【傑出乘客系列】行唔切落樓 錯過咗落車 鬧完車長再鬧其他乘客 阿叔成功挑機畀人揼?

巴士台收到有市民報料,話2023年6月3號嘅黃昏時候,喺何文田發生一宗傑出乘客大戰車長以及其他乘客嘅事件。

事緣報料呢位朋友就話佢喺大圍上咗一架九巴81C號路線去緊尖沙咀方向嘅12米版本富豪B9TL雙層巴士(車隊編號:AVBWU568,車輛登記:UW5565),本來大家相安無事。

去到大約1840時嗰陣,巴士就行到去窩打老道近培正道口未到火車橋嘅位置,突然間就有個阿叔好勞嘈咁樣嗌落車,原來本身阿叔就想喺萬基大廈嗰個巴士站落車,佢撳咗鐘嘅,不過佢就話坐喺上層行唔切落下層,結果巴士車長無等埋佢落車就閂閘開車走人。

本來可以好簡單解決件事:喺前面何文田街嘅巴士站落車,其實都唔係相差好遠啫!

如果世事係咁簡單就唔會出現「傑出乘客系列」啦!

話說阿叔就見反正巴士都喺培正道口停緊燈位:「不如巴士車長你開個閘放我落車啦!」——大家都知揸正講一定唔得㗎啦!

阿叔天口㷫心口都㷫,一於開波「問候」巴士車長,而咁啱呢個巴士車長又唔介意「問候」返呢位阿叔…如是者巴士就喺火車橋橋底停低,然後大家就你一言我一語咁樣一直嘈喇。

事件擾攘咗一陣,去到大約1855時左右,巴士車長就決定開門畀其他無辜嘅乘客走喇。

如果世事係咁簡單就唔會出現「傑出乘客系列」啦!

就喺呢個時候,由於阿叔嘅行為阻礙咗其他乘客嘅行程,有幾位體型比較健碩嘅乘客,就喺落車嘅時候向阿叔喺言語上表達咗佢哋對阿叔阻礙其他乘客行程嘅不滿——大家初生口角之後,當然戲肉就係繼而動武啦!於是乎嘈咗分零鐘之後,呢幾位乘客就同阿叔隻揪喇!

報料嘅乘客就話,到真係入戲肉嘅時間佢就已經離開咗架巴士一段距離,要確保自身安全為先嘅正常人,當然就唔會行返轉頭介入啦!

不過佢就話大家一睇都知,其實只要阿叔好聲好氣,或者好多嘢就唔使搞到咁樣收尾啦!尤其打交嘅嘢,輸咗去急症室,贏咗就去報案室,都係盞搵自己搞㗎啫!做人唔好咁傻豬呀!

Be the first to comment

Leave a Reply

Your email address will not be published.


*