「熱狗」送外賣 警察聲言犯《599G》 街坊：香港本身就人多㗎啦！

由所謂「新型冠狀病毒」（武漢肺炎）引起嘅所謂「疫症」肆虐全球，香港政府順勢以所謂「防疫」之名推出多項「緊急」法令，其中一項就係第599G章《預防及控制疾病(禁止聚集)規例》，推出以來一直有濫用之虞。

2022年4月3號，位於佐敦嘅「黃店」「糖水雄」，安排咗同附近嘅一啲「同路人」食肆一齊搞「大埔區外賣團購」，並且喺區內分4個地點交貨。

由於訂單數目龐大，為答謝一眾大埔人嘅鼎力支持，所以安排咗一啲神秘嘉賓畀一班大埔街坊驚喜——當中包括唱作歌手陳浩（Edward）、前．九巴11米版本富豪奧林比安無冷氣雙層巴士（車隊編號：S3V25，車輛登記：GK9829）。

送外賣嘅車隊喺大約1830時由佐敦出發，首先大約1914時去到第一站太和路「大埔超級城」對開，成功向唔少大埔街坊送上熱辣辣嘅食物。

當送外賣嘅員工同埋「S3V25」喺1936時去到大埔第二站「太和廣場」嘅時候，突然有大批警員撲出嚟，並向街坊稱指控現場一干人等涉嫌違反第599G章《預防及控制疾病(禁止聚集)規例》、未有正確展示「T牌」等「罪行」。

期間有警員聲稱「我都好明白依家生意難做…你哋送外賣啫」，不過依然派出便衣（相信係）警員錄影各人，雖然未有發出告票，但有抄低部份人嘅身份證資料。

對於大埔警區喺太和廣場針對「送外賣」嘅行動，有唔少路過嘅街坊直言係「痴線」、「濫權」、「香港本身就人多㗎啦！」，甚至有街坊即席同小朋友講「嗱，警察叔叔又亂嚟喇！」

事件擾攘咗大約一句鐘，警員去到2028時先至肯放走「S3V25」，但之後嘅送外賣行程就…唔好提喇！

而另一方面，有大埔街坊就喺社交媒體上載相片，指早喺送外賣嘅車隊去到第一站太和路「大埔超級城」對開派發外賣嗰陣，已經有便衣（相信係）警員錄影。

根據本台比對喺太和路「大埔超級城」對開以及「太和廣場」錄影嘅便衣（相信係）警員，衣物、鞋、背囊等都相符，所以相信今次係大埔警區一次有心埋伏嘅行動。

正所謂…

忠誠勇毅 XXXX