炎明熹18歲生日 粉絲後援會請乘客免費搭「應援巴士」

原名「王佳恩」嘅香港女歌手及演員「炎明熹」係2021年無綫電視歌唱選秀節目《聲夢傳奇》第1季總冠軍「傳奇新星」，並同時奪得「專業評選大獎」以及「觀眾熱選大獎」，現時係無綫電視經理人合約藝員、星夢娛樂旗下音樂廠牌「愛爆音樂」女歌手及女子組合After Class成員之一。

九龍巴士（一九三三）有限公司（「九巴」）2023年4月6號宣布，會喺2023年4月9號（星期日）同「炎明熹粉絲後援會」（Facebook / Instagram）合作，舉辦免費乘車日。

全港市民喺2023年4月9號可以無限次免費乘搭「炎明熹生日主題巴士」（12米版本富豪B9TL雙層巴士，車隊編號：AVBWU669，車輛登記：VB6984），行走路線1A號路線（中秀茂坪 ←→ 尖沙咀碼頭），慶祝炎明熹18歲生日。

「炎明熹生日主題巴士」除咗車身四邊都坡上咗特別為慶祝炎明熹18歲生日嘅應援全車身「拉花」之外，喺車廂入面都有貼上相關嘅廣告貼紙。

九巴1A號路線途經觀塘、九龍城以及油尖旺區，炎明熹嘅粉絲亦可以乘搭1A號路線去到采頤花園、譽．港灣、九龍城轉車站-富豪東方酒店、尖沙咀柏麗大道、九龍清真寺等巴士站，同炎明熹生日應援燈箱打卡。

所有市民都可以喺2023年4月9號，乘搭上述指定巴士而毋須繳付車資，使用八達通卡嘅乘客亦毋須拍卡作記錄，無限次上落車。

九巴表示會預留車務資源以及加派外勤人員，並會喺指定「炎明熹生日主題巴士」嘅電子路線顯示牌輸入「GIGI炎明熹 9/4生日請你搭1A」以及喺車頭位置貼有提示乘客享受免費乘車。

至於講返「炎明熹粉絲後援會」，佢哋一班會員喺2023年4月9號一早已經去到尖沙咀碼頭巴士總站，齊齊搭上「炎明熹生日主題巴士」，祝賀係炎明熹18歲生日快樂。

當然去到另一邊嘅中秀茂坪巴士總站，同樣有一班會員守候「炎明熹生日主題巴士」，大家見到「炎明熹生日主題巴士」到場都好興奮咁齊齊舉機拍攝，期間九巴嘅員工都提早畀呢班會員早幾分鐘上巴士「打卡」，秩序大致良好。

然而，部分會員卻對巴士迷有微言，指斥巴士迷唔應該喺行車路上「末路狂奔」咁追住巴士嚟拍攝，亦指責有巴士迷涉嫌推撞一啲等候乘搭巴士嘅市民——幸好未引起進一步衝突。