電單車越線撼九巴 鐵騎士傷重不治

2022年7月26號朝早，九巴1架行緊11C號路線嘅Enviro500型雙層巴士（車隊編號：ATE245，車輛登記：MF421）正沿著秀茂坪道上斜，去到啱啱過咗順安道路口嘅時候，對面線1架正沿著秀茂坪道落斜嘅電單車突然失控越過「火位」，直撞巴士車頭，電單車司機重創倒地。

當局喺朝早0752時接報，立即調派救援人員趕到現場搶救傷者，可惜59歲電單車男司機不幸返魂乏術。

根據路過讀者所講，車禍後電單車散開，零件以及尾箱物品跌落路面十幾廿米範圍。

車禍後九巴車長留喺現場協助警方調查，現場上落斜各有1條行車線封閉。