「人力車」重新上路 「新」巴士首航征途

話說之前講過,因為一場新型冠狀病毒(武漢肺炎)令到全世界各地都實施旅遊限制,嚴重打擊同旅遊相關嘅行業,新巴嘅人力車觀光巴士亦係受害者,喺停駛多個月之後,原本用緊嘅一批開篷雙層巴士都已經要汰舊換新。

隨著疫情開始緩和,新巴宣佈喺2020年10月1號開始,有限度恢復人力車觀光巴士服務,逢星期六、日、公眾假期提供每60分鐘一班H1「日景/懷舊之旅」:

  • 中環天星碼頭開出:1000~1600
  • 尖沙咀開出 :1130~1730

適逢中秋節,新巴決定喺2020年10月1~4號額外提供H2「夜景之旅」:

  • 中環天星碼頭開出:1700~2000
  • 尖沙咀開出 :1830~2030

新巴同時間推出「二人同行送禮物」嘅特別優惠,2020年10月1~4號期間去到中環天星碼頭乘搭人力車觀光巴士,二人同行就可以獲贈一個新巴城巴塑膠文件套

值得一提嘅係,喺中環天星碼頭巴士總站嘅人力車觀光巴士站長非常落力,除咗喺乘客上車嘅時候,每兩個同行乘客派發一個塑膠文件套之外,佢仲主動走出站長室,去到巴士站幫乘客同「新」嘅人力車觀光巴士合照,在場嘅乘客都非常開心。

講吓呢一批「新」嘅人力車觀光巴士用車,係由原本新巴車隊入面嘅Enviro500型12米版本雙層冷氣巴士改裝成開篷巴士(預計5架,車隊編號:5550~5554),而且配上咗新設計嘅車身色彩(靚唔靚就…)。

不過有啲改裝工程仲未完成,喺2020年10月1號首航嘅時候只能派出3架(車隊編號:5550~5552)。

今次嘅改裝,其中一個特色係上層保留咗車頭兩格窗框,不過除咗對住上落樓梯嗰一格有裝上玻璃之外,其餘都係「得個框」,乘客可以將頭、手、腳伸出車外…當然係講吓就算,千祈唔好真係咁做!

另一個特點就係上落樓梯嘅位置,因為凸出咗車頭保留嘅車頂能夠覆蓋嘅範圍,所以額外裝咗一個纖維蓋,減少落雨嘅時候雨水直接滴入下層車廂。

人力車觀光巴士重出江湖,除咗吸引到巴士迷之外,亦有家長趁節日假期帶小朋友玩「搭車車」。而「新」巴士難免水土不服,自動報站系統多次喺中環→尖沙咀行程,離開天星碼頭無幾遠就「死機」。

不過大家都知道香港過去一年幾嘅時間發生過乜嘢事,喺10月1號呢啲敏感時節,坐巴士觀光又點會順順利利?

下晝時份,香港警察無預告之下封鎖紅磡海底隧道嘅全部行車線畀佢哋嘅警車兜嚟兜去,令到紅磡海底隧道以至附近一帶嘅道路都受到阻塞,出隧道之後需要入康莊道掉頭返去梳士巴利道嘅H1號路線亦一度受影響。

至於H2號路線呢~雖然話就話係「夜景之旅」,但係頭班車係1700開出,所以基本上都仲係「日光日白」嘅…(⊙_⊙)

有見及此,當然係等夜少少,真係入黑之後先至再試搭H2「夜景之旅」啦!

「夜景之旅」相對地可能會話無睇得咁清楚啲風景嘅輪廓,但係見到香港五光十色嘅夜生活燈光,相信都會係另一種賞心樂事。

由於現時新型冠狀病毒(武漢肺炎)仍然未完全遏止,所以H2路線因應遊客嘅數量不足,估計喺10月5號之後將仍然有一段時間暫停服務。

又或者…其實旅遊觀光嘅其中一樣嘢都係要睇「風土人情」嘅啫!「夜景之旅」可能嘅賣點就係:睇香港警察喺條街擺低啲警車,揈住燈阻塞交通?

其實好多乘客都反映話依家兩條路線嘅行程都好唔吸引 !

Be the first to comment

Leave a Reply

Your email address will not be published.


*