九巴授權積木遙控巴 限量發售只出1000架

2016年成立嘅彼樂部創作有限公司,一直以「KONSEPT」為商標,推出一系列仿真遙控車玩具。2021年2月嗰陣,「KONSEPT」推出咗一批得到九巴官方授權嘅富豪B8L仿真遙控車玩具,分別係九巴塗裝 K800(仿照V6B75,WF4582)以及龍運塗裝 K801(真車未出牌,所以車牌係LWB)。

事隔1個月之後,「KONSEPT」再得到九巴官方授權,推出新一款以公共交通工具做藍本嘅仿真遙控車玩具:智能遙控積木B8L雙層巴士KB800。

雖然話就話用膠粒積木砌嘅嘢好多時都會受制於膠粒本身嘅方塊形狀而令外觀「大打折扣」,但彼樂部仍然重視要仿照原車以1:16設計,附帶「玻璃梯」,尺寸大約係73.9 x 19.3 x 26.6(L x W x H,厘米),積木數量達3542粒。

順帶一提,今次呢一款「智能遙控積木B8L雙層巴士KB800」係限量發售,只會賣1000架,包裝附帶有編號嘅認證卡,極具收藏價值​。

巴士車廂內部唔算馬虎,還原返上落上層嘅樓梯,而「座椅」配色都可以隱約認得出係參考咗真實巴士上嘅邊一款櫈。

有巴士就當然唔少得巴士站,呢款積木巴士係有埋1個積木站牌,仲附送多條巴士路線牌箱貼紙、站牌貼紙。

驅動系統方面就包括以下配件:

  • 2個XL型電機
  • 1個L型電機
  • 1個伺服電機
  • 2條電機延長線
  • 1個2.4G鋰電池盒
  • 1個遙控器

除咗必備嘅車前倒後轉左右之外,今次呢架遙控巴士嘅車門仲可以撳掣遙控開關,而且係跟返真實巴士前後上落車門嘅開關模式。

遙控器用2粒AAA電芯,巴士自己就內置咗充電池,可以經USB充電,大約90~120分鐘充滿,續航時間大約30~35分鐘。

遙控器使用2.4Ghz 頻率,有效範圍大約20米,仲可以​支援多架遙控車一齊玩唔受干擾。

如果嫌靠遙控器玩唔夠新潮,呢款遙控積木巴士仲可以靠智能電話同埋語音等控制,只要手執iOS 9.0+或者Android 5.0+系統嘅智能電話,就可以用附帶嘅應用程式操作,仲啟動埋隱藏秘技:九巴原音車廂廣播(喺智能電話應用程式入面有得揀)。

呢款「智能遙控積木B8L雙層巴士KB800」可以經彼樂部網站預訂,預購價港幣1799蚊,預計2021年4月20號可以出貨,有「閒錢」兼且唔驚「海關」嘅朋友仔留意吓喇!

Be the first to comment

Leave a Reply

Your email address will not be published.


*