城巴路口撞電車 電車服務曾暫停

2022年2月5號中午12點幾，城巴1架行緊592號路線嘅12米版本丹尼士三叉㦸E500型雙層巴士（車隊編號：8353，車輛登記：SJ3778），由怡和街右轉入銅鑼灣道嘅時候，同由東區開去跑馬地嘅#29電車發生碰撞。

據悉電車上有1名乘客受輕傷，而由於碰撞後電車出軌，一度令電車東西行雙方向都需要暫停服務，等候工程人員安排吊臂車將電車移返正。

涉及碰撞嘅城巴雙層巴士亦打橫攔住高士威道西行銅鑼灣道路口，警方需要調派多名警員到場指示駕駛者同行人繞過碰撞現場。

事故擾攘咗大半句鐘，到下晝1點22分，#29號電車被移正返入路軌，電車恢復行車，由電車公司工程車護航下駛返屈地街電車廠；而城巴雙層巴士就駛入銅鑼灣道等待城巴處理。

現場所見，#29電車右側車頭有明顯損毀，下層右窗框對上有凹陷同穿咗少少，右邊嘅訊號燈組爛晒；城巴就左側下層落車門之後第2隻窗玻璃碎晒。

現場就留有兩車碰撞後跌出嘅碎片，路面亦有電車出軌時造成嘅刮痕。

至於碰撞嘅起因，現場乘客就指應該係其中一方未有緊跟交通燈號指示所致，但仍然有待警方交通意外調查組嘅調查先至可以確定。