【兔兔那麼可愛】嶼巴2023兔年巴士正式出動!

2023年1月16號,呢一個香港天文台發出寒冷天氣警告、氣溫唔夠12℃嘅傍晚,新大嶼山巴士為2023年兔年而整嘅生肖巴士亦都正式出街喇!

巴士台承蒙新大嶼山巴士相關人員協助,傍晚時分去到香港迪士尼樂園巴士總站率先望咗吓呢架新嘅兔年巴士!

新大嶼山巴士2023年呢一款兔年巴士車身特別拉花,選擇咗醒目嘅白兔仔擺喺巴士嘅前後左右四面,得意嘅兔仔頭配上咗仿照「招財貓」嘅設計,正正突顯香港兼容並蓄、融會多國文化嘅特質。巴士車尾仲有著「納福納祥喜迎兔 福兔招財慶豐年」嘅吉祥語句,為一眾乘客送上新年祝福。

新大嶼山巴士呢一架2023年兔年巴士會率先行走來往東涌站以及梅窩碼頭嘅3M號路線,有緣嘅大家一定會見到㗎!

如果細心留意下呢架巴士上面嘅拉花,大家會睇到左右兩邊各有三架代表著新大嶼山巴士唔同時期唔同巴士車身色彩以及巴士車型嘅Q版巴士圖案,據大嶼山巴士嘅代表介紹,原來佢哋呢一架兔年巴士係為咗慶祝公司成立50週年嘅活動之一,至於仲有其他乜嘢活動呢?暫時就賣個關子喇!

Be the first to comment

Leave a Reply

Your email address will not be published.


*