【香港電車】行政會議批准加價 「加幅比率」遠超通脹又如何?

行政長官會同行政會議喺2022年6月7號嘅會議中同意香港電車有限公司修訂車費。

新嘅香港電車車費由2022年7月11號開始生效:

  • 12歲或以上人士車費由2.6元增至3元
  • 小童車費由1.3元增至1.5元
  • 65歲或以上人士票價由1.2元調高至1.3元。
  • 月票收費由220元增加到260元
  • 取消面值234元嘅遊客票

政府指,評估香港電車有公司的加價申請嗰陣,已經根據既定政策同埋機制考慮各項因素,包括:

  • 電車公司服務水平
  • 電車公司正在推行改善項目嘅質素
  • 上次調整票價以嚟營運成本同埋收入嘅變動
  • 預期公眾接受程度…等

政府指,香港電車有限公司一直提供路面零排放以及票價相宜嘅服務,廣受歡迎,既傳承香港電車歷史價值,同時推行多項改善項目以及引進創新措施,為乘客提供更安全同埋舒適嘅旅程。經考慮所有相關因素,政府認為有需要調整電車票價以維持香港電車穩健營運,香港電車有限公司嘅建議加幅亦屬可接受水平。

經修訂車費率會喺刊登憲報後1個月,即係7月11號生效。

喺早前香港電車有限公司傳出申請加價嘅時候,已經有輿論認為「單程加幅高達15.38%」、「月票加幅高達18.18%」屬於「遠超通脹」嘅唔合理水平——「完善選舉制度」之後產生嘅立法會,有議員甚至認為呢一個加幅比率會帶動全香港各行各業嘅收費都以「同等幅度」增加。

咁究竟香港電車呢15%嘅加幅係咪值得令人憤恨呢?

做人最緊要公道…

首先無可否認嘅係香港電車面對香港持續受到新型冠狀病毒(武漢肺炎)肆虐影響之下,客量喺疫情高峰曾經一度大幅下跌超過一半——拉番勻條數咁計,香港電車喺2019年嘅平均每日載客量係15萬人次,2020年跌到只有11萬人次,即使其後市面復興,但係喺2021年仍然只係錄得13萬人次。

至於香港電車車身以及車站嘅廣告收益方面,2019年收入約1.14億元,2020年減至約9150萬元,2021年回升至約1.08億元,而因為所謂嘅第5波疫情,嚴重打擊廣告收入,喺2022年3月份,香港電車嘅廣告收入大幅下跌三分之一

粗略咁樣計,喺2021年香港電車有限公司嘅車務以及廣告收入相加只係得2.32億元,同一時期嘅基本營運支出就略多過呢一個數字,結果盈利向來並唔豐厚嘅香港電車有限公司喺2021年就錄得-1.3%嘅「利潤率」——簡單啲咁講即係佢哋依家係蝕住咁樣維持服務

至於講返15%嘅加幅之所以咁大,純粹係因為香港電車向來嘅收費基準都係非常之低,市民應該要諗清楚一樣嘢:如果搭中由堅尼地城一直去到筲箕灣嘅班次,都只係需要畀返搭1個站嘅同等價錢——2.6元(加價後係3元)。

敢問大家:

呢一個價錢喺依家嘅香港你可以仲做到啲乜嘢?

Be the first to comment

Leave a Reply

Your email address will not be published.


*