宣傳《梅艷芳》電影 梅死忌電車巡遊

2021年11月上映嘅香港傳記劇情電影《梅艷芳》（Anita），由導演梁樂民擔任執導及編劇，江志強監製，由王丹妮、劉俊謙、廖子妤、林家棟、古天樂、楊千嬅、楊祐寧領銜主演，電影根據已故香港藝人、樂壇巨星梅艷芳嘅真實經歷改編，內容包括佢一生有關親情、愛情、友情、事業發展，講述梅艷芳一生傳奇經歷，藉此向佢致敬。

雖然電影早喺2021年11月12號上映，電影公司喺2021年12月30號梅艷芳逝世18週年正日，出資包起香港電車有限公司嘅服務1日，請所有香港人全日免費搭電車。

另一方面，電影公司亦租用香港電車有限公司旗下#28、#68電車，安排喺電影《梅艷芳》（Anita）入面飾演梅艷芳嘅香港女演員王丹妮（Louise）由西環同一班支持者沿電車路巡遊，既宣傳電影，亦安排同支持者見面。

王丹妮沿途都對路人報以笑容同揮手，當電車去到銅鑼灣崇光百貨門前嘅過路處，一眾王丹妮支持者仲拉起電影《梅艷芳》（Anita）嘅宣傳橫額合照。

電車去到銅鑼灣總站，王丹妮繼續同支持者合照、簽名。其後換咗另一班支持者上電車，再返去西環方向巡遊到西港城結束。

至於講返電車免費搭車呢~有市民表示，乘客數量暴增，但電車派車數目疑似唔及平時咁密，引致好多平時搭開電車嘅市民反而搭唔到車。（—_—）”