2002年6月4號出世嘅香港女藝人許軼（Day），因為喺ViuTV嘅選秀節目《全民造星IV》之中得到季軍，其後成為香港女子組合COLLAR成員兼MakerVille合約女藝員。
2023年6月4號就係阿Day嘅21歲生日，佢嘅一班「Day B仔」支持者經「Day HK Fans Club」統籌，搵九巴整咗1個巴士全車身廣告上1架12米版本Dennis Trident E500雙層巴士（車隊編號：ATENU1595，車輛登記：VS4306）。
呢架「Day巴」除咗全個車身前後左右都有格仔拉花同阿Day嘅大相之外，其實車廂入面都有啲阿Day嘅應援相，表達一眾「Day B仔」嘅祝福。
原本唔少「Day B仔」就諗住2023年6月4號阿Day生日正日，齊齊出街搭下「Day巴」一齊開開心心祝阿Day生日快樂…但…
正當「Day HK Fans Club」出動雪糕車去到旺角西洋菜南街，向市民派發免費軟雪糕，車上寫有「4th June生日快樂」，現場亦有Fans Club助手派發應援品，吸引大批市民排隊，結果引嚟香港警察喺下晝2點半驅趕。
另一邊廂，有網媒就話「Day巴」喺阿Day生日正日一直留喺巴士廠無出街載客，仲言之鑿鑿咁示意大家諗係因為「特別日子」為由，為求避免有群眾喺街頭聚集而咁樣安排。
事實上邊有咁多陰謀吖！巴士台向九巴九龍灣巴士廠嘅線人查詢過，原來有巴士車長早喺2023年6月3號拎「Day巴」去準備開工嗰陣，發現「Day巴」嘅車頭燈壞咗，作為負責任嘅巴士車長就當然唔可以揸壞嘢嘅巴士接載乘客㗎啦！於是早喺2023年6月3號就已經擺返低「Day巴」喺巴士廠，無出街載客，畀工程部整返好「Day巴」嘅車頭燈先。
結果經過工程部努力咁維修同測試，「Day巴」嘅車頭燈喺2023年6月4號黃昏確認整返好，巴士車長都即刻揸「Day巴」出去尖沙咀碼頭，繼續服務九巴1A號路線。
嗱，雖然香港近年好多嘢背後都真係有陰謀，但有時唔需要吓吓都穿鑿附會嘅！
Be the first to comment