【公益活動】聖雅各伙藝術家 陶藝電車齊參加

話說收到香港電車嘅線人通風報訊,#30電車近來會有特別任務,咁當然要去伏擊睇吓發生乜事啦!

黃昏時份去到上環西港城電車總站…咦?做乜#30電車唔埋正站㗎?衝埋去八卦吓先!

為配合活動,#30電車身披特別車身色彩。

《我們的故事》?即係乜事呀?正當搲晒頭嘅時候,電車上嘅聖雅各福群會同工就嚟介紹返今次究竟發生緊乜事…

原來《我們的故事 陶塑記憶》係一個為期兩年嘅藝術項目活動,由聖雅各福群會藝想主辦、並受香港特別行政區政府「藝能發展資助計劃」資助,當中重頭社區藝術節目就要用到#30電車,叫做「我們的叮叮遊記」,啱啱喺10月18號揭開序幕。

上:一眾嘉賓在陶藝主題電車前大合照。 出席嘉賓包括民政事務局藝術發展諮詢委員會主席周永成先生(置中)、 聖雅各福群會副總幹事張達昌先生(右二)、建築師謝錦榮先生(右三)、 師傅仔蕭宇恆先生(左三)、民政事務局藝術發展計劃總經理黃麗珊女士(左二)、)聖雅各福群會高級經理張文穎女士(左一)和聖雅各福群會藝術發展經理鄧嘉寶女士(右一)

下:創作夥伴――建築師謝錦榮(Kenneth)(左)與師傅仔蕭宇恆的陶瓷電車作品。
(聖雅各福群會提供)

今次係一個以陶瓷為創作媒介嘅社區藝術項目,得到著名陶藝家羅士廉先生策展,並且邀請咗15位嚟自唔同專業範疇嘅人士,聯同15位藝想嘅師傅仔(復康人士)一齊創作。

至於「我們的叮叮遊記」就係香港首次以陶藝做電車主題,公眾可以上呢架獨一無二、充滿藝術色彩嘅#30電車,近距離欣賞一眾師傅仔嘅作品,一齊體驗創作陶瓷嘅樂趣,同埋可以靠藝術拉近人同人嘅關係。

部份師傅仔嘅陶藝作品會喺#30電車上層展出。

陶藝主題電車設置咗一個高1.5米嘅陶泥電車司機,由佢帶領電車上另外兩位巨型薯蛋人乘客,仲有大約100件陶瓷創作品,主題分別為《花鳥蟲魚的願望》、《遇見工作中的你》同埋《給親人的一封信》。當中仲有靠手搖發電機操作的燈光陶藝互動作品「攻呀攻快搶攻」、紗線喺陶瓷上穿梭的「泥板與綉花」同埋做瑜伽嘅陶瓷泥公仔「陶瑜樂」等;同時,陶藝電車上會有師傅仔帶領社區人士試吓搓陶泥,體驗製作陶瓷嘅樂趣。

陶泥司機、陶泥乘客、陶器電車…(◎_◎)

「我們的叮叮遊記」由即日起去到 10月29日(星期二)舉行,由朝早10:45到下晝17:40,分為多節,每節活動約1小時。陶藝主題電車將會喺銅鑼灣總站同上環(西港城)總站之間遊走,參加者一方面可以喺陶藝主題電車上欣賞陶藝作品之外,仲可以親身體驗製作陶藝。

參加費用全免,但記得要預先去《我們的故事 陶塑記憶》網上連結登記:http://bit.ly/2koAqZG。座位有限,先到先得,額滿即止。

為咗宣傳《我們的故事 陶塑記憶》,作為支持機構嘅香港電車有限公司除咗提供#30電車舉行「我們的叮叮遊記」之外,佢哋仲將位於灣仔莊士敦道嘅#45E菲林明道電車站拎作宣傳之用,叫做「我們在叮叮站」,行過嘅可以去了解吓參與今次活動嘅藝術家同小店㗎!

用作宣傳今次活動嘅菲林明道電車站。

其實今次活動仲有其他作品分佈喺灣仔區入面另外10幾個地點,聖雅各福群會藝想有個叫「我們的藏寶陶」嘅活動,畀大家可以去各個展覽地點儲印仔,11月15號之前集齊18個印仔,就可以去到灣仔石水渠街85號聖雅各福群會地下嘅藝想展覽館登記,參加免費陶藝體驗活動㗎!

至於如果覺得想簡單啲就咁欣賞吓一班師傅仔嘅作品,其中15對參展夥伴嘅陶藝作品就放咗喺灣仔大有廣場大堂,行入去就睇到㗎喇!

有15組藝術創作者嘅作品放咗喺大有廣場大堂畀大家參觀。

1 Trackback / Pingback

  1. 【公益活動】聖雅各伙藝術家 陶藝電車齊參加 – 藝想 St. James Creation

Leave a Reply

Your email address will not be published.


*