【2022聖誕】聖誕前夕免費乘車日送暖?乘客怨聲載道實會暖嘅!

2022年12月24號,日本服裝品牌「UNIQLO HEATTECH」舉辦免費乘車日,聲稱陪市民溫暖過聖誕。

嗰一日嘅免費乘車日分成兩個部分:

  • 所有乘客都可以免費乘搭香港電車任何路線
  • 所有乘客都可以免費乘搭九巴1A號路線(中秀茂坪 ⇌ 尖沙咀碼頭)

港島區方面,香港電車一如以往咁樣,幫錢箱同埋八達通幾戴晒「頭套」,提醒乘客毋須繳付車資。不過有電車車長反映原來好多市民既唔知道有免費乘車日,而又有部分乘客好執意仍然想掟錢落錢箱…不過呢啲都係小問題…

九龍區方面,九巴表示會喺車頭位置提示乘客享受免費搭車體驗,市民當日上車後毋須繳付車資,無限次上落車,同時九巴會預留車務資源、加派外勤人員處理。

不過大家細心諗吓,12月24號係乜嘢日子,而12月24號嘅九龍,尤其係尖沙咀會係乜嘢情況…

警方當日喺下晝就已經運咗大量嘅鐵欄去到尖沙咀,一早就已經將尖沙咀碼頭巴士總站用鐵欄團團圍住!為乘搭巴士出街嘅乘客帶嚟不便!當加上呢個免費乘車日,揀正尖沙咀碼頭嘅路線,大家可想而知當乘客興高采烈咁想搭免費車去尖沙咀歡度聖誕,到站嗰陣發覺好似動物園啲野獸咁被困喺鐵欄中間會有乜感受。

同一時間,西九龍地區因為大量市民出街歡度聖誕,引致多條主要道路人同車都非常擠塞,嚴重影響到公共巴士班次。

再加上12月24號對於好多基層市民嚟講仍然係需要返工嘅,尤其中秀茂坪一帶係依賴公共巴士出入,當大量乘客因為「免費」而揀咗乘搭1A號路線巴士,唔少喺呢一個返工日啱啱先至放工嘅基層市民,就無辦法搭到原有嘅巴士班次返屋企同家人過節。

雖然九巴聲稱會安排外勤人員同埋車輛資源盡力去滿足乘客需求,但本台當日下晝都收到有乘客投訴,表示喺旺角到太子一帶,基本上途經嘅去中秀茂坪方向1A號路線巴士,每一架都係顯示「客滿」,唔少市民表示等咗6、7班車仍然係無辦法上到巴士。

本台當日接到市民投訴之後,傍晚曾經派人員去到「旺角警署」巴士站,目睹現場排隊等候1A號路線巴士嘅人龍一直無辦法「消化」,喺多班巴士都係「客滿」嘅情況下,由「仲有太陽」到「收咗太陽」,乘客需要久候嘅苦況都無明顯改善。

事件要一直擾攘到「天都黑齊」,九巴先至派出「吉車」加班嚟到「中途起載」疏導乘客,但唔少市民都話已經等候多時…

如果唔係因為地鐵去唔到中秀茂坪,老早就已經轉咗搭地鐵啦!

去到夜晚,由於當日警方唔畀公共巴士駛入尖沙咀、佐敦一帶,原本以尖沙咀為終點站嘅公共巴士路線需要以佐敦道為界,喺佐敦嘅分站作臨時總站。

不過當晚唔少巴士路線顯示牌並無作出改動,仍然係顯示尖沙咀碼頭等尖沙咀地區嘅巴士總站,令到唔少乘搭巴士嘅乘客誤以為當晚取消咗改道措施,喺佐敦一帶造成混亂。

或許對贊助嘅公司嚟講:

負面宣傳都係宣傳
網上無乜人提就過幾日啲人唔記得㗎喇!

Be the first to comment

Leave a Reply

Your email address will not be published.


*