋落去…
活動當日，到場人士除咗可以參觀恩慈巴士之外，仲有一啲攤位遊戲畀參加者了解多啲關於健康同相處嘅知識。
而喺學校3樓，禮賢會恩慈學校一眾職員同學生都準備咗一啲活動，畀參觀者更深切了解到校方一眾職員――包括特殊教育教師、社工、護理人員、言語治療師、職業治療師、自閉輔導員、教育心理學家――如何運用專業技能，務求令一班被評定為中度智障／自閉／專注力不足／過度活躍等有特殊學習需要嘅學生可以學習到生活技能同知識…
「佢哋一樣可以學識我哋一般人生活上嘅嘢，只係速度慢啲，需時耐啲」
然而，香港政府近年為人詬病嘅一個現象就係：
真正需要多啲資源嘅範疇就「勒緊褲頭」
禮賢會恩慈學校就正正面對呢個問題，房委會持有校舍業權，建築標準未能符合特殊教育所需，尤其校方由創校時嘅4班級，至今已經拓展到提供相等於初小至高中4階段合共13班級，校舍已經不敷應用。
另一方面，校舍老化致使修葺支出增加，當局卻又唔肯批出維修經費，再加上當局未有畀足特殊教育所必須嘅額外資源，單純依靠政府津貼撥款只得「捉襟見肘」，一直未能提供真正適合特殊教育所需嘅課室環境，難免令一眾教職員「事倍功半」。
校方只好成立「發展基金」，由熱心市民捐款渡日。
當日幾位教職員介紹禮賢會恩慈學校所面對嘅情境，有幾件事尤其印象深刻：
- 雖然話近年香港人開始對有特殊學習需要嘅學生多咗了解同包容，但社會上仍然有唔少人對呢啲學生歧視同白眼，呢啲學生往往去到一般遊樂設施時會被其他兒童以至家長排擠、指罵…因緣際會之下，適逢一間室內遊樂場結業，當室內遊樂場嘅設施準備要送去堆填區，校方幸好成功爭取到可以接收呢一啲設施，喺校舍內重組成「伊甸園」遊樂室，令學生有機會放心玩到呢一類設施――對一班學生嚟講，除咗歡樂，其實仲可以訓練肌肉以及平衡。
- 面對校舍課室等建築硬件不足，校方急需推動擴建校舍計劃，2020年9月禮賢會恩慈學校曾經託屋邨辦事處喺所在嘅鳳德邨進行問卷咨詢，當中贊成者超過75%，但當局卻以耗資4,500萬港元擴建校舍「唔符合成本效益」而拖延――究竟點解當局覺得掟5,000萬港元起一個噴水池又「符合成本效益」呢？
- 要學生全方位學習生活技能，其中一個要訣就係要畀學生去到實際環境之中學習，但係當要帶領學生離開課室、走入社區環境學習，極之需要校巴服務去配合。現時校方對校巴需求非常殷切，希望可以建立自己嘅校巴車隊，穩定學校嘅校巴服務，為學童提供更完善嘅校巴出外學習，但購買新校巴起碼需要85萬港元，呢一筆款項，依家仍然要靠公眾籌募。
面對校舍唔夠用嘅困境，禮賢會恩慈學校有打算先再向九巴「舊巴士及退役巴士捐贈計劃」申請多一架退役雙層巴士，用以作為「校舍嘅延伸」，但長遠而言，明顯當局需要正視問題嘅癥結，實在咁履行校舍擴建，方為正途――巴士台在此希望校方能夠早日得到當局准予擴建、為學生謀得福祉！
1 Trackback / Pingback