【山頂纜車】 其實大家為影張相啫 無謂咁搏命囉!

之前汽車台嗰邊講到,香港山頂纜車有限公司宣佈第5代山頂纜車將於2021年6月28號正式退役,以進行最後階段嘅升級工程,迎接萬眾期待嘅全新第6代山頂纜車喺2021年年底投入服務。

當山頂纜車傳出呢個消息之後,連日嚟香港都有唔少市民蜂湧去到香港山頂纜車沿線拍攝,而喺2021年5月30號,香港其中一架比較知名嘅獲保留退役巴士――前中巴利蘭珍寶SF15亦獲安排去到同第5代山頂纜車作告別合照。

而一直以嚟,大家都對於香港交通迷「為咗影一張心目中想要嘅相可以有幾癲」略有所聞,例如掟啲雜物出去馬路中間、企一條人牆,為求影到巴士轉彎符合佢哋嘅心水角度,呢一樣嘢巴士台之前都曾經寫文「表揚」過:

正當香港山頂纜車聲稱告別第5代車廂嘅時候,互聯網上面流傳著一啲照片,顯示有所謂「交通迷」或者「龍友」嘅人士,為求影到一張佢心目中想要嘅香港山頂纜車第5代車廂照片,竟然喺白加道站企出去路軌…

你以為呢啲人純粹只係喺山頂纜車行開咗嘅時候先至企喺嗰度?少年,你太年輕了…如果換個角度,喺香港山頂纜車車頭嘅位置,望到呢一張相嘅情景…

現場應該係香港山頂纜車白加道車站嘅位置,可以見到有人為咗拍攝香港山頂纜車第5代車廂,竟然唔顧危險咁樣衝入去山頂纜車路軌上面拍攝…咁究竟影出嚟嘅效果會係點嘅呢?

大家係咪覺得好靚、好扣人心弦呢?不過有無諗過呢個行為除咗非常之危險之外,亦都係違法嘅呢?

根據《香港法律》第265B章《山頂纜車附例》第18條「進入處所」嘅規定:-

任何人如非職員,或未經公司妥為授權,不得進入纜車軌道綫或軌道的任何部分,或並非明確提供予乘客使用的處所的其他部分。

按照附表「罰則」所述,違反第18條者可處以罰款港幣5000元。而第30條「逐出公司處所」之中更表明:-

每名職員均有權將他合理地懷疑已違反或企圖違反本附例的任何人逐出(在有需要時可使用合理武力)處所或其任何部分;而凡有關違例是本附例所訂的罪行,則他有權扣留該人直至該人被交予警務人員拘押以依法處置為止。被逐出的任何人如已繳付車費,則無權索回車費。

所以事發後,香港山頂纜車有限公司已經報警求助,警方亦都派出巡邏車連同警員到場調查,以及記錄低在場人士嘅身份證明資料。

大家真係影相還影相,記得要顧及自己以至其他人嘅安全,同埋遵守適當嘅法律。

2 Trackbacks / Pingbacks

  1. 山頂纜車暫停駛 擅闖踩車好威威? - 汽車台 HK Car Channel
  2. 【山頂纜車】升級工程幾經波折 最終8月底重新投入服務 - HK Bus Channel 巴士台

Leave a Reply

Your email address will not be published.


*