【香港輕鐵】2期列車將退役 港鐵邀提交意向

服務新界西北屯門、元朗、天水圍嘅香港輕便鐵路系統(輕鐵)喺1985年7月14號開始動工,第一期喺1988年9月18號投入服務,多年嚟擴充車隊,到2020年12月,已經分5期合共買入182架列車。

2008年7月8號,港鐵公司宣佈為當時車隊中69架輕鐵「第1期」列車搞「現代化翻新」,合約批咗畀生產「第4期」列車嘅同一間澳洲公司,所以翻新後嘅車身同埋車廂設計同「第4期」列車相同。

「第1期」列車喺2011年全部完成翻新之後,由日本川崎重工業生產嘅「第2期」列車亦原本會被安排進行「現代化翻新」,不過港鐵公司喺2015年決定改為購買全新列車取代「第2期」列車。

隨著為取代「第2期」列車而購買、由中車南京浦鎮車輛生產嘅「第5期」列車喺2020年11月17號開始分批投入服務,「第2期」列車就正式排隊退役。

港鐵公司喺2020年12月提出「資格預審」邀約,正式準備「出售舊輕鐵第二期列車」,邀請有意競標者喺2020年12月28號下晝2點或之前,經港鐵公司電子投標系統「提交意向」。

根據港鐵公司公佈,今次合共需要處理現存28架「第2期」列車,預計退役時間為2021年第2季到2023年第4季,各架列車會喺預計退役日期前大約1個月停止服務。

今次並無指定舊列車嘅處理方式,港鐵公司指除咗拆毀外,可以整架列車轉售,港鐵公司亦會考慮任何使用舊列車作社區服務或者推廣環境保護嘅可行方案。

港鐵公司提及會喺2021年1月進行「資格預審」,經揀選後,2021年3月將會向合資格申請者正式招標。

今次會係輕鐵首次一整批列車退役,而當日本車被中国車取代,一個時代又驟然終結…

Be the first to comment

Leave a Reply

Your email address will not be published.


*