【港鐵】為配合屯馬綫試車 5月2號推遲兩綫頭班車

港鐵喺2021年4月14號下晝召開記者會,交代沙中綫工程最新進度,並且宣布為咗畀屯馬綫進行大規模全綫試車,屯馬綫一期、西鐵綫會喺2021年5月2號朝早,推遲頭班車到0730時先至開出。

為咗確認原有列車可以喺屯馬綫全綫順利運作,當局早前要求港鐵喺屯馬綫全綫通車前,多啲測試屯馬綫一期、西鐵綫列車,港鐵決定喺2021年5月2號凌晨非行車時段內,出動更多列進行更長時間嘅全綫試車。根據港鐵安排,屯馬綫一期、西鐵綫兩綫將會全綫無法準時按正常時間開出頭班車,並且決定將頭班車開出時間推遲到0730時。

由原本正常列車頭班車開出時間到預定推遲嘅列車頭班車開出時間之間港鐵會額外安排合共10條接駁巴士路線,替代屯馬綫一期、西鐵綫全綫提供服務,同埋接駁乘客去使用港鐵其他路綫。

西鐵綫(6條接駁巴士路線)

屯馬綫一期(4條接駁巴士路線)

根據港鐵資訊,2021年5月2號港鐵特別免費接駁巴士服務概況如下:-

  • 免費接駁巴士會喺大約0515時投入服務。
  • 免費接駁巴士預計班次為每2~10分鐘一班,港鐵會密切留意服務情況,並按需要調整相關服務。
  • 免費接駁巴士車程會受實際路面情況影響,車程時間將會較長,運載能力亦低於鐵路。
  • 免費接駁巴士將會喺西鐵綫、屯馬綫一期鐵路服務恢復起計約30分鐘後終止。兩綫預定會喺0730時恢復鐵路服務,即係港鐵免費接駁巴士將會喺大約0800時終止服務,但實際時間需要視乎當日情況。

港鐵表示會實施特別票務安排,盡力令當日乘搭港鐵免費接駁巴士嘅乘客唔會因為呢一次服務調整而畀多咗額外車資。

首先,大家記低以下10個指定轉乘港鐵免費接駁巴士嘅港鐵站:

  • 欣澳
  • 青衣
  • 大埔墟
  • 美孚
  • 南昌
  • 尖沙咀
  • 紅磡
  • 鑽石山
  • 大圍
  • 大學

由未受服務影響嘅鐵路綫乘搭港鐵,再轉搭港鐵免費接駁巴士

  • 使用八達通/全月通加強版/二維碼車票/港鐵都會票嘅乘客,可以喺10個指定港鐵站免費出閘,並且轉搭港鐵免費接駁巴士繼續行程――上一程車費將會被豁免。
  • 使用單程車票嘅乘客,可以喺10個指定港鐵站免費出閘,出閘時閘機將會退返單程車票畀乘客。乘客可以喺同一日重用嗰一張車票,或者去到客務中心辦理退款。

先乘搭港鐵免費接駁巴士,再由無受影響嘅鐵路綫轉搭港鐵

  • 使用八達通/全月通加強版嘅乘客,可以喺10個指定港鐵站嘅港鐵免費接駁巴士落車處,將八達通卡拍落指定閱讀器,隨後嘅港鐵車程可享車費豁免。呢一項車費豁免安排,適用於拍卡記錄當日直至服務停止為止嘅時間內,除咗機場快綫、往來羅湖及落馬洲站嘅車程、東鐵綫頭等額外費之外嘅港鐵車程。
  • 使用港鐵都會票嘅乘客,乘搭港鐵免費接駁巴士之後嘅港鐵車程會由港鐵都會票扣除。
  • 使用二維碼車票/單程車票嘅乘客,係應該要為乘搭港鐵免費接駁巴士之後嘅港鐵車程畀錢購買車票。

港鐵表示,如果乘客發現當日有任何因為港鐵服務調整而引起嘅票務問題,可以去客務中心查詢。

簡單咁講,上述兩種情況之下,其實唯有使用八達通或者全月通加強版嘅乘客先至會可以雙向豁免車資。

Be the first to comment

Leave a Reply

Your email address will not be published.


*