平治低地台小巴巡迴展覽???

因可能唔係豐田導致運抵香港逾18個月都仲未完成驗車出牌嘅平治 Sprinter 516CDi EVM 低地台小巴，到底幾時可以正式出牌行走，相信好多人都好想知道。就是編輯部 Chat room 都偶爾因為呢架車而粗口滿天飛。點解？因為某個疑似只為某個日本車廠服務嘅所謂政府部門要求左改呢樣右改嗰樣，一時改一樣，過多幾日又話要執第二樣……. 搞到 Plan 好咗九世嘅片集節目唔知幾時可以正式拍攝，仲有係之前拍咗啲花絮全部唔用得。當然唔少得阿Lim 啲滿肚牢騷粗口橫飛抒發悶氣。

今朝早，呢架唔知仲要拖到幾時先至可以完成驗車出牌嘅平治 Sprinter 516CDi EVM 低地台小巴去到青衣「展覽」……. 其實係一班葵青區議員，包括冼豪輝、黃俊達、張文龍等等，為剛開辦但同樣被運輸署玩到陀陀擰嘅新專線小巴路線 ── 413 青衣碼頭 (翠怡花園) – 瑪嘉烈醫院 (葵涌醫院日間復元中心) 進行嘅跟進工作。事關呢條路線將會有一部「可供輪椅上落低地台小巴」，同有份引入呢部車嘅阿Lim 「借車一用」開街站俾啲街坊見識吓呢種响香港公共運輸服務嘅全新車種，做吓「熱身」咁啦。

無錯，架車的確仲未完成驗車程序，但係咪代表「驗唔到車」呢？當然，一日未見到架車鑲有正式嘅車牌，一日都未有明確答案；再又當然，一塊左側睹後鏡運輸署都可以搞咁多「故仔」出嚟，仍然有「終極 BAM」嘅可能。但始終未有任何「官方公佈」，絕對唔可以一口咬定「驗唔到」。所以，唔可以話班議員「搵SHOW做」，始終要同街坊做吓準備功夫。據各位今日「開街站」嘅議員所述，街坊嘅普遍反應相當正面，好期待架車能盡快投入服務。

驗車出牌仲爭啲乜嘢程序，問阿 Lim 啦 (佢好似會叫大家去問陳美寶……)。我哋呢度就純粹講返架車。根據試過車嘅阿Lim 同判官所講，駕駛室佈局似一架7人車多過一部小巴；引擎排氣量只得 2146cc ，「力水」表現不能期望會係「大爆發」，但總算無令人失望。