2022年7月1號係「香港特別行政區成立25週年」，當局會舉辦多項「公眾無份參與」嘅相關活動，不過又咁講，係咪話一般市民唔參加特定社團搞嘅「慶祝活動」，除咗得一日公眾假期之外，就「乜著數都無」呢？
好彩又未至於真係乜都無
當日有部份公眾交通服務有「免費乘搭」嘅安排，起碼出街嘅一般市民都叫「享受到啲沙」。
電車
為慶祝香港回歸中國25周年，中國太平保險集團（中國太平）希望同全港市民共享節日歡愉，2022年7月1號舉辦「慶祝回歸廿五載 和諧香港開新篇」為主題嘅電車「免費乘車日」活動。
今次電車「免費乘車日」活動首先喺7月1號上晝11點假屈地街電車廠由中國太平舉行隆重啟動儀式，由中國太平領導張惠萍聯同一眾嘉賓進行揭幕。
儀式完結後，有#28、#128呢2架派對電車接載一眾嘉賓連同義工，由屈地街電車廠去到北角電車總站，接載嘉賓嘅電車之後返回石塘咀，隨後再進行6句鐘嘅電車巡遊慶祝活動。
中國太平表示希望藉呢次請全香港市民免費乘搭電車，能夠喺香港電車沿線一同見證香港回歸25周年嘅珍貴同喜悅時刻。
中國太平表示，主辦呢次公益活動係寄語香港未來發展一帆風順，實踐「一國兩制」帶領香港邁向新征程，香港市民可以喺在繁榮安定嘅生活中延續歡聲笑語、共同富裕、共享太平。
除咗兩架派對電車之外，中國太平仲安排喺香港電車嘅幾架電車上咗全車身廣告，點出「慶祝回歸廿五載 和諧香港開新篇」主題嚟提醒香港市民7月1號可以免費搭電車。
但係隨著強烈熱帶風暴「暹芭」逐漸逼近珠江口一帶，香港天文台喺7月1號1910時發出8號東南烈風或暴風信號，香港電車表示會提早開出尾班車，時間介乎1910時到2020時，標誌著呢一次所謂「慶祝香港回歸25週年」嘅「免費乘車日」捱唔足一日。
九巴
九巴喺2022年6月27號發稿，指7月1號香港回歸25周年銀禧紀念當日舉辦由科興控股（香港）有限公司（科興）贊助嘅「免費乘車日」。
7月1號當日，由頭班車到尾班車嘅全個服務時段，任何乘客都可以無限次免費乘搭，九巴1號路線（竹園邨←→尖沙咀碼頭）。
九巴1號路線途經油尖旺、九龍城等九龍區心臟地帶，乘客除咗可以沿彌敦道穿梭油尖旺享受購物樂趣，又可深入九龍城舊區，探索九龍寨城歷史，或者九龍城內街尋覓各地美食，所以就算天氣唔好，都仍然吸引咗唔少人專誠排隊搭巴士。
當日喺九巴1號路線嘅各架用車上面都有相關「科興請你搭九巴1號路線」嘅告示，而巴士車身嘅電子路線牌亦加插有「SINOVAC科興 1/7 請你搭 1」嘅轉頁顯示。
巴士上面嘅電子支付條碼閱讀器被設定為「暫停服務」，八達通收費機就被設定為收費「$0.0」。不過為咗方便統計乘客人數，當日乘搭九巴1號路線嘅乘客，如果係使用八達通卡就需要照樣將八達通卡擺埋去收費機，方便系統讀取「有1名乘客上車」嘅紀錄；至於如果唔係使用八達通卡嘅乘客，亦需要向巴士車長開聲講明「我入現金」。
不過呢一種安排，對部份「覺得免費即係可以就咁行入車廂」嘅乘客就有啲混淆，往往巴士車長喺每埋一個巴士站都需要慢慢解釋畀乘客聽，幸好乘客都通情達理。
有乘客就表示，科興呢啲公司面對新型冠狀病毒（武漢肺炎）橫行，政府不斷向佢哋購買疫苗，令公司「大發國難財」，之後先至肯畀一條巴士路線嘅乘客免費搭車，咁做可能令公司內部嘅人「自我感覺良好」，但實際上就「未免太過小家」。
隨著強烈熱帶風暴「暹芭」逐漸逼近珠江口一帶，香港天文台喺7月1號1910時發出8號東南烈風或暴風信號，九巴表示日間路線喺22時左右開出嘅班次會係尾班車，標誌著呢一次所謂「慶祝香港回歸25週年」嘅「免費乘車日」捱唔足一日。
天星
天星小輪喺2022年6月24號公佈，為慶祝香港特別行政區成立25周年，喺7月1號全香港市民都可以免費乘搭天星小輪「尖沙咀←→中環」以及「尖沙咀←→灣仔」航線。
天星小輪喺碼頭貼出咗告示，指出2022年7月1號係「免費乘船日」，「中環/灣仔←→尖沙咀」渡輪服務全部免費，以慶祝香港特別行政區成立25週年。
當日天星小輪仲關閉咗喺各個碼頭入面嘅代幣售賣機，有部分乘客見到呢種情景，都紛紛喺入閘之前，先同被「免費乘船日」通告包住嘅代幣售賣機嚟返張合照。
至於部分入閘機上面，亦貼有特別設計「慶祝香港特區成立二十五週年2022年7月1日免費乘船日」嘅吿示。
隨著強烈熱帶風暴「暹芭」逐漸逼近珠江口一帶，香港天文台喺7月1號1910時發出8號東南烈風或暴風信號，天星小輪表示「尖沙咀←→中環」、「尖沙咀←→灣仔」航線會同時喺1930時開出尾班船，標誌著呢一次所謂「慶祝香港回歸25週年」嘅「免費乘船日」捱唔足一日。
臨尾講多一樣緊要嘢：
大家係咪覺得好似無講到係邊一間公司贊助天星小輪嘅「免費乘船日」呢？
因為呢一次「免費乘船日」係天星小輪自己贊助返畀香港市民嘅！
有部分乘客得知係天星小輪自己出資安排「免費乘船日」之後表示，雖然好多謝天星小輪安排「免費乘船日」，但係佢哋喺傳媒報道得知天星小輪近嚟財政狀況惡化，佢哋都認為「唔好貪嗰幾蚊免費」，反而希望「天星小輪唔介意收返錢」、「大家幫得幾蚊得幾蚊」。
對於一間喺香港經濟一片好景嘅時候都只能夠勉強賺取微利嘅公共交通機構，喺香港面對重大經濟危機嘅時候，呢一間公共交通機構已經連續多個月虧損，但喺咁嘅情況之下，呢一間公共交通機構為咗希望與民同樂，自己承擔成本去畀市民免費乘搭——呢種精神應該要令好多所謂「愛香港」嘅企業無地自容。
其他
其餘仲有珊瑚海嘅小輪服務以及綠色專綫小巴總商會都有提供免費乘搭，以慶祝呢個日子。
Be the first to comment